Na Hrang Hmun A Um Nawn Lo! (Part-2)

Kunpawng
Lailam ih khuaivai kan thlir cuahco ttheu bang minung a phuul ih phuul hluahhlo cu ka dinnak ihsin ka zoh cuahco. Cicin cun, “Daidim, ziangah cutluk cun mi aa bangin na um?” tiin ka liangin i ra kuah. Kei cun, “Leilungtlun minung hmuahhmuah hi Penisula Plaza ah an ra thluh si kem maw ti ding rori. Minung hi an va tam ve!” tiin ka zohnak hmun zoh keuki phahin ka ttong. Cicin in ka kutin i hruai ih, “Rawl ei lohli kunguh. Cu lo cun minung a tamawtuk ih tonak pohkhal hngah a ttul hnuaihni ding. Khawm le kan tum fawn” tiin a ttong phah vivo. Cu ngaingai in rawldawr kipin minung an khat thluh. Tonak a lawng hrimhrim a um lo. A fuun ih fuun lamlam tla kan tum lawk. Asinan mi pahnih tei an dingih cuveten tonak kan va cuh lohli.

Cicin hi Arsa cokcawdil uar ngaingai a si ruangah cucu kan cah ih kan ei. Rawl kan khawhin kan dingih, “Dai kan leng ta pei cu. Kan sam vek tla kan va hriat tluang ta ding” tiin Cicin cu ka sawm. Cicin cun, “Kei cu ka sam vek cu ka hriat tluang paih zik lo. Ka sam taktak lawng ka hriat ding” tiin hni lo riai in i rak sawn. Kei khal cun hni ve lo riai in, “Kei cu ka sam taktak silo’n ka sam rori…” ka ti zawngah mi pahnih kan hmai ihsin an kut hmehtok le zungpi thawih hnar phit phahin an ra kan hei hmu. Cule cu tei pahnih lakih pakhat in, “Ziang saw an ei? Zo pawl saw an si?” tiin a sut. Cule pakhat sawn in, “An ei mi cu rittheih thil phunkhat a si! Anmah cu Chin an si!” a von ti cun ka biang an hong sen ttualtto! Ek-inn sangka cu ka von ongih ‘Khaini’ rim cun hmun a luah khat thluh a si mai. Ka hnar ka phit ve! A rim cu a sia tuk mi cu! Ka hnar phitin ka kut ka zap. Cule mituih ka tonmipawl ih ttong von mangin Chin an si hnuhnu cu Falam ttongih ka biak an thei ko ding ti zumnak thawn, “Khaini nan hmawm maw?” tiin ka von sut. Cule awkam zaang takin, “Aw. Na duh ve maw?” tiin a Khaini duur cu i pek. Salai Napolean ih rak leh dahmi “Khawsia Thawi Neihawknak” ti cabu ka siar lai hmuah i von mangter ta ci! “Rittheih thil suaitu pawl cu kan tirh a siang ngaingai” a timi fang te. Ka khawruahnak ihsin ka hongfim ih a lam ka her hnu-ah mithmai panten ka hei hnihsan ih, “Aih. Ka lungawi. Kei cu Khaini cu ka ti lemlo. ‘Kunpawng ka duh sawn” tiin ka hei let.

Thlalang hmai ahcun duhtheih ka von bih-awih ka hmur cu sen ngaingai in hmursensi cu ka von hnih. Cule Cicin ih bag zaal sung cu ka von puurih ka duhdawt zetmi ‘Kunpawng’ cu ka von hmawm. Khuitawk ah Kunpawng an zuar ti cu donhar ding a um lo hrimhrim. Ziangahtile Kunpawng cu Kawl siava khalin an rak ei ve cuteh! Inn tlun ah cun kan kai ih Kunpawng man cu kan von sut. In rak sim cun kan mit a taar ruairo cih! “$5.20?!” tiin ka von sut hliah. Dawr kiltu cun a lu i rak sut. Ziangkhallole, ka duh duahdomi a sisi. Mitsing in ka paisa cu ka von phorh muarmo.

Kunpawng tthukkhat cun nithum hman tthittha in i daih lo. Khua ka ruat. Ka thlahlawh ka von siarih ka ruahsuahmi cu, “Ka thlahlawh sungin ka daihaw tuk sisi. Hraphria ding a um lo!” tiin hnangam takin ka lei huahho. Kunpawng cu a rim a hmui tukih milak tlan khal a hrehum lo. Kunpawng rim ka theih cun ka lungtur hi a rang zualzo simai! A rim ta rori hi ka duhbikmi cu a si.

Ni, thla le kum tiang a hong liam cun ka taksa in a rak tuar nawn loih thupte natnak ka nei thlang! Ka pi le hi mi tthatuk an si ruangah Clinic ah zamrangten in hruai. Siibawi pa cun, “Rittheih thil na ei in na suai a si” i ti cun kapi le hi an thinheng tuk! Baksahlia in in zoh! In deh thlang ding sihmang ti ding rori a si. Ka ningzak umngaihnak khal ka thei nawn lo!

Kum thum kumli sung Kunpawng ka rak eimi in ziang tlukin ka taksa ah damlonak i thlen tile, ka danghrawl an bol ih cumi cu Kunpawng ti ka rak dolhcih ringring miin a hmatter. Ka danghrawl a hmat cun rawl ka ei thei nawn lo. Rawl tthateih ka ei thei lo hnuhnu ka zawngkhau ih ka zoi^ duahdo! Culawng hman si loin ka pumpi khal an rak thling. Cuih ka pumpi thling cu Kunpawng sungih an rawimi Chemical pawl cun an rak velh ciamcoih a kak thlang! Cutikah pum na vansanglam in ka rak um ringringnak an si.

Ka pum naa le ka dang naa thei aw phah rero cingin Kunpawng cu ka rak ei ringring thotho ih a tu kum thum leng a hong kai cun thih hmabak in vansang ka lam! Minung hrangah veikhat thih ruatcia a si. Kan Bible sungah in sim. Thi ding hrimhrim ih sersiam kan si ko. Asinan tu rori ah ka thi sehla, “Kunpawng ruangah a thi” ti ka hlawh ding fawn! Siibawi pa cun Sii hlum i pe ih ka Siikhaan kan piahnak man hmuahhmuah le keimahte in peter thluh bet!

Ka Kunpawng man cu von ttuat sehla… $400+ a si ding. Cumi in a miat ka ngahmi $70(Clinic ih ka cemmi). Himi Kunpawng ka ei kum sung hmuahhmuah ih Missionary hrang ka pekmi “……”

Aw!!!! Tu ihsin thok, ka dam sungah Kunpawng cu ka ei nawn ruro raro nawn lo ding!
Maw nang Kunpawng,
ka duh duahdomi na rak si ko.
Asinan na rim hmuinak cun ka dang na rak lapttet hratih,
Na thawt duahdonak cun ka pumpi na rak ei ttet!
Atu rori ihsin feh thlang aw! Na feh lo cun keimah sawn ka tlan ko ding! Ziangahtile, Ka kaa sungih lo hmawm dingin “Nahrang Ah Hmun A Um Nawn lo!”…..

Peh vivo Lai ding…..

Febuary 1, 2013
By – Mai Daidim

Comments

comments

Comments

%d bloggers like this: