Myanmar Got Talent Hi Chin Mino Pawl Hrang Hmunṭha A Si

11295619_346063538897658_1896294437190240622_n

Van Bawi Lian

Ram ṭhangso mino pawl ih a thehlarawknak le an thiamnak an pholangnak hmun ṭhazet pakhat a si mi cu rampi huap ih zuamawknak ih telnak ihsin a si ṭheu. Hivek zuamawknak hi kum tin veikhat an tuah ṭheu ih cumi ah leitlun rampi theih roriin an hmin an lar cih phah ṭheu. Mino tam zet ih kan theih lar mi Justin Bieber, One Direction pawl khal hivek ihsi ra larso mi an si. An mah lo mi dangdang khal rel ding an um konan hi te pahnih hi mino pawl ih duh hleice filor an si.

Kan ram pi khal a ṭhangso vivo ih mipi zalennak famkim ngai ngah thei ding, din hmun cu kan si hrihlonan, mipi zalennak rimnam thlarua kiangkap ah, mino thazaang peknak, somdawlnak le khaisangnak thil khal tampi a tuah thok hrethro. A hlan ih mipi pawl ih an rak theih lar dah lemlo mi khal santiluan IT ruangah, Facebook, online le a dangdang ihsin theihlarnak le cawisanawknak tampi a um.

Tui zing Youtube ka zoh ih Myanmar Got Talent rinlo piin ka kau ngah. Ka caan heu lakmen tiin ka bansan zik nan, Chin mi tla an um pangah tiin ka bih vivo. Roland timi Tahan ihsi tel pakhat a rak um cu ka va hmu ngaingai. Zovek mi a si ti cekci cu ka thei lo nan a hmaisabik ah ‘You Raise Me Up’ ti mi hla a sak. Ka rak lungawi pi tuk ih a dang a saknak pawl khal ka va hawl vivo. Episode 8 khalah a sak sal. 2014 lai tal a si ti ka thei sal ih, ka khawtlai deuh nan hipa hi ka uar zet ih Chin mino pawl ih zoh ton tlak zet a si khalin ka thei.

Mino pawl hivek rampi zuamawnak ah kan aw ṭhatnak, ka kutzungthiamnak, ka talent pawl pholang cio uh tiin thazaang ka pe aw duh zet. Cuvek ih thazaang pek awk tik ah mihretkhat cun ningzah thlak tiih rak ruat tu tla kan rak um men thei. Kan lai khawte ihsin hlasak thiam, aw ṭha pawl kan Chin mi lakah ziangzat an um ding ti kan theilo. Rampi hmaiah kan phosuah awk theive a ṭul a si. CD tuah sehla Kawl pawl le hnamdang pawl in, in leisak lo ding. Asinan rampi ih zuamawknak kan telnak ih kan hlawhtlin nak ihsi cun, Leitlun ramdang huap ih theihlar kan silo hmanah, Myanmar rampi huap ih mi theih le hminnei kan siphah thei ding a si. Cucu kan kut sungih um kan tuah thei ve mi a si.

British Got Talent ih teltu Susan Boyle khal a kum 40 kim zik lawngah sikha, leitlun mipi pawl in a hlasak thiam zia an rak theih thei. Curuangah hivek ih tel hi ningzak lamah lak loin tel theitu pawl hrangah tel dingin zuam cio uh tiah thazaang ka pek aw duh zet a si.

X Factor, ….Got Talent, The Voice le a dangdang, mirang pawl tuah mi bang ih sang le lar vek ciamco ava silo hmanah rampi huap ih zuamawknak a si mi, Ein Met Sone Ya, Myanmar Got Talent le a dangdang pawl ah rak tel cio uh. Chin mino pawl hi Myanmar mino lakah a nautabik kan si ce lo a si.

Mi hrekkhat cun ṭong thiamlo ruangah kan thanau men thei? Asinan Chin mino pawl in kan theih dingmi thupi zet cu, Myanmar rampi hi kan ram a si. Kan ṭong hman mihi Myanmar ram ṭong pakhat a si ve. Curuangah thinnau ding a um lo. Curuangah Myanmar ram, kan ram ah hin Mino pawl in kan talent pawl hi ret lak men lo in pholang cio uhsi. Myanmar Got Talent hi Chin Mino pawl hrangah hmun tha pakhat a si.

A telduhtu pawl hrangh himi link (http://foreverbectero.com/mmgottalent/register/register.php) ah rak lut cio uhla hmin khumnak rak nei uh. Chin mino parmawinak Myanmar ram piin thei vivo hram seh!!!#

Comments

comments

Comments

%d bloggers like this: