Miphun Ka Duhdawt Hneuhno

Miphun Ka Duhdawt Hneuhno

S. Kei Uk

Mi hrekkhat cu nauhak lai ihsin miphun duhdawt a ttul zia an thei ngah zoih cu cun an nunnak, an thitha zungzam le ruh sunglam thlik tiang a ciah-fan thluh ruangah an nunnak hnakin an miphun, phunhnam le ram an ret thupi sawn ttheu. Kei khal cu cui phunhnam duhdawtnak rimra vakvel cun i rak zel ngah ngelcel ve si hmang ding. Ka theitawk in “Phunhnam hrangah” tiih vah hneuhno caan ka rak nei. Sinan, miphun, phunhnam le ram hnak hmanin ka nunnak cu na-ngaiin ka ret thupi sawnih ka hlawknak ding a si phawt ahcun miphun, phunhnam le ram hi hmaikawr ih hman poiti lonak tiang ka nei zik ttheu.

Ka titheitawk hi a tenau ve hrimhrim. Hlan deuh ahcun kan Lai cabu suak pohpoh hi tthehnemngaiin ka rak zuar ve hneuhno ttheu. Ka zuarsak mi cabupawl ih quality a tthat le tthat lo lam ka ruat cuang lo. Lai cabu a si phawt cun Laimi cun lei tengteng ding timi lungput ka neih ih hleiah Lai cabu a rak lei duh lo le a lei thei lotupawl cu miphun, phunhnam le ram duhdawt lo minunga ah ka seplut ttheu. Cabu lawng a si hrih lo; Lai tape-khui le CD, VCD, calendar pawl khal ka rak zuar ve hnohno. Cutikah miin an rak lei duh lo, asilole an lei thei lo tikah miphun, phunhnam le ram an duhdawt lo tiah ka phunzai.

Tikcu a rung her danglam vivo tikah ka lungput khal a herdanglam ve. Lai cabu suak a tam deuhdeuh ih Lai hla le thildang neuhneuh khal a tam vivo. Lai cabu a si tapoh tiih lei thluh ci a si nawn lo. Lai hla a si tapoh tiih lei thluh khal tlin ci a si nawn lo. Tthahnemngaiih zuartu le rak leitu pawl hrangah ninum a si zik zuakzo thlang. Miphun duhdawt loih ka ruah mi kha keimah riangri ka si ve thlang. Curuangah ka lungput, miphun ka duhdawt dan ka tthin ih quality ttha taktak Lai cabu suak vivo thlangin Lai hla, thangtthatnak hla, VCD quality ttha taktak tla suak ve thlang sehla ka neihsun sum le pai tein lei ttentto ka tum ding ti hi a si.

Cutiih miphun, phunhnam le ram ka rak duhdawt ruangah pawlkom a phunphun ah ka rak telve hneuhno lala. Tthahnemngai zetin pawlkom hrangah ka vahtawih hnelhno cang khal a tam. Laitlang khawhlun pawlkom, kawhhran pawlkom, cumi pawlkom, khami pawlkom, ….pawlkom…. ka rak ttang ve nasa. Keimah bulpakin pawlkom din duhnak tiang ka nei thlang in ka thei. Asinan, hiang pawlkom neuhsep pawlih ka telnak ihsi ka ngahsuahmi hi tha bangnak, thinbangnak le vuivaiawknak fang an si hin ka thei. Ka rak tel zo nak pawlkom hmuahhmuah lakah LZP le FP hi Falam pengih a ummi hnrinhram tete in funkhawm thei bik ih kan miphunpi lungrualnak pawlkom siah ka ruat. Curuangah, tu hrih ahcun, pawlkom dang neuhneuh ih thathawh ciamco hi ka hiar thei nawn lo. Pawlkom din duhnak thinlung ka rak neihmi khal a hlo hrih sal; miphun, phunhnam le ram ka duhdawtnak a tlaniam vivo maw cu thei hlah.

Ziang a si khalle miphun, phunhnam le ram duhdawtnak cu ka thinlung hniarte ahcun a caam hrih ko. Ram le miphun hrang ka ti thei mi le ka tlin mi thil hi an tenau deuh vun ti men lo cu……….

(Visited 61 times, 1 visits today)

Comments

comments

One Comment

  1. Ca ngantu si rori, na mawh lo. Ziangahtile Mipi or Miphun hrangih hnatuan cu a har tuk rengreng…duhsaknak thinlungtak thawn Mipi hrangih hnatuan lai ah Mipi lala ih sawisel, kawk le hek tuar a si tikah Ram le Miphun duhdawtnak Thlarau taktak neih a tul ngai. Awl lo….

    “Lai cabu suak a tam deuhdeuh ih Lai hla le thildang neuhneuh khal a tam vivo. Lai cabu a si tapoh tiih lei thluh ci a si nawn lo. Lai hla a si tapoh tiih lei thluh khal tlin ci a si nawn lo”. Na timi ahcun kan mah Chin dinhmun lawngin na zoh a si thei. Kawltawng ih Cabu suak khi zohhman, Mirangtawng ih Cabu suak khi zohman. Falam huap cu simlo Chin Ram huap ih Cabu suak cu a mal tuk lawmam lo maw?? Chin Falam tawng ih hla Vcd/Dvd/Zuknung suak pawl hi a mal tuk luarkai lo maw??

    Yangon ka umlai ih Cabu dawr ka fehle Kawltawng ih nganmi Cabu cu mai duh zawngzawn, mai uarzetmi cangantu ih nganmi asilole kan duh zawngzawng a um theh. Ramthukhelnak lam cabu, pursum leilawnnak lam cabu, Biazai, Nunthuleng, Hnihsuak capoh, Tawntawk, Numsimawknak, Nunthuanthu, Sex lam Cabu, Mihip thiamnak, Scientist lam, Psychology, Scientist lam, Innsangthu le Cabu tinkim paih zawngzawng, duh zawngzawng siar ding tawr le seng siarcawk lo a um. Mirangtawng ih canganmi cu rel ding um lo…tamtuk luar..

    Culakah kan nih Chin??????

Comments

%d bloggers like this: