Miropipawl Ih Bible An Ngainatdan

                                                          Timothy Sui Lian Mang

Thil ropi zetzet tuahsuaktu mihminthangpawl hi Pathian tel loin anmai thiamnak le titheinak men ih thil tisuak an si lozia le Bible an ngainatzia kan tarlang hnik pei.

  1. Isaac Newton (1642 – 1727): Sir Isaac Newton hi Scientist-pawl lakah a hminthang bikpawl a si. A thil hmuhsuak mipawl lakih larbik cu Lei Hipnak (gravity) hi a si. 1666 hrawngih a hmuhsuah mi a si. Isaac Newton hin Lei le Van hi Pathian sersiam rori si in a zum. Bible ngaina le siar ringring mi a si. Thil thar a hmuhsuak mipawl hmuahhmuah ih hrampi cu Bible a si ti thu amah in a phuangsuak. A kaihhnget mi Bible cang cu: Isa. 45:3, “Na hmin ih lo kotu Israel Pathian ka si ti na theih theinak dingah, thim lakih ropawl cu ka lo pe ding ih, hmun fianrial ih thuh mi sumpawl khal ka lo pe ding,” ti hi a si. Bible in thim lak le hmun  ih, fianrial ih thuh mi sum pek ding a tiamkam mi cu taima zetin a hawl ih, Pathian siannak in thil ṭangkai le hlu zetzet a hmusuak.
  1. Benjamin Franklin (1706 – 1790):  Benjamin Franklin hin hminthannak phun dangdang a nei. Cangan hminthang khal a si, Scientist a si fawn. Ramkhelnak lamih hminthang pakhat khal a si. Mipi hrangih hnaṭuansuaktu hminthang pakhat khal a si. Hi pai thuhla ngantu hrekkhat cun, “Amerikan mipi vantlang ṭhangsotertu hmaisa bik…(The first civilized American to the Apostle of modern times) ti tiangin an ngan. Calai lamah a ṭawngkam lar zet an simsawnsin ṭheu mi cu, “Ca namnak cet ha 26 in pe uhla, leitlun pumpi hi ka neh thluh ding,” tiih a ti mi hi a si. Amai san laiah paisa an hman mi hi thir paisa lawng a si ih, tangka note neih a ṭul ti ca a ngan ih, tangka note an run tuahsuak tariai.Ramkhelnak lamah a lut ih, British uknak hnuai ihsin Amerika ram dinsuahnak ah a cangvai nasa. Amerika dinsuahnak thuphuansuah(American Declaration of Independence) hi amai ngan mi a si.

British kut ihsin Amerika inn an tlei tikah hruaiawknak dan an tuah tikah nasa zetih elawknak a suak ih, an ṭhehfel thei lohli lo. Franklin cun cu laiih Amerika President hmaisabik George Washington hnenah a buainak thu ah Pathian rawn ding le pindan sungih dan tuahtupawl khal in ni khat ah vei khat tal thlacam dingin thurawn a pe. A ṭhumawknak Bible cang cu Sam 127:1, “Jehovah in inn a sak lo ah cun, Cui inn satupawl cun an uanbang lak men a si; Jehovah in khawpi a kil lo ah cun, A kiltupa cu a meng lak men a si,” ti hi a si.

  1. George Washington Carver (1864 – 1943): Carver hi Negro sungkua ihsin Missauri State ah 1864 ah a suak. Anauhak laiah Pathian thawi titithunuam an reldan cu amah in hitin a rel: Carver cun Pathian hnenah, “Leitlun hi ziang hrang bikah na sersiam,” tiah a sut ih, Pathian in, “Na thluak malmal thawn, theih tam na tum lutuk a si hi,” tiah a sawn. Cule Carver in, “Asile Bawipa, milai hi ziang hrang bikah na sersiam,” tiah a sut leh ih, Pathian in, “Ka fa, thu in suh mi hi a tum tuk ṭheu e,” tiah a sawn. Anetnakah Carver cun, “Bawipa Badam hi ziang hrangih sersiam a si?” tiah a sut. Cui thusuhnak cu Pathian in a sang ih, Carver hnenah Badam cin hlawkdan, a lei duh zawng, Badam ihsin thil ṭha dangdang tuahdan tla a thiamter. Carver cu Biblw ngaina mi a si ih, a Bible kaihhnget mi cang cu: Thufim 3:6, “Na lamzinpawl hmuahhmuah kha a hnenah ap awla, amah in na zinpawl a dingter ding,” ti mi le, “Pathian uknak le a dingfelnak cu hawl hmaisa sawn uh, cule cui thilpawl hmuahhmuah tla a lo pebet ding,” (Mat. 6:33) hi a si.
  1. William E. Gladstone: Great Britain ih miropi pakhat a si. Anih cun, “Leilung tlunih miropi 95 ka hmuh mipawl lakah 87 pawl cu Bible ngainatu hlir an si,” tiah a ti.
  1. Franklin D. Roosevelt:Kan ram ih miropi zate deuh thaw in Bible zirhnak parih ṭhumaw mi an si.”
  1. John Foster Dulles: Amah hi U.S Secretary of State rak si dah a si. “Bible hin Pathian a um thu le cui Pathian duhzawng cu a phuang ih, mikip ih tuah ding mi le tuah lo ding mi cu Pathian kamsuakthu ah a ṭhumaw a si,” tiah a ti.
  1. J. Edger Hoover:Bible hi nun famkim nei dingih kaihhruaiawknak hlawhsam thei lo a si, a sung thupawl hi thlun tum sehla, nun a him ding,” tiah a ti.
  1. Herbert Hoover: America President rak si dah cun, “Kan ram ṭhansonak hmuahhmuah hi Bawi Jesui’ zirhnak le Profetpawl zirhnak tihna ihsi rung luangsuak thluh a si. Cuiruangah Amerika mipawl hrangah cun Bible siar hi athupi tuk lawmmam,” tiah a ti.
  1. Bernard Baruch: Amerikan milian mangkawng cun, “Mikip ih an siar tengteng ding mi cabu pa li lakah, Bible athupibik ah ka ret ih, Bible ah hin kan harsatnak, kan buainak hmuahhmuah haikiandan a um a si,” tiah a ti.

10. Dr. Robert A. Lillikan: Physics lamih Nobel Prize ngahtu

cun, “Bible hi thusuhnak tuah thei lo tiang khawpih hrampi, thutak le thuk bik, leitlun pumpi ih an pawm thei mi, thudik hnin ve lo cu a si,” tiah a ti.

11. Dr. Charles W. Mayo: Surgery Professor a si. “Midam  le midam lo hrangah Bible hi hnangamnak hrampi a si.    Pumpak nun le miphun nun hrangah lamzin ding ihsi pial lo ih mi hruai theitu umsun a si,” tiah a ti.

12. Sir Winston Churchill: British Prime Minister rak si dah  cun, “Kan Scientist-pawl thlirnak le ram duhdawtupawl thlirnak tawpkhawk hi Bible ihsi luangsuak mi hlir an si. Kan hmai lam thil um ding mi hi Bible thu vekih rung thleng ding mi an si, curuangah Bible hi kan ṭhumawknak lungpi le kan rawlhimnak lungpi a si,” tiah a ti.

13. Ṭueen Elizabeth II: Birtish siangpahrang nu Ṭueen Elizabeth II cun siangpahrang lukhum khumter a si ni ah, maicam ihsin Bib le an pe ih, Archbishop of Canterbury cun, “Bible cabu Bible hi leilugn tlunih thil um mi hmuahhmuah lakih thil hlu bik a si. Hihi siangpahrang sungkua dan bu a si, Pathian kamsuakthunung a si,” tiah a phuang.

14. Chaing Laishek: Tuluk ram President khan zing breakfast  a ei hlanah minit 30 sung Bible a siar ṭheu. A ralkappawl      Formosa hmunih an tan laiah, “Bible hin ka phurrit in sawng zangkhai ih, hi leitlun riahsiatnakpawl i haikiansak. Kaa ih simsuak theih lo lungawinak ka nun ah a thlen ih, Thlarau Thianghlim aw in theihter a si,” tiah a ralkappawl a sim  hai tiah an ti.

15. Abraham Lincoln: Amerika President 16-nak in, “Thiltitheinak hrampi cu Bible hi a si. Bawi Jesu hnen ihsi thil ṭha kan dawn mipawl hmuahhmuah hi Bible fehtlang ih kan neih mi a si. Bible hi Pathian in minungpawl hnenih a thilpek ropi bik a si,” tiah a ti. A kaihhnget mi Bible cu Sam 37 pumpi hi a si tiah an ti.

16. Ṭueen Victoria of England hnenah Afrika siangpahrang  pa in, “England ropitnak san hi ziang a si?” tiah a sut ih, siangpahrang nu cun Bible phaw mawi zet nei laksawng ah pep hah in, “Hi Bible hi England ropitnak thuthup a  si,” tiah a sang.

17. Siangpahrang George V: “English Bible hi kan ram hrangah phumthup mi ro a si ih, kan hnam thlarau cawmtu a si, leilung tlunih thilum mi hmuahhmuah lakih hlu bik a si,” tiah a ti.

18. Timothy Dwight: Yale University President si dah cun,  “Thawnginn thim zetih tukvirh awngaw cu Bible hi a si,     cuih hmun ihsin thawngtlapawl in catuan ram kan thlir thei,” tiah a ti.

19. Professor William Lyon Phelps, Yale University Professor cun, “Mi zo khal a zir lai, Bible fehtlang ih thiam cu mithiam(Educated) a si,” tiah a ti.

20. Henry Van Dyke: Princeton University Professor cun, “Cabu dang hrimhrim hivekih thiltitheinak nei a um dah lo. Mi zokhal Bible a siar ih, nunpi a tum a si ah cun a rethei dah lo ding,” tiah a ti.

21. Thomas Carlyle: Scotland mi thuanthu thiam hminthang cun, “Bible cu cabu zahum, mi tin cabu, ka hmai lam le       kan dung lam thlirfengnak cabu a si,” tiah a ti.

22. Count Leo Tolstoy: Rusian Phylosopher, thuanthu phuahtu miropi cun, “Bible tel lo cun tulai leitlun ih nauhak kan zirhnak hin kan society ah sullam a nei thei lo ding,” tiah a ti.

23. John Ruskin: Literary Artist hminthang cun, “Ka ngan zo mi le ka khawruahnak fehliam zo, leiltunih ka phawrsuah       zo mipawl hmuahhmuah hi ka nauhak laiih ka nu in Bible cang in byheart-ter mipawl ihsi luangsuak hlir an si,” tiah a ti.

24. John Milton: Mitcaw, hlaphuah thiam hminthang zet cun, “Bible sungih hlapawl vek hla dang a um thei lo. Profetpawlih thusim mi vek thusim ropi dang khal a um  thei fawn lo. Bawi Jesui’ rundamnak vek thil hlu hi Bible leng lamah a um thei lo,” tiah a ti.

25. John Vanamaker: Amerikan sumdawng milian  mangkawng cun, “Thil leinak dingah sumpai a thawngza za ka hmang zo. Cumi lakah kum 11 ka si lai ih, paisa  malte man a phaw sen mi Bible ka rak lei mi kha a hlu bik ka ti,” tiah a ti.

26. Syngman Rhee: Hruaitu ropi a si. “Bible siar ka taimak thawk ihsin, ka nun siardan ka thiam.”

27. Michael Faraday: Scientist a si. “Bible hi kan nun kaihruaituih kan hman a si ah cun, ziangtin saw kan fehsual thei ding.

28. Dr. Charles W. Mayo: “Kan kilkhawi mi midam lopawl cun an damcah laiah Bible an ngaina lo khal hai sehla,  an natnak a khirhkhan deuhdeuh tikah cun Bible an ngaina deuhdeuh.”

29. Patrich Henry: Dan thiam hminthang a si. “Cabu suah zo mi hmuahhmuah kawmkhawm hnakin Bible hi a hlu    sawn.”

*****

Comments

comments

3 Comments

  1. Bible vek ih a zum ih a feh mi zumtu kan si ding a va thupi ve, lungawi na-sa.

  2. Siar man hla na sa!
    Bible (Pathian ttong kam)duh tu, upat tu Miphun le Ram pawl cu thlawsuah an dong.
    Bible ngaina tu cu Pathian in a thuthup a zirh sin sin.
    Lungawi zet!

  3. Joel Lalcungmang says:

    A ttha tuk!
    Pathian le a thu (Bible) hi atcilh phawt sehla!
    Lungawi!!!

Comments

%d bloggers like this: