Mizoram Ih LCF President Tuahmawh Aw

Laimi, in kan ram naibik ih ka tlawn sukso theunak bik, Mizoram a si. Cui Mizoram Khawpi Aizawl ah LCF cu a um ih, Laimi hrang, mangbang thlaphan can ih pan bik mi a si. Hi LCF hin, hnam, miphun a thliar dang cuang lo ih, Laimi pohpoh an tlemnak hmun a si hleiah, bawm tul mi bawmih, thih le hloh tiang khalih mawhphurhnak tum zet kai theu tu an si. Mawtaw a neiih, cui mawtaw cu, mi harsa le thih hloh tawngtu pawl Tio tiang a thlah theu.

Cumi thu thawn pehparin, LCF President tuan rero laitu, Pa Sa Lian Thio cu Falam ah FDC (Mizoram) le FSDA (Lairam) thawn meeting dingin Falam lam ah a tlawng. July 3 ahkhan PWD Minister thawn thurelkhawmnak an neih hnu ah, tui Rih zin laih thuhla thawn pehparin Minister cun, Peng 10 laihsak an si ding thu a sim. Hi lamzin laihnak ahhin, FSDA cun a laihnak JCB tuanvo a la ding tiih lungkimnak an nei.

Meeting an kai theh hnu ah, fala le tlangval pawl in, leh vahnak an neih sunsun zoh ih, an tlaksam zia theihpi dingih zohnak an nei. An zoh theh hnu ih an tlun lamah, Pathangkhan zin siatnak lai fang an thlen in, LCF, Aizawl President hin accident a tawng a si. Hmansehla, Mipi le kan Laimi pawl thlacamsak nak ruangah, a taksa siatsuah tuk lo ih a um cu a lungawi ti kan CT palai hnenah a sim.

A zaang le ke ruh mallai a ti na ih, hmansehla zoto ih umpi tlak ngai cu a si lo thu khal a sim bet. Himi a siatsuahawk hnu ahhin, Tahan ah an feh ih, cunah Pa Maung Ba (Yangon) in Hmuithla khumnak a rak neih sak. Mizoram ah 10.07.2012 ah a thleng ih, 12.07.2012 ahhin Aizawl LCF member pawl in Hmuithla khumnak, zanriah thawn tuah sak a si ding thu kan palai hnenah sim a si.

Rih zin an laih zo mi pawl hi, Rih, Khawthlir, Phunte le Saek pawl an siih, zin laih thuhla ahhin, mai duhnak hmunhmun laih a si lo ih, lamzin siatnak hmun deuh hril a si. Zin laihnak ahhin, a tlangpi in, Peng khat ah India Rs. 477000.00 hrawng cem a si. Laih zo mi hmuahhmuah hi, Peng 5.2 hrawng a si.

Comments

comments

Comments

%d bloggers like this: