N. Thayakone Qhal Tlawng ah LZP Hminin

N. Thayakone Qhal Tlawng ah LZP Hminin
(Feature – Thuthang Cahram)

JC Kip Ling

N. Thayagone
Thayakone Sakta in LZP Branch hminih on mi qhal tlawng cu, May 8,
2014(Thursday) ni ah Central Lairawn Zirsang Pawlkom hruaitupawl le
zatlang hruaitupawlin an va vehvai a si.
Central LZP President Salai Mang No Zik, Secretary Salai Van Thawng
Thang, Treasurer Mai Biak Za Nuam Mawi, EC sungtel Salai Cung Lian Uk,
cun, Chin media a simi The Chin Voice ihsin Salai C. Thian Lian Thang
le Nunthuleng Lalnu tiih kan theih lar mi Mai Sokhlei Par tipawl an
tel. Kei khal ka tel maw, inntek lam deuh ha ka si, ka fiang lo.
Central LZP ah Journalist Secretary ka quan laifang a siih, Qhaltlawng
zirhtu lakah (a hmin a thangin) ka tel ve fawn.
Salai Mang No Zik ih mawqaw thawn zinglam 9:15 ah N. Thayakone ih
Salai Uk Uk tei’ inn an ra thleng. Khuallian ding ka si hmang nan,
zing deuhih rak thlen manah, thuthang cahram ding hrang facts ka rak
la ciamciam ih, khualhmuak ka rak quan riangri panteh.
Tlawnginn ah kan feh cih ih nauhak zate’n class room pakhat ah
hmeltheihawknak le thucahnak kan nei fingfing. Group thlazuk kan zuk
qhehin, Salai Uk Uk tei’ inn ah NGF ih timtuahmi thawithawh kan
hilkhawm.
GCEC Tlawng ih CAM kan kom ni ah, N. Thayakone LZP hotupawl ih in sim
vete’n ‘Kei tla ka zirh thei zawng a um ahcun nihlawh ka thawh ve duh’
tiah ka sim hai. Cu ngaingai in, Uk Uk in ‘Monday ihsin Wednesday
tiang siimlam nazi 1 ihsin 3 tiang Laica class kha kan lo pe’ tiah
phone in i run sim. Thatho zetin ka va zirh ve.
Thayakone Sakta(N. Thayakone) qhal tlawng ahhin Phun 3 ihsin Phun 8
tiang an zirhih, Laica, Mathematics, English Textbook le Grammar
tipawl zirh an si. A tawlreltu cu New Generation Fellowship(NGF) an
si.
Thusim lai
“NGF hi Lairawn Zirsang Pawlkom-N. Thayakone Branch kan si ko” tiah an
hotu Salai Thian Biak Sang cun a rel.
A zirtu tlawngta dinhmun khal an qhahnem zet. Phun 3 ah tlawngta mi
49, Phun 4 mi 40, Phun 5 mi 23, Phun 6 mi 25, Phun 7 mi 22, Phun 8 mi
10; an zate komin tlawngta mi 169 an si. Zinglam 10:00 ihsin siimlam
3:00 tiang an kai. Sundir 12:00 le 1:00 karlak cu suncaw ei caan cawlh
a siih, nikhat ah period 4 an zir ngah tinak a si. Class pakhat ah
zirhtu mi 3 vivo an um. A zirhtu zate hin NGF(LZP) member hlirte an
siih nihlawh man la loih zirh an si thluh.
Hihlawh man an lak loih hleiah cangannak thilri le qulsam mi thilpawl
cu NGF fund ihsin an hmangsuak. Nihlawh thawhih zirhtupawl cu- (1)
Salai Thian Biak Sang (2) Salai Raang Aung (3) Salai Suh Lian Uk (4)
Mai Mang Nun Mawi (5) Salai Van Sui Lian (6) Salai Thang Za Piang (7)
Salai Thawm Lian Uk (Uk Uk) (8) Salai No Lian Thang (9) Mai Ram Nei
Mawi (10) Mai Thian Nei Par (11) Salai Lal Nei Thang (12) Mai Zi Uk
Thiang (13) Mai Sut Za Len (14) Mai Piang Nun Sung (15) Mai Khrih Nem
Thiang (16) Mai Mary Thiang (17) Mai Ang Nun Mawi (18) Salai Jesse
Penn-Lewis (cangantu) tipawl an si.
Central LZP President dinhmun in, “Laimi kan sinak kengtu kan thu le
hla, kan qong rori nan u le in an lo zirh hi nan vanqha tul. Khaw
qhangso bikpawl nan si,” tiah tlawngtapawl tha a pe.
“Mai’ sumhawlnak le poihai tanta ih rak huaihot le tawlrel theitupawl,
an lungrualnak le taimaknak hi ka upat zet a si,” tiah a rel fawn.
LZP Secretary Salai Van Thawng Thang khalin, “Hmailam caanih hruaitu
ding naulepawl mihlawh le thazaang pe ih a zirhtupawl ka lo upat.
Kannih sanlai ahcun Phun 5 lawngah Laica kan zir ngah fang, nannih cu
nan vanqha zet,” tiah a rel fawn.
Tuiqum an qhaltlawng on ding hi khawbawi, khawnu khawpa le khawtlang
khalin tha an pekih hleiah, an tlawng sayagyi Pu Khai Khan Thawng
khalin tlawnginn hman a siansak ih, Laica Siar Bu khal zalen zetih an
zirh theinak dingah NGF kutah a ret a si.
Mai Sokhlei Par cun, “Lai qong, Laica thiam cu mi hleice nan si. Mah
le qong, ca neimi miphun kan si….” tiah thazaang peknak a nei.
(Tlawngta zate’n a hmin(Mai Sokhlei Par ti cu) a salter leuhleuh fawn
…. capohnak men si)
Tualsung LZP sungtel Mai Piang Za Nem khalin, “Hivek hi kan khua ah
kan tuah voikhatnak a siih, ka sungkhat naule rori khal an kai. Qhal
caan awl ah an zir ding mi ca le Laica kan rak zirh cia tikah fur ih
tlawng an kai tikah an thiam cia ding. Tlawngkai hiarnak khal a pe
ding tiah ka zum,” ti’n a hmuhdan a rel.
Qhal Tlawngcawlh hi Chinmi nauhak siseh, nu le pa tamsawn in siseh,
umlak men ding ta rori ah kan rak ruat ringring dah. Vate pel,
cawkhalh, saihlum hrual, nuamtawlih tawihvahnak vialah hman a rak si
qheu. Santhar ahcun mannei ih hman hna kan thiam thok vivo thlang hi a
lungawi um.
Nauhak pawl
“N. Thayakone khua hi kan sehvel Laimi khua lakah cun Qhal awllen caan
hmang thiambik khua ti’n ka lo hmu. Solfa Camp nan tuah, Training le
qhansohnak a phunphun nan tawlrel thei. A kaitu khal nan qhahnem thei
zet,” tiah ka rel hngehnge.
NGF ih an President Salai Thian Biak Sang vethung cun, “Kan tumtah
tluk cun kan hlawhtling thei lo a si hi. A zirhtu lamah cun kan man lo
cingin kan pumpe thei ko nan, khawsung ih biaknak lam program in caan
in long tam tuk tikah, nauhak an zulzun thluh. An thiam ding zat khal
an thiam man lo,” tiah seherh zetin a rel.
“Hitivek ih kawhhran lam program- solfa training, crusade, camping,
khawmpi zawh le thuzir, tivekin caan in long tamtuk ding cun hnakum
lam teh ziang le bang kung maw?” tiah a beidong thu a rel ve.
Fimzirnak lamzin a zawh rero lai mi Laimi tlawngta tamsawn cu biaknak
lam cangvaihnakin ziangmawzat cu a hnukfual tiih hmutu an tam zet
thlang ngai. Fimzir le kutthiam tintian zir hi Pathian duhzawng a si
ti hi kan fiang vivo a qul fawn.
Biaknak lam le kawhhran ih on mi si lo, zatlang pawlkom ih tuah mi
program hi democratic zatlang nunah kan cinsoh ding thil khal a si.
“Kei ka rak hmuh dahmi cu kawhhran ih on mi qhaltlawng vial a si.
Hivekin zatlang pawlkom tuahmi, nauhalpawl khal suncaw fun fekfo ih
kai ka hmu cu, ka hmulthi a ding rori thei” tiah Mai Sokhlei Par in
diriam zetin a rel.
Cazir
Salai Van Thawng Thang (Thawng Thawng) khalin, “Kawhhran pakhat khat a
si lomi khawtlang huap pawlkom ih tuah mi a si tikah mitmei kil ding
khal a um loih nuam ka ti zet,” tiah comment a pe fawn.
LZP hminih Qhal Tlawng ong thei hi an tam lo zet. Haikhawl Branch in
an rak ong dah ih khaw hnihkhat ah a ong thei an rak um dah ti fang a
si. Lairawn Chinmi lakih rinsan um zet khua a simi N. Thayakone LZP
Branch hminin thungaithlak ih an ong thei hi zohqhimtlak zet an si.
Innkhi 300 qha um mi N. Thayakone khua ahhin LZP member 140 tluk an
um. (LZP member timi cu Phunhra ong pohpoh, Phunhra ong loih Bible
tlawng kai an si le, Bechalor Degree pakhat khat an ngah ihsin LZP
member an si. LZP member sinak hi damsung daih a si.) N. Thayakone
zirsang pawlkom a si mi, New Generation Fellowship hi …… kum ah a
rak ding thokih, Lairawn Zirsang Pawlkom Branch lakih rinsan zet mi
Branch an si.

Photo Credit => Mai Sokhlei Par & Thawng Thawng Ray Facebook Timeline

Comments

comments

Comments

%d bloggers like this: