Myanmar Rampi Hi Thinphan  Za A Va Si Thang Em!!

_92577906_e3b5015a-4fbb-4b90-ad06-702fa82353ca

Salai V Bawi Lian

Myanmar rampi thuthangsuak mi pawl zoh rero tikah rampi thansohnak le hmasawnnak mal tete a um rualrual in tulai ih mipi pawl ih an/kan ngaihven bik mi cu Yangoon ih bomb puak, Rakhine, Shan ram ih buainak le Rohingya miphun pawl ih dinhmun pawl a si ko ding ti a zum um.

NLD in rampi hrilawknak ih nehnak an co theinak dingah, thlengawknak kan tuah ding tiin nasa ngaiten an aupi. Ni 100 tumtahnak titla an tuah ih, rampi thianfainak tiin hnawm khal an sar ciamco. Sumtuahnak thu ah le thuhla dangdang tete pawl khalah thlengdanglamnak cu a um ko ding. Cun thupi zetih mipi lemsawmnak ih an ausuah pi mi a dang leh cu, daan felfai thawn mipi parih lairelnak um ding tipawl a rak si.

Asinan lalnak a co ihsi kumkhat a kim hlanih, ramsung buainak suakmi pawl zoh tikah ramsung mipi pawl thinphang in in tuah thlang a si lo sawm! ti ding cu a awm ve thlang in a lang. Ralkap pawl ih leknak neh theilo Party NLD ti hmin an ngah zik thlang lo maw!!

Myanmar rampi ih kan khawlipi, mipi million nga lenglo kan umkhawmnak Rangoon rori ah ṭihnung thilpuak zarhhnih sungah hmun li rori ah a thleng. Culawng men siloin Rangoon Intenational Airport Terminal 1 ah buak thei mi tuizarh tlawngkai  nihnih niah an kai. Rangoon ih thilpuak mi pawl cun mipi thihnak le hliam na cu a pe lo nan, thinlung hliam le mangbangnak, tihphannak a tisuak vivo.

NLD party pawl in a mipi sahimnak hi a tawlrel thei ngaingai lo ding ti phan a va um thlang em! Mipi pawl hnenah ziangruangah Rangoon ah bomb a puak, Rakhine, Shan ram le Rohingya thupawl hi, ralkap sanlaiih an namnuai vekin a culmaam tum men teh a si pei maw! Kan ram hi tui dinhmun vek cun duh zalen ih um huahhingamnak a si nawn lo in a lang a si.

Party fate pawl in NLD party ih an tuahngahlo mi pawl dokalh in rampi ih zalennak dinhram hnget dingin an rak sawh ngam ve lo mi pawl teh ralkap pawl ih leknak sungah kan tang thluh sal ding tinak ih hminsinnak langsung mi pawl a si sual pang maw!

Kan duhdawtmi Pathian ih in pek mi kan ram Myanmar ram piih hmakhua hi thinhar za in a khat vivo. NLD party pawl in rampi daihnak an kilhim thei lo ahcun ralkap pawl in langhngan zetin mipi pawl kum 60 leng in rawtneknak hnuai ah kan tla sal ding ti khal hi thinphan zazet a si.

Ziang tin NLD in a ram mipi sahimnak ah hmalaknak an tuah vivo pei! Kan ram piih a kekar dan hi acozah in in uk dan hi thinphan za a va si thlang em!!#

(Visited 415 times, 1 visits today)

Comments

comments

Comments

%d bloggers like this: