Minute Pakhatten!

download (10)

Minute Pakhatten!

“Duk!! Duk!! Duk!!” Parte ih lungtur awn cu sumdeng hruanaw bang a tlir dupdo. Zanvar itthat thei loin thlanhripi thawn siir le siir a her rero. Tuizan vek boruak ahcun zo cio hrang khalah itthat a har zet. Thaizing phunhra result suak ding a siih ong ding cu a zumaw tuk nan an Sawng ih cathiambik a pahnihnak a si ringringmi ‘Thiam hleice’ ih ong a duh. Curuangah a lungtur hi a cawl in an cawl thei lo. An tlawng saya pawl khalin ‘D’ paziat a tel ding tiih an zoh tukmi a si fawn. Cutiin itthat loin zankhua a var. Zinglam khawfing a cat veten a tim a tuah ih Falam lam pan in a rualpi dang thawn an feh.

Cinmual tlang luhnak rori zin lamthlang ih Myone Pinyia yi zung ah minung cu an phuul murmo. Parte tei rualvahza khal an vong suk veih a hmun an thlen zawngah Parte cu a kefeh a cawl cutci. A ttang a domih a mit a von sing murmo. “Parte!!!!! Na hmin ka hmu. Hinah na khung number rori a si. Yess!!!!” tiin khir le zuang phahin khuppi cun a hong pom. Parte cu a mit a hon mengih calung pi umnak lam pan in a vong tlan turto. A hmin umnak cu a von zohih a vorhlam kilte ah, “Math, Bio” tiih nganmi a von hmu. A thawpi a hon thaw hlunhlo. A lungawi mitthli dil kelki in umngaihnak hman a thei nawn lo. Tu cun lai khawte behrek ihsi nuhmei farah fa tlawng rak kai a sinak hi a uar aw tuk thlang. A tlawngkai lai tlawngkhuan um tinten mithmai nau zetih um ringring, Bawm khat rori in kun ngerngi teih hanghnah hangrah a rak phurh ringringtu a nuih tha bang man a lak a si lozia a hmuh thei thlang ruangah a hmai a hngal zet. An Sayakyi tong dingin khawsunglam pan in an feh. An Sayakyi pa cun hlimnak ih khat mithmai thawn a rak hmuak ih a rak pom. Hni le khekin thu nuam an rel tlang hnu ah Khua lam pan in an tlung sal.

Parte cu Siivai lam thiamnak zir rori a duh ruangah Nurse kai a tum. Yangon ih kai dingin tumtahnak a nei. An innsang dinhmun in a tlin fawn lo. A nu cun, “Ka fa, na nu ka dam sungah na donhar hlah. Thettiak ei cun Pathian in in cawm lo ding hokhaw. Na kai duhmi cu kai ko aw” tiin tha a pe ringring. Phunsang tlawng kai ding dilnak an tuah rero thlang. A kai duhmi cu mark 400 cekci in an la. Parte ih mark kom cu 397 a si. A ban deuhlo fangfang a rak si tikah a thin na in a ttap ciamco. Ingineer line a dilih a ngah cih. Tlawng lut dingih kawhnak ca a rak thleng cu ‘Kalay Myone Tthawma’ ah GTI kai ding a si. A nu cun thlacamnak thawn thlahnak a tuahsak ih cutin Falam Chin-Tawng-Tan gate in Cinmual tlang lan cun a feh liam. A thinlung cun Siivai lam thiamnak zir ding lawnglawng a ruat ringring thotho.

Falam Vankau tlangih um NTS ih kai dingin a ruatkual ih thuhla a zingzoi tikah tlawngkai dingih dilnak(siohnak) lawng menah ks/300000 rori a ttul thu a thei. Cumi hmanin ngah ding le ngahlo ding theih a si hrih lo bet. A nu in veilekhat ah cuzat zat paisa a hawl hmu thei lo ding ti a theifiang tuk fawn. Seherh zet cingin a ngahmi line kai ding cun a feh suk vivo. Tlawng an von lut. Tlawngluh man ah cuzat, cabu manah cuzat, cumi khami hrang, A sawng um man ks/…… A paisa cemliam tamdan cu a rap thlak. Ni le thla cu an hongliam vivoih tlawng an luhnak khal thlaruk a rak kim thlang.

Fuurpi a si vekin ruah cu catbang loin a sur. Parte cu ciar thliothlio in A sawng sung a vong tlan lut hnumhno. Cu fangah a siir ihsin, “Parte, phone an lo biak duh” ti aw a theih veten zamrang takin phone a va kai. “Hello…… Parte ka si. Zo na si?”
“Parte, Titi ka si”
“Aw…… Titi maw?”
Parte cu kaittem ah a hong tlan ciamcoih a room sungah bang helhel in a hong lut. A mithmai cu a lungawi tuk ti theihtheih fahran in a vam hemhem. A haa fang 32 cu an lang siamsiam. A Bag, Sarang dip a lak ih a thilri cu pakhat hnu pakhat a bilih bag sungah a san. A hnathlam ah Titi ttongmi, “Falam ih NTS tlawng kha paisa fangkhat hman cem ttul loin Mark rori in an la thlang ding. Hong sioh tengteng aw. Na ngah tuk ding. Kei khal ka dil ve ding si. Phunhra ong certificate kha original rori a ttul” ti cu a thuanthuan in an rong thang. Cutin a nuih hnenah ziang thu hman ronnak tuah riai loin Falam a hong so ih thil ttul zaten a hong tawlrel thluh. Ziangkim thu a fel hnu lawngah khua a tlungih a nu a va sim. A nu cun, “Ka fa, na paih zawng le na tumtah bikmi a si vekin kai ko aw. Kan miphun hrangah mi pakhat si ding rori in zuam aw” tiin mithmai pan takin a rak ti.

Zaan an it ih Parte nu cu a thinpit uk-o in thu a ruat. GTI ah kumhrek a kai ih cumi an cem mi paisa hi malte men a si lo. Atu NTS kai dingih an cem ding pawl ruatin a thin a bang zet. Asinan a fanu ih mithmuh ah mithmai pan takin a um ringring. Parte cu Vankau tlangah NTS tlawng a kai. A nu cun a fanu cawmnak ah hnattuan khung taktak a ttuan. An khua ihsin Falam tiang ttilva men bangin Bete phurh a hlawh thul, Vainim phuth a hlawh. A caan ahcun Arti phurh khal a hlawh. Nunau taksawh thingput khal a hlawh. Cutin harsa zetin a fanu cu a cawm. Falam ih Vainim le bete a phurh hlawh caanah a fanu rilrawn ding phangah banhla car, kawlhra suan cia tivek a phurh ceem ringring. Parte cun, “Ka nu, tlawng ih hmeh cu a thaw lo tuk. Phunhra boarder Sawng ih kan ei hnakin a sia deuh bet lai” a ti cun duhdawtnak thawn a fanu hrangah Sihmui a phom. Sasen a lei ih a pherhcar hnuah a kiorum sak. A fanu rilrawn tuar ding hrimhrim a siang lo. Parte cu an tlawngih cathiambik a si ringring tikah theilotu a nei nawn lo. Hni le puan khalah a nu cu “A sa ngai maw a belhnak a tam sawn” ti ding khop hnipuan a hruk lai ah Parte cu milian fanu bangin a thuamaw ziaizi. Falam bazar an luh tivek khalah mikip ih mit cu Parte parah a fu ringring.

Kum thum sung NTS a kai hnu ah Ong lethmat an ngah hlan hlawhleng in hnattuan dingin Tahan ah an suk. Wesley zato innpi ah ttuan an tum nan remcanlonak ruangah Yangon an suk lan. Yangon Alone ih Acedamy Clinic ah hna an ttuan. An hnattuannak thlathum a rei in Parte cu thu danglam tak a dong. US ih mi pakhat in nupi dingin a rak ko. Can tawkfang lai khua a ruat. A thinlung hrekkhat in feh a duh nan khatlam ah Falam rori ih hnattuan a duh fawn. Khatlam in a ruatsal ih a nu a cawm theidan ding a ruah ah feh a duh. Cutin a nuih hnen ahcun thuhla a hon simfiang.

A nu cun, “Ka fa, ka kiangnai ah um in i kilkhawi awla ka duh nan….. Tu tlawng na ttheh veteih pasal na nei ding ti cu? Cu betah ka hnen ra kirsal thei nawn lo ding na si bet fawn”
“Ka nu, ka nau le pathum rori an um lai si. Anmah in an lo kilkhawi thei ko. Kei cu kawlram ka um khalle Falam cekci ah hna ka ttuan ding ka ti ngam lo pi. Rih khawdar ah ka ttuan tla a si thei. Cun, hmun dangdang ah ka ttuan tikah cun ka lo kilkhawi thei cuang lo ding. Cuhnakin ramdang ka feh dingih Paisa in ka lo zoh ttha thei sawn ding. Ka nau le khal tlawng tthaten ka ron kaih thei ding. Kawlram ih hna ka ttuan cun ei cop bar cop fangfang in ka lo zoh thei lo ding pi. Ziang khalle ka feh ko ding”
“Si ee, kumkhua na pom ding na pasal cu nangmai’ duhmi rori si ka lo duhsak. A ttang sungah ka nuam aw ding tiih na zum ahcun ka lo kham lo. Nunau cu pasal ih ta kan sisi” ti phahin a mitthli cu van rialruah bang an rong dok zurzo. Mithi zuun tuar bangin zuun a tuar.

Kum 45 fang lawng a si hrihmi Parte nu cu a el a kun man. Hna khung tuktuk a ttuannak ah a thahri an rak diraw cat thluh. Parte cu a pasal ding hnen panin Malaysia cu a thleng dumdo ta. A ruahnak le a takih thil umtudan hi a dangaw verver! Malaysia a thlen veten a siraw cih. A pasal cu US a thlennak kum 4 a rei zo ruangah nupi a ko thei nawn lo. Parte cu amahte UN a luh a ttul thlang. A thiltuahmi a sirawk tuk ruangah a nu khal a phone ngam dah lo. A nu cun, “Ka fanu ka ngai tuk. Cutawk ah harsa zetih a um hnak cun rong tlungsal seh” tiin tuletu a cah. Parte ih kiang le kap ah cun pasal nei dingih Malaysia feh naih pasal thawih tonawk hlanih tthenawsal an tampi fawn. A ruah vekih thil zianghman a can nawn lo mangbang anhai in kawlram tlunsal a tum. Thubohcatnak a tuah fel hnu ah thil ttul ziangkim a tawlrel thluh ta!

Kumkhat sung liangluang a biak lomi a nuih aw theih hiar zet le sirawknak lungthin thawih a kirsal ding thu sim ding hngakhlap zet phahin an khua phone number cu a von hmet. “Hello… Malaysia in Parte ka si. Zangfahten ka nu ka biak duh”
“Aw…. Parte, na nu a dam lo besia zet hokhaw. A kaa in na hmin a sal rero. Minute pakhatte sung na hmel zoh a duh thu a sim ringring. Hitiih a umnak thlakhat a rei thlang”
“Ziangtin ee?! Ka nu cu ziangtik in a dam lo?!
“Ramdang na feh hnu thlathumnak in a dam lo thok. Phone le na ron biak dah fawn loih…”
“Amai’ i biak thei lo hmanah ka ttong tal ngai seh. Ka ra tlung ding ti thu ka sim duh”
“Aw reilote ah ron hmet sal aw”
“Awle”.

10 minutes a rei hnu ah…

“Hello…. Parte ka si. Ka nu..?”
“Parte, na nuih lukham tangah canganmi a um. “Ka fanu Parte, ka lo duhdawt tuk” cu zat lawng” an ti zawngah, “Dawng!! Dawng!!” mithi dar an tal tariai!

Parte cu a phone leitang ah a tla ruairo! “Nu, minute pakhatten thu ka lo sim duh. Minute pakhatten!!!!” tiin mitthli tla thlohthlo’n…

May 9, 2013
By/ Mai Daidim

(Visited 346 times, 3 visits today)

Comments

comments

Comments

%d bloggers like this: