MP Pawl Hi Kan Soisel Siang Pei Maw? AW

Van Bawi Lian

Chinland Today Media ih neih mi Chinland Today Facebook Group ah Salai Van Kio in Kan MP pawl khui tawk ah nan um ṭheh timi a ngan. Mi 247 pawl in Like an pek ih mi 92 pawl in mak zetzet I an comment. An comment pawl zoh tikah ramkhel party tongpa ṭan ih ṭan lole hmuhnak bi le ruahnak kau lo zetzet khal a um. Awmang lo zet ih rak sut ih rak eltu khal an um. Hi tiih mipi lam ih ruahnak bangaw lo celcel lakah MP Pawl Hi Kan Soisel Siang Pei Maw? tiin kan MP pawl kan zoh dan, Media le news agencies, mipi pawl ih kan lungput um tu dan ding mallai tarlang sehla. Online Facebook ah a thupi lo tiih rak ruat tutla an um men ding. Asinan tulai online cu santiluan thawn a sihcihaw mi a sizo ruangah Online men tiding a si thei nawn lo a si.

Vankio ih a ngan mi cacu hitin a si “July ni 28 sun Laitlang le Kalay ti a lian rero ah ah Chin MP pawl le Sagaing CAM ih facebook wall cu hivek men a si.

July ni 28 ih wall update tu hi Sagaing CAM Pu No Than Kap a si ih a zuk tarmi cu nauhak pakhat hri fawkih tap rero khi si.

Ziang khal sisehla anmah mee rak thlak tlingtu mipi pawl an haiih kan um rero lai ah an wall ihsin khal in thlakung zonnak awkam pakhat khal kan hmu hai lo.

Cun Lairawn ih Chin Media pawl teh mipi hrang kan tuanvo kan ci maw.” tiin a tarlang. A zuk hmanmi pawl cu CAM Pu No Than Kap ih facebook wall, MP Khuang Ling ih facebook wall le MP Louis Zung Hlei Thang ih facebook wall pawl an si.

 

11800415_851115318276439_2345023773685802622_nMedia pakhat lole Journalist pakhat, asilole news agencies pakhatkhat hin, kan MP pawl ih hnaṭuan mi hnaṭuan lo mi, hnaṭuannak, an um dan pawl a sinak vek ih an ngan mi hi soisel a silo. An tuah diklo mi ah le an tuah sual mi pawl ah soiselnak tuahtu ding le mipi hnen ih thudik thantu ding khal Media a si. Hi pawl hi News Agencies, News Media le Journalists pawl ih ṭuanvo hrimhrim a si.

A na cang theilo Ramsung Media pawl khi seherhza ngaingai kan si sawn. Cuti a sile ziangruangah MP pawl lawng maw an thuhla kan ngaihven ding!! Silamlam lo, Chin mi vantlang ih thil cang mi pawl, diklonak ih lairel thutluknak, mimal canvo pahbal saknak le namneek awknak pawl khal a tarlang ding mi a si.

Ahleice in MP pawl cu rampi acozah ih thuhla thlentu ding le ausuaktu ding hrangih mipi pawl ih hril mi an si ruangah mipi auaw hmangin Media pawl in an nor ding mi hrimhrim khi a si. Hi tiih media ih a nor tikah a dik lo mi thawn an sinlonak pawl a puhhrim ahcun Media khal cawhkuan tertheih a si. Cucu daan asi. Kan dung nai teah President Thein Sein ih thuhla diklo ih an ngan ruangah thuthang cazual zohfeltu pahnih $ 800 veve an cawh. Cuvek in cawhkuan tu, kan ram sung media lawng siloin, leitlun Media tumbik AFP, AP, ABC le agencies dangdang pawl khal an kuan thotho. Himi ruangah Media Ethic  le a mawhphurhnak theifiang lo in thuhla zingzoinak hi zohmanin an tuah dahlo a si. Curuangah thuthang midang ih ngancia, mai ngan mi vekih rak latu hi rukru tiih an rak tinak khal cu a si. Mawhphurhnak nasa zet an liang parah a um ti a fiang a si.

11742633_851115571609747_538288827345315548_nHivek theihthiamlo dingin kum 50 leng, mai thu ih lalnak hmangin Ralkap in in rak ukbet silawm!! Tulai santhar mino pawl in cumi Media le news agencies, Journalist pawl ih an thacahnak theithiam lo ih kan rak um a si thotho ahcun, mi pakhat ih laknak, mai duhnak ih thurelnak, mipi bumnak pawl hi a thleng hrimhrim ding a si.

Media in online in asilole, cazual in a silole zuknung in lole, Radio in zalenzet ih a cangvaih thei le rampi roreltu pawl ih rorelnak le MP pawl ih hnaṭuannak khal a tluang in mipi hrangah zalennak a suak thei.

Ahleice in tui kan dinhmun vek; Tilian, Meikang, Inn lo lonsak awknak pawl tla hicun kan MP pawl ih ṭuanvo tumbik a si. Cucu mipi pawl ih kan hriltlinnak san khal a si. Mipi hiipnak tuah menmen ih thukam men hi a tawk lo. Tuvek caan ah rampi acozah hnin dingin an ausuak ding mi a si. Cuvek ih au suak theilo MP kan nei a si ahcun kan MP pawl cu  hrilawknak ah a ausuak thei ding ih kan zum mi le kan rinsan mi kan hril ding a si. Cucu mipi pawlih kan thuneihnak le kan canvo, kan huham a si.

Hi tiih ti tikah Media in a duhduh in MP le upa pawl a sawh ciamco ding tinak a silo. An tuah ding mi awm le an tuah ding mi hmangmawi pawl tuah hna thiamlo, hnaset an tun c247161_851115434943094_6024421081591686444_naan ah Media in mipi hnenah MP pawl cangvai dingin an hninter hrim ding mi a si.

Curuangah MP pawl le upa cungcuang deuh pawl Media ih a tham, angiar  tikah mipi pawl in a dik maw diklo tiin felfai ten kan zoh thiam ding hi a poimawh zet. Kan rak ṭan mi an si ahcun an tuah ṭhat mi pawl tarlang, pholang thei dingin media pawl sor hna le hman dan thiam ve in mipi lam khalin ṭan hmun kan rak khuar ve ding a si.

Hivek ih ṭuankhawm thei ding kan duh ruangah kan u le pawl in an sankhat cem in, an thisen le an nunnak pawl, Uktu tawhrot Ni Win san ihsin tui ni tiang mipi zalennak ding hrang an rak sual rero zo. Asinan mi pakhat lole mimal duh filor ruangih a diklo mi tiang kan pom ahcun Ni Win uknak ihsin kan au rero mi le kan sual tum rero mi, mipi zalennak famkim cu kan co thei dah lo ding a si. Kan MP pawl hi an sunglam ihsin kan nor ding hrimhrim mi a si. Curuangah mipi hrang hnaṭuantu ding ih kan hril mi an siih, rorel thuneihnak anneih vekin, mipi pawl khalin an parah ruahsannak le dingtluk lairelnak thawn kan ngiar ringring ding a si.#

(Visited 594 times, 1 visits today)

Comments

comments

Comments

%d bloggers like this: