Minute Nga Te’n


Ni khat cu cawlh hahdamnak hmuan pakhat ih tohkham sau ah a rak totu pacang pakhat kiangah nunau pakhat a va to ve. Nunau cun sweater angki sen hruh in tawlhnak ih a tawlh rero lai mi nauhak pakhat kawhhmuh phah in, “Khitawk ih um khi ka fapa a si,” tiah pacang cu a sim. Pacang cun, “Nauhak duhnung zet a si khi,” tiah a sawn. Cu thluh ah, “Hnipuan var hruh ih thirleng totu khi ka fanu a si,” tiah pacang cun a sim ve.

Cu thluh ah pacang cun a nazi zoh phah in a fanu cu a ko. “Kan tlung thlang lo ding maw, Melissa?” Cutikah Melissa cun, “Papa, minute nga te’n maw, zangfahte’n,” tiah a dil sal. Pacang cun a lu a sut ih Melissa cun nuam ti zet in thirleng cu a to peh. Can a liam vivo hnu ah pacang cu a ding ih a fanu cu a ko sal lala. “Tlun a cu thlang lo maw?”

Asinan Melissa cun, “Minute nga te’n, Papa. Minute nga te lawng rori,” tiah a dil sal. Pacang cu a hni siamsi ih, “Awle,” tiah a sawn. A kiangih totu nunau cun, “Pa thinsau tak na rak si hi,” tiah a sim.

Pacang cun hni siamsi phah in, “Kan dung kum ahkhan a u Tommy cu hitawk kiangih thirleng a to rero lai ah mawttaw khaltu zuri in a pah that. Tommy thawn can tampi kan rak hmang tlang lo. Curuangah amah thawn minute panga sung can hmang tlang sal thei ding in ziangvek khal pek ka huam. Melissa parah cuvek thil dik lo tuah ngah pang lo ding in thutiam ka tuah. Melissa cun thirleng tonak ding ah minute nga a ngah sal ah a ruat. Taktak ahcun, keimah in Melissa a leh rero lai zoh theinak minute nga ka ngah sawn mi a si,” tiah a sim.

Kan nun ahhin ret thupi ding mi thil tampi an um ih, innsang nun hi a dang hmuahhmuah hnakih ret thupi ding mi a si. Na ret thupit ruangih na sirawk lo ding mi cu innsang nun hi a si. Curuangah can na neih sun hmuahhmuah cu na duhdawt mi pawl thawn hmang tlang ttheu aw.

Sirhsan: Ngantu theih lo mi “Five More Minutes.”

Comments

comments

Comments

%d bloggers like this: