Myanmar Ih Islam Tlawng Pahnih Hramhram In Kharsak

Myanmar khawpi Rangoon ih Islam pawl ih neih mi tlawng pahnih cu acozah ih siannak thawn onmin a silo tiih puhnak thawn Phungki burpi pawlkom pakhat in kan dung zarh tlawngkai ninga ni ah an kharsak.

Tui an kharsak mi tlawng hi Madrasas pawl ih neih mi Islam tlawng a siih Yangoon khawmpi, Thaketa Township, Anawmar 11 le 12 lampi pariih um mi an si.

Hi tawk kiangkap hi Muslim pawl ih biak inn tumzet umnak hmun a si. Inn pi an kharsak laifang ih video zuktu le thuthang latu pawl khal an hro ih a kiangkap ah luh vah khal sian mi le sian lo mi an nei. An tlawnginn pi hi khar dingin a cozah ih thupek ngaingai a um le um lo hi a fiang lo nan, mihrek cun Titoih puai thluh vete ih khar dingin an rak sim mi a si tiih titu tla cu an um.

Buddhist Nation Group pawl cun tlawngkai ninga tlailam ah hitawk hmun ah mi 50 lenglo pungkhawm in tlawng inn pi hi hramhra in an kharsak. Buainak pawl a sosang sinsin lonak dingah tiin tucu palik 100 lenglo pawl in hi hmun hi an kil.

An buai rero laiah NLD ih daanthiam Dr. Wai Phyo Aung khal a hmun ah a um nan thulehnak fumfe ngai sim ding theiloin a um. Nehhnu ah thuletnak kan tuah leh ding tiin a ti ko nan tutiang zianghman thuthar a um hrih lo.

Hi Islam sakhua biaknak thawi pehpar mi tlawng pahnih an khar mi ruangah kiangkap Muslim pawl in buainak dang a kaikang vivo bet ding ti an phang zet.#

Comments

comments

Comments

%d bloggers like this: