Na fale pawl in an lo sut ding

Na Fale pawl in An lo Sut ding

Siar:

Suah. 12:13-17, 25-27

Nan faate pawl in, hiti ih kan hman daan hi ziang tican so a si? tiah an lo sut asile,
nannih in, Bawipa hnenih pekmi Lantak raithawinak a si… nan ti pei. – Suah. 12:26-27

Kumkhat Sung Baibal:

2 Peter 1-3

Thufim 16:22-23

Judah thuanthu ah a thupibikmi cu Izip sal ihsin Pathian in a luatter hngainak thu a si. Izip ram an suahsan ding zaan ah Lantak puai tuah dingin thupek an si. Izip mi pawl parih thutthennak ah Pathian in an fapatir a thihter dingih Israel pawl cu an sangka tlunlam tlangah tuufa thiisen an hnih dingih cuti vekih hnihmi inn pawl cu thihnak in a luatter ding (Suah. 12).

Hih thutthennak le zaangfahnak hngilh lonak dingah Pathian ih milai pawl in Lantak puai tuah ding a si. Ni khatkhat ah an fale pawl in, “Ziangtinak san a si?” tiah an sut leh dingih cutikah Pathian ih rundamnak le an suah-lannak thu an sim saal ding. Pathian in a ruunsuah hngainak thuanthu maksak hi sankhat ih hloral ta men ding a siang lo.

Kan fale pawl in kan tuahmi, kan nun daan, kan thlacam le kan thutthen daan, kan Baibal siar, le Pathian kan biakkhawmnak thu pawl in sut tikah kan simfiang a ttul. Jesuh dungthluntu kan si ih Amah cu kan Lantak puai ih thahmi Tuu fano a si ti kan sim a ttul. A thiisen cu kan nunnak a si. Sal kan si nawn lo, vancungram ih kumkhua nunnak hrangah zalenzet ih ttuantu ding kan si.
Nauhak pawl ziang thu so na zirh ding?

Maw Bawipa, duhdawtnak ih na tuahmi a maksak,

Na ttuan suahmi in a sim fiang;

A ralai dingmi santhar khal ah,

Na hmin sunglawinak dingah ruahsannak umseh!

Nu le pa ih nun daan cu faale pawl ih nun daan ding lamhmuhtu a si.

Comments

comments

Comments

%d bloggers like this: