Na Hrang Hmun A Um Nawn Lo! (Part-1)

So_Sad_by_UnUmBreLLa
Kumkhat le hrek zuakzo leng suak thei lo lawlaw in thawng tla bang kharhkhum ih um berber ti pan cu! Tuisun cu Ar khawm hremhnuih thlahsalmi ka bang! Zing nisuak eng cun i ron kapih ka khawruahnak khal thiang verver in ka thei aw. Hlim takin ka theng a verih ti ka kholh thluh hnu ka hnipuan neih cawlam mawi thei patawp in ka hon cei aw. Ka ke khai rang vohvo’n Cityhall an timi lam cu ka hei pan ve ta!

Yangon ih Ba-yin-nawng market hrawnghrang i mangter hluahhlo. Kum siar ka rak hmuh dahlomi ‘Kuh-va’ ti phuinak sen tlengtleng in ka von hmu thlang. Singapore ram thianhlimnak lamih hminthang ve sikhawh! Kawlrammi umnak cu hiti rori awwww…… Ka kiangkap zoh phahin ka feh vivo. Inn tlun ka hong kai ih 2nd floor ka thlen in Laimi ka si ti in thei lo pang ding ti si awm takin, “Mai DaiDim!!!!!!!” a aw cun Cityhall MRT sung tiang khal a von hrawh ban ding ti khopin kotu ka nei. Ti lualo’n ka dunglam cu ka hei zoh. A rak si ngaingai! Tuluk innsang ka um sungih keh phu dahlo ka biang vun tete cu an hong kek miaimo thlang. Ka ban pahnih ka pharh cih ih ka rak hmuak.

Cicin cu a ra tlan ciamcoih, “Ka lo ngai tuk ee Daidim” tiin ttah awsuah thawn i ra pom. Kan pahnih in kan pom aw. Ziang tluk kan thaw a suak ti cu kan kiangkap ih hnawmbawm tiang khalin in theihpi ding kan zum. Ttong hi a co in kan co aw lo lawlaw. Tuluk innsang ih “haw” ti hman ringring cu a nin um tuk ngai fawn si. Kan rualvah cun kan hni kan khek derdo pan lo maw! Cicin cun, “Didim, dai kan va leng ta pei cu. Cule khatawk ah kan va cei-aw ding. Kei inn ah ka cei-aw ta lo hokhaw” i ti cun keikhal ka rak lungkim ve mai.

Dailennak inn sangka kan von on veten ka hnarin thilrim pakhat a hawp. Cuih thilrim ratnak lam cu ka hnarin a hei zawt vivo. Cule, ka kaa cun, “Cicin, ka hnar hi a ‘tho aa’ si pang kem maw?” tiin ka hei sut. Cicin cu Ek-inn sungin ti thluaithlo’n, “Hnar tho aa tivek ka thei dah lo. Ziangah maw?” i hon ti. “Khaini rim ka thei ih cunah” ka von ti cun dai ziarzi teih thlalang rak bihaw rerotu fala pakhat in ka zum ban lo takin, “Keimah ka hmawm. Na duh ve maw?” i ron ti cuh!!!!! Ka thawpi ka hon suah hlunhlo! Ka lungtur a hong rang ciamco! Thildang hmuahhmuah hnakin Khaini hi ka ngai bik. Ka ngai kuahko rori si ko! Cucun ka hmai a hong eng pumpoih a lam cu ka hei naih vivo. A Khaini duur sin cu a von ongih i rak pek. Keikhal ziangdang hnakin khuitawk in ka ngah thei ve ding tithu ka hon sut cih. Anih cun hitawk cityhall ih a um thu i sim.

Cicin a hmai a hon cei taktak cuh! “Hollywood actress pawl teh ziang ce!” ti simai. Inn lenglam ah cun kan hon suakih Cicin cun, “Khuitawk ah maw Khaini a um an ti?” i sut ve cih mai. “Shwe-Oo” dawr cu kan hei pan teuhto. Ka ruat ban lo! Duurkhat ah $4 rori an ngen. Ziangdang hnakih ka duhmi a si fawn si. Cicin thawn, “thlakhat veikhat lawng kan suak thei fawn, duurkhat lawng cun thlakhat in daih zik lo” tiin duurhnih veve kan la.
Zaanlam a kim cun kan khawm. A cuih khawm sung nazi pahnih thum kar sung khal ka kaa cun khaini a hlam tuk man. Cutiin thlakhat ah duurhnih cu ka ttheh vuahvo ringring mai. Zing ka tho veten Bible siar hnakin Khaini in ka kaa a luahkhat lohli. Rawl ka khawh veten ‘A-sa-ci’ tiin Khaini cu ka hmawm lala fawn. Khaini hmawm phahin korea film feeling takih von zoh betbet tla cu a kaihdaan a mak!

Tucun kumthum lenglo a rak luan ta! Kumthum.sungih ka Khaini man ah $300 leng a kai. 2011 kum sung hrangih missionary hrang ka pekmi ka von zoh. $50 lawng a si. 2012 khal ttum cuang lo kai cuang lo $50 berber. Khaini ka hmawm ruangih ka ngahmi;
Ka thluak a kim nawn lo. Tuletu thu ka hngilh cingcing.
Ka phurhsam an na. (Ziangahtile nunau nau-inn a siatter tuk!)
ka bang ringring. Ka tha i zoi!
Ka hmai an dum(dup) thluh. An bol thluh.

Hmmm!!!! Ruro raro dah! Khawmcaan thawhhlawm ka pekmi ka von zohsal. Khaini duur hnih ka leinak $8 a siih $10 ka pek hnuih in change salmi $2 hi ka pek tam bik! Tawk rori seh!

Maw nang khaini, thildang hmuahhmuah aiih ka duhmi na rak si dah ko nan a tu ahcun na ai ih thilttha tuah ding ka thei thlang. Nangmah leinak ih ka hman ttheumi paisa cun ramthim/ramthar hrangah hna an ttuan thlang ding. Feh thlang ko aw. Atu rori in feh liam aw. Ka kaa hi na hrang ah hmun a um nawn lo!!!!!!

Peh vivo lai ding……..

January 29, 2013 (FCFSingapore group ih rak ngan dahmi)
By – Mai Daidim

(Visited 229 times, 1 visits today)

Comments

comments

Comments

%d bloggers like this: