Myanmar Rampi Ralkap In An Uk Sal Men Thei!!

Myanmar rampi ralkap le tlangpar hriamkai pawl doawknak cun rehlam a pan theilo. Tlangpar hriamkai pawl in Shan ram saklam ramri tiang an la zo tiah tuini thuthang ah theih a siih, rampi ralkap in hi hmun ah rampi ralbuai thuruangih lakhruak (emergency) an puang ih rampi ih daihnak a um sin theinak ding hrang ralkap uknak tinung le ding thu khal an rel tiah theih a si.

Myanmar rampi daan hrampi ih an rak ngan khum mi cu sirhsan in ralkap hotu Chief Snr-Gen Min Aung Hlaing cun, Myanmar rampiih buainak a sosangnak hmun Shan ramkulh saklam le Myanmar ram thlanglam ih Muslim buainak thu ruangah rampi uknak ih daihnak a um sin theinak dingah karkhat hnu karkhat ralkap in hmalaknak kan neih khal a tul vivo men thei tiin rampi daan hrampi Bung -XI nak ta cu sirhsan in veihnih lai a relsuak zo.

Shan ram saklam ih doawknak ah Myanmar ralkap dinhmun hi a that lo sawn vekin a lang ih tlangpar hriamkai pawl in rampi ralkap pawl ih hriamhrei pawl tla an laksak vivo tiin Northern Alliance-Burma facebook pawl ih video an tar mi ahcun a lang.

Hi doawknak a luarsinnak le tlangpar hriamkai pawl an cak sinnak san cu November 20 ni ihsin tlangpar hriamkai pawl hmunkhat ih an funtomawknak ruangah a si tiin Irrawaddy thuthang cun a ngan. Myanmar ralkap dodingih funtom awtu ralkap pawl cu Kachin Independence Army (KIA),  Arakan Army (AA), Myanmar National Democratic Alliance Army (MNDAA), le Ta’ang National Liberation Army (TNLA) pawl an si.

Myanmar ralkap lam ihsin Burma Air Force tiangin an hmang thok thlang ih ziangvek in do awknak hi a suak vivo ding tihi theih a si hrihlo ih ziangtluk tiang a rei peh vivo ding tikhal theih a si lo.

Hi tiih doawknak a suah rero ruangah Rohingya miphun tiih kawh mi Muslim sakhuanak thluntu le Myanmar ramsungih daan pahbal, covo neilo pawl in harsatnak namen lo an rak tuar. Myanmar ralkap bawi inn ih bomb puahtu khal an mah an si tiih puhnak le misual an kaih mi khal Muslim mi a si tiih thuthang um mi cun Myanmar rampiih mipi zalennak cu a hnin deuh in a lang a si.

Ref: Mizzima, Irrawaddy, Myanmar Times, Agencies

 

Comments

comments

Comments

%d bloggers like this: