Muslim Buainak Ziangvek Asi Vivo?

Muslim duhlo zawngih zuknung tuahnak ruangah leiltun ramtin ih Muslim pawl cun an thinhengnak nasa zetin an tilang ih buainak na men lo an suahpi. Pakistan ram ahcun mani sun tlawngkai ninga ni tla cu zung hmuahmuah khar in um cawlh ni tiin acozah in a puang. Hi ni cu ‘Day of Love for the prohphet’ (Phofet duhdawt ni) ti roriin an puang ih mipi thinheng sosang ruangah mi 19 in an nun an can phah zo ih Libya ram ih US embasy an cim ih mithi thawn a zaten hi thu ruangih mi thi 49 an kim zo ih hliamtuar mi 200 lenglo an um zo.

US ihsin tuahmi zuknung “Innocence of Muslims.” timi internet ih an tlangzarh ihsi ni 10 sung ah Muslim ramtin Asia ihsin Middle East rampi cu a buai cih. A hleice in Pakistan ram, Muslim rampi ih buainak cu a nasa bik ih an khawpi Islamabad, le khawpi dang Lahore, Karachi le Peshawar pawl ah an sosang zet.

Hi tiih an buainak a sosang tuk ruangah rampi acozah cun a ramsung ih mobile biak awknak cu an khawpi hmun 15 pawl ah a khamsak ih a cawlter lawk. Hi tiih an buainak ruangah ah an prime minister Raja Pervaiz Ashraf cun leitlun ramtin pawl hnenah an profet hmin zahlo ih cangvaihnak le soiselnak pawl titawp dingin a rak ngen ve.

 Iraq, Sri Lankan, Bangladesh Ah Teh

Iraq khawpi Basra khalah hi zuknung duhlo langternak le French thuthang latu pawl ih an cazual ih an suahmi an profet soiselnak pawl duhlo langternak cu mi 3000 lenglo in an nei ih US thantar le Israel thantar tlun ah “profet soiseltu le dodal tupawl cu mawh kan phurh” tiin an ngan ih an ur kang ciamco. Sri Lankan khawpi Colombo khalah US thantar le President Obama milu zuk cu mi 2000 lenglo in urkangnak annei ve.

Bangladesh khawpi Dhaka ah khal mi 2000 lenglo pawl cu suak khawm in mithi kuang America thantar ihtuahmi cu urkang in an thinhengnak an rak ti langin an rak sosang ve. Hitiih zuknung ih buianak a sosang laiah French thuthang latu pawl ih an rak suahmi Mohammed zuk carton ih an tuahmi ruangah Iran pawl ih thinhengnak cu a sosang sinsin bet.

(Visited 182 times, 1 visits today)

Comments

comments

Comments

%d bloggers like this: