Myanmar Hrilawknak le President Hrildan

12208458_871157366335745_154352289698864613_n

Myanmar ram sungah vote thlak rero lai a si. President U Thein Sein, Vice-President Sai Mauk Kham le Commander-in-Chief Senior General Min Aung Hlaing cun mipi hriltlinmi parah an lung a kim thu an rel. Thura Shwe Mann le rampi hotu pawl hi mipi lakah dan-sii in mee an ra thlak ve ih Kawlram boruak ih thil danglam zet pakhat a si. Pu Than Shwe tei’ sungkua cu an inn ah mee tlaknak an va tuahsak ih an tupa meethlak lai zuk thawn thuthang ah hmuh ding a um.

Himi hrilawknak ṭheh hnu ah zozo khalih an neh asilen, Pyidaungsu Hluttaw in President hril ding a si. NLD ih an neh asilen, “President tlunin hohanak ka nei ding.” tiih NLD hotu Daw Aung San Suu Kyi thusimmi thawn pehparaw in ramsung ramleng ah theithiam lo an rak tam zet. A sim duhsan theihthiam ding cun Myanmar Consitution ih President hrildan theihthiam a ṭul zet ding. Constitution Article 59 (f) ah ramdangmi sinak nei sungkua neitu cu President or Vice-President ah hril theih a si lo timi ruangah Daw Aung San Suu Kyi cu President & Vice-President sinak a nei thei lo.

Mipi in NLD an duh timi cu Daw Suu Kyi an duh ruangah a si. Mipi ih theih duhmi khal, President or Vice-President a ṭuan thei ding fawn lo ih cozah din thei hai sehla ziangvek dinhmun in cozah a hoha ding timi a si. Mipi theih duhmi felfai puppo in a sim lawlaw tinak a si. NLD in cozah an din thei ahcun NLD ih dinmi cozah cu NLD party policy sungih ṭuanrel ding asiih, NLD Chairperson len Daw Suu Kyi a si ruangah a simmi a dik lonak pakhat hman a um lo. Daan thawn khalin a kalhawknak a um lo.

President hrildan cu hitin a si:
Pyithu Hluttaw in Vice-President nominee pakhat
Amyotha Hluttaw in Vice-President nominee pakhat
Ralkap pawl in Vice-President nominee pakhat, tiin mi pathum nominate ding a si.

Pyidaungsu Hluttaw sungah mee an thlak dingih, mee ngah tambik in President sinak a ngah ding. Adang pahnih cu Vice-President (1) & Vice-President (2) tiin ṭuanvo pek thotho ding an si. Hluttaw MP 664 lak ihsin a hrek (eg 333 MP) hnakih nei tam party or party komaw pawl in President & Vice-President sinak an co ding. Duh khal len duh lo khal len ralkap in Vice-President pakhat a nei ding tinak a si.

© Steven R Sunthang, Nov 8, 2015.

Comments

comments

Comments

%d bloggers like this: