Myanmar KG- Zirlaibu Tuahnak Hrang Chin Mi Palai 11 Tel; 2015 Ah Hmanthei Ding Tum?

This slideshow requires JavaScript.

Van Bawi Lian
Chinland Today Media

Department of Education Planning & Training pawl ih hohatnak ihsi Early Childhood and Development pawl cun kan rampiih fimzirnak tlawng le nauhak dinhmun pawl thleng danglam dingin ramhrin miphun pawl thawn zirlai bu pawl reltlangnak July 21-24 tiang ni li sung an nei. Chin mi aiawh in mi pa 11 an telve.

Kan ram ih nauhak tlawng zirh dan phung, phuhrek ihsin phun hra tiang thleng danglam a si theinak ding hrang a hleice in KG zirlaibu tuahnak neih a siih, 2015 kum ihsin hman thok thei ding ruahsannak khal an nei.

“A hlan ih kan rak neih ṭheu mi phun 0-4, Primary, phun 5-8, Middle le phun 9-10 high school ih tiih kai ṭheu mi pawl cu KG – 5, primary, 6-9 Middle, 10 – 12 Higher secondary tiih kawh a si theinak ding ruahsannak a um” tiin ṭuanvo neitu le rampi aiawh ih zirlaibu thuneitu Dr. Myint Thein cun a sim.

Hi workshop ah kan ram ih ramhrin miphun ihsin panga (5) cio sawm an siih, Chin mi aiawh in mi paruk (11) an feh ih, Chin (Falam) le Chin (Hakha, Thantlang) aiawh in mi (5) pawl an feh. Chin (Falam) aiawh ih fehtu pawl tla cuRev. Khar Thuan, Jesse Penn-Lewis, Siang Lian Uk, Lincoln Bil le anupi MaMa Kyi le, Salai Zar Zo Lian (Joete) pawl an tel.

Rev. Khar Thuan, Chiangmai University ihsi Linguistisc ih master degree ngah mi a siih Linguist expert dinhmun ih a hleiceih an ko mi a si. Lincoln Bil le a nupi Mama Kyi te pahnih khal Early Childhood Development ih ṭuan an sinak ihsin an koh mi a siih, Jesse Penn-Lewis, Siang Lian Uk (Kianghrol), Joete pawl hi tualleng bezai le tualleng hla, thuanthu ngantu ding, dinhmun ih an koh mi a si.

‘A thok thurelkhawmnak ding tiih in ko lai ahcun mai tapi ṭong cio ih KG zirlai bu tuah ding ti a sinan, thurelkhawmnak kan vun neihngaingaih ahcun rampum huap ih pompi mi KG zirlai bu tuah ding tilam in an thu an her sal. Asinan kan Chin ca le kan nunphung le thuanthu pawl tahfung sung ih lut thei dingih kan vatel ve hrimhrim hi a sunglawi zet’ tiin Jesse cun CT a sim.

‘Ramhrin miphun palaipawl in thuhla kan rak theihdan le a hmun ih in hoha dan ah thu umdan a fel lo deuh lawk ih ni hnih cu kan buai deuh. Asinan a neta ni hnih cu kan tluang. Vei tam zet tonawk khawm a ṭul lai mi a si ih thin saute’n tawlrel a ṭul. Tu hi cu a hram thoknak lawng rori a si lai tikah a rahsuah kan hmuh taktaknak ding cu a rei lai ding. Fimthiamnak lam thil hi cu ralringtei’ tuah ṭul a si tikah zamran ngai a har a si’ tiah Siang Lian Uk (Kianghrol) cun CT a sim.

‘Nan mai tappi ṭong nan hmang lo ding tinak a silo, nehhnu ah nuam tete in a her vivo dingih, rem cang a um tengteng ding ti kan lo tiam ngam a si tiin kan ram pum huap nauhak zirlaibu tawlrelnak ih thuneitu sangbik Dr Myint Thein le an kuthnui ih KG zirlai bu hrang ih tawlreltu le ṭuanvo neitubik, Kawlram Nunau Pawlkom ih hotu Dr. Khin Myoe Myint Kyaw (Deputy Director General, Department of Educational Planning and Training) (Leader, Pre-school Education Group)(Chairman, KG Curriculum Team) cun in tiam rero ta’ titla in Jesse cun a sim.

Lairawn ih resource person dangdang sawm betin mai’ tappi ṭong rori ih a bu sualsuah  a si theinak ding hrang, August thla sungah hin workshop tuah peh an tum thu khal theih a si.

‘Tu ih kan ṭuan thok dan vek a si le a sawt lo nasa ih daan le dun vek a rak tam hnuaihni tikah kan Lai Nunphung Thuanthupawl tla an tling lo in ti sak cingcing. A thar paka rori ih thuanthu pol cop a ṭul. Zero Draft vial a si laiih, 2015 ahcun kan hman man cu ka zum lemlo’ tiah Jesse cun a hmuhdan a rel.#

 

(Visited 395 times, 1 visits today)

Comments

comments

Comments

%d bloggers like this: