Na Hrang Hmun A Um Nawn Lo! (Part-3)

Beer duur
“Aiiiii……. Ka duh thei lo ka nu!!! Dim, nang rori ka lo tong ti aw”, aw fem nerno takin Cicin cu a ra tlanih i ra pom. Si ee, kum khat leng kan tongaw lo pi. Kan ngaiawk dan cu a mak! FCFS biakinn hmai ah cun khawmban rawnhru ei dingin kinlan umnak lam cu kan hei pan. Ka kutin KFC ka von lak zik zawngah ka dunglam ihsin mi pakhat in a kutin ka mit i rak hup. Zo a si ti ka pol rero nan ka pol khawsuak thei lo. A thawthawt ka hon ngai rero nan ka theithei cuang lo. A netnak in a kut a thlahih ka hon zoh cuh!!! Yangon Agent inn ih ka umpi ka rualpi ttha zet Thiamte a rak si. Kan lungawi tuk ti cu kan mithmai ah a lang tuk. Kan hni hiamhiam. A kiangah Sungneu a um bet. Kan rualvahza kan tongaw cu kan nuamawkdan rel thiam ding rual a si lo.

Rawnhru ei tthehin MRT lam pan in kan fehih lamziin parah ttong kan cuhaw ciamco. Kan thusimawk duhmi cu a tamtuk ah kan co aw thei lo. 7pm inn thleng ttul lawnglawng kan si fawn ruangah a zamrang theibik ih zaanriah ei kan tum. City Hall Penisula Plaza sung kan von lut. Kawlrawl ei dingin kan um. “Umm!!!! Rualpi tongaw khawm cu kan aih lo ding sawm?” Kan von ti aw cio. Ziangthawn kan aih ding? Ziangdang si hlah! Kan mit cun Beer cu a mitmei cih. Kan zaten lungkim in kan von cah. Ka rualpi dang cu leng rak suak rero zo an si tikah thuumdan an rak thei deuh. Kei cu ka veikhat suahnak a,si fawn.

Cicin cun, “Dim, na in ding maw? Zoh aw. Kanmah nunau rual hitivek ih in cu a mawi lo. Kan in ding a si hmanah a lei in kan lei dingih tlangpar tivek ah kan va in ding. Zoh a mawi lo tuk!” Tiin thinphang zet mithmai thawn I rak ti. Ka mitmen cang nawn in Cicin ih mitmu cu ka zoh ih, “A thup le thiar ih thil ti ka duh lo! Kan in hnuhnu tlangpar/Langhngan takih in ding. Miih hmuhah hmuah fel tak vekih um siin a thupteih in hmang tivek ka duh lo. Khi zoh aw. Tuisun kan khawmih khawm hruaitu pa hman a palaang in a hunaw khi!” tiin kan hmai zawn cu ka hei khih. Cicin cun a hei zoh veih, “Anih cu mipa a si. Hitivek in hi in nautat zet ding hokhaw”
“Mipa si ruangah ziang? Bible kai fekfiin khawm in hruai khateh! A tuhi Bible a painak Bag khi a tonak zawn hei zoh”, tiin ka khih lala. Cicin cun, “Na mit a va rang ve! Khivek tla na rak hmu man” tiin hni phahin I hon ti sal.

“Beer cu sual a si lo. Van kai ding in dawnkhamtu khal a,si cuang lo. Hnangamten in hluahhlo mai ding. Thin hahdamnak maimai si” tiin kan Beer cahmi cu an ra thleng cupco. Thiamte cu mi pakhat thawn phone an biakaw rero. Kan hnen ra dingin a sawm. An biakawk hnu reilo ah ‘pa ngai’ le ‘Thangpi’ cu an rong thleng. Kan Beer cahmi an zoh. Kannih cu Singapore local suak ‘Tiger’ lawng kan rak cah. Thangpi cun, “Tuizan bill cu keimah ka pe ding. Ka hnattuan promote ka ngah ih nan duhzat ei-in uh. A dang khal kan cah bet ding” tiin ‘Guiness’ le ‘Heineken’ pawl a hon cah bet. Kan zaten kan khuat kan khai ih “Cheers!!!!!!!” Tiin au in Ritte rual bangin kan tlok nohno.

*********
Tuisun cu a veihnihnak ka suah thei caan a si. Cicin le keimah lawng kan khawm. Zanlam khawmban hnu City Hall kan fehih kan dung lai ih Thiamte ih rualpi pahnih tei thawn kan tongaw. Kan kut zungpi piahaw in inlee dawr cu kan von pan feuhfo. Zaam lo takin Beer cu kan von cah. A man ka von zoh cun ka mit a hong kau puppi!! Tiger hi $6 a si. Guiness pawl ka von zoh cun duurkhat men in ka tawkaw fawn lo! Kan duhzat kan von in cun ziangzat kan ciah ka zoh ngam fangfang. Rii thluaithli phah cun inn tlun kan hong kai. Dai ka leng duh ka tiih lamzin ka hmufiang thei nawn lo! Ka fehnak lamzin hi a phiir vekin a kang. Cicin cun ka kiu in I dom phah. Dailen inn sangka ka von ong cu ka tlu loih cu fangfang. Ka awsuah, ka lei taal a dik nawn lo. Cicin cun, “Ttong nawn hlah. Daiten von um mai!” Tiin I rak hro phah. Miih hmuhah ziang tluk zoh ka sia ti ka thei aw lo. Inn ka thlengih ka thil ka phorh thluh. Ka mp3 a rak um nawn lo. Ka rii tuk fawnih ka ihnak tang lamlam dapin ka hawl ciamco.

Zing ka tho cu ka pum an rialaw in an sualaw ciamco thlang. Ka lu a naa ka mit khal a cuur biambiam. “Aw!!!! Beer pum, beer biang an ti ttheu kha ka von mang. Ka mp3 khui ih ka tan ka von ruat. MRT sungih ngai tumin ka phorh tiang ka mang. Cuihhnu ziangtin a cang ti ka thei nawn lo. Ka paisa hman ka von ttuat. Oiiiii………. Hnipuan hman cuzat man ka hruk lo kha! $$$…….

Himi beer in ziangmi tthathnemnak I pek?
Thu ka hngilh thluh
Ka miphun mual ka photer
Bible thawn I hlatter
Miih nun tthatnak hmu loin an tthatlonak sawn in ka tahtthim
Sual si loih ka ruahmi cu sualtak a rak si. A,san cu ka kut le ke khal an hit ringring vekin ka thei.
Rawl ei hlanih ka in tam cun gestic ka ngah cih rori fawn!
Beer man khun dan le rawl kaankhat hnakin Beer duurkhat a khung sawn. Cumi duurkhat duhtawk loin duurhnih tal ka,cah ringring fawn.

Ka inn lam ka von ruatih Ka nulepa hin an ka sungah ei thaw ei siang lo roriin in rak cawm si khawh. An dam lo caan hmanah taisir ttentto in…..
Tthathnemnak nei cuca lomi hrangih ka rak cemheu le ka hminsiat liangluang!

Aih! Tawk rori seh! Tawk rori seh! Thlakhat ka suahcaan ih ka beer in man $ hin midang hrang tthatnak tuahnak sisawn thlang hram seh! Um lo cing khalin khawihding ka,rak nei ringring tho si. Peknak lam khalah khawih ding um thlang seh!

Maw!! Nang Beer, hahdamnak ah tiih ka,rak lo in ttheumi na sinan hahdam lamlam I hlah khaw! Thinharnak phunzakip I thlentu!
Rawl ei caanah tihang in ai nangmah dawk ka rak duhsawn ko nan tucu nang ai in anthur hang in ka hrilsawn thlang.
Ka rak duh duahdo mi na rim le na thawtnak cun miih zohniamnak lawng I rak pek!
Feh thlang ko aw ka kaa le ka pumsung lut dingah na hrang hmun a um nawn lo!!!

Peh Leh thotho ding.

Febuary 25, 2013
By – Mai Daidim

Comments

comments

Comments

%d bloggers like this: