Minungih Sinak phun thum

Minungih Sinak phun thum

Jh. Thang Ce Lal

Thuhmaisa:

Minung sinak kan ti tikah, ziangtizawng sinak timi khi kan thupit ter duhmi asi ih, Pathian lam tahdan le milai lam tahdan a lingletzia langfiar ter duhnak bikah a si. Kan kawhdan hmin phunphun lam reltum lam si loin, kan pianthar hnuih kan sinak/dinhmun fiang tarlang duhnak a si.

1.Nauhak sinak :

Paul cun, Korin Khawhhran pawl le Hebrai mipawl hnen ah; “Can a rei zo ruangah, zirhtu dinhmun thleng zo ding nan si nan, Pathian hnenih rung thleng mi (oracle) thuhla ah, a tirtei zirh tulin midang hnenah nan zir a tul ruangah rawl ngai (hak) nan ei thei lo,hnawi lawng in/hmangtu nan si. Hnawiti lawng a in tu zo khalin dingfelnak lamah theihthiamnak a nei hrih lo/a zir hrih lo. A sia le a tha thleidang thiam thei dingih a ruahnak hmangsuak theitu pawl cu kumkim zo mi rawl ngai (strong meat) hmang thei tu an si”. Tiah ca a kuat hai. (Heb 5:12-14, I Cor 3:1-3 zoh). Nauhak tiih kan timi pawl hi a taktak ah cun kumkim upa zo hlir an si tlangpi ko. Asinan, dingfelnak lamzin zawh dingih tanlak thiam lo pawl cu kumkim teptep le cathiam zetzet Degree nei thluaithli an si hmanah naute/nauhak pawl timiah an tel thotho a si.

Cun hi nauhak pawl cun sual tuah ding rori an hawl an ngaihtuah ih an can cu cutin an liamter rero. Tuisun ni ah sual tuah ding hawl/pawl reroih a nungcangtu na siah cun kum50/60 na ti zo khal le nauhak na sit i kha rak theiaw lohli mei aw. Kan miphun pumpi ah hin sualnak a phunphun tisa caknak le midang nun pitlin theinak le thlawsuah ngahnak ding a phunphun ih lamzin khamtar tu le phihcat sak tu ih tanla rero tu siseh,Pathian lamzin ihsin pingpeng rero hi kan tam sawn pang pei maw! Tihi kan ruat a cu. Atawinak ih kan sim asile misualral,mitha lo ka sit i thei loih sualnka tuah bet tum asilole sual tuah dingih sa phar ih phar cangvat vanih van tohtoh na siah cun cucu nauhak na sinak langfiang tertu cu a si.

2. Mino/Thalai (Nonawn) :

Nonawn timi pawl cu, milai tahdan le kawh dan ah cun kum15/6 ihsin kum 40 tiang hrawng kan si. Cu pawl dinhmun ah cun ruahdan le hmuhdan a hung danglam vivo ih sualnak a phunphun a hun tuah thawk aw thlang. Sualnak ruangah a phunphun harsatnak khal a tawngaw thawk vivo. Malteten a fimaw hrethro vivo cun,kan cekawk that rero can ah hihi cu a tha lo sualnak a si Pathian in a duh lo e ,ka tuah zo ih ka tuar phah, kha ti vekin kan thlengaw phahphah rero laitak a si.

Asinan Nonawn,Mino si lai ah hin, sualnak a si, a tha lo, Pathian in a duh lo theifiang vivo cingin sual a tuahaw rero thotho. “Ka sual, ka ti dik lo”,ti thei na cingin sual a tuah pehaw rero a si. Cui dinhmun ih na nung rero lai a siah cun kum 60/70 hman rak ti zo khal awla Pathian tahnak ah cun “Mino/Thalai” fang khi na si thotho a si.Pathian hna n arak tuan nak kum 20/25 leng rak ti zo khal sehla pitlin (mature man) ci na si thei lo. (Heb 5:14, I Cor 13:11, I Jh 2:15).

3. Pitling sinak :

Mi pitling timi pawl cun, ka sual, ka tha lo ti le thil tha lo rak tuah zo tu ka sit i khi an theifiang ih cule an tlansan vivo, an bansan vivo men a si khal cucu mipitling dinhmun ciah cu a si. Sual an va tuah pang mi a um khal le cawplecilh rorin an bansan ih Pathian mithmai hawl lohli’n an sual that lo zia theifiangaw nguahngo phahin Pathian na neih sinsin ih an sualnak cu afate ihsin atumpi tiang tanta/tlansan in an nun an hmang liam sawn a si kha. Cupawl cun hi leilungtlun hi umnak tlakah an ruat taktak lo. Rinnak in an innsang an hruaiih an miphun le rampi khal an rak hruai rupro mei a si kha. (Heb 11).

Na kum le degree parah a thumaw lo. Pathian ih na pekawknak parah a thumaw sawn. Kum 20/30 na si khal le Pathian hmai ih mipitling/ropi na si ding khi a thupi bik. Nang the khui tawk dinhmun ah so na tel! rak zoh tha awsal hnik,Unau.

Thunetnak ;

Leitlun milai mithmuh le ruahdan tahdan ah cun nauhak mino/thalai le upa (mipitling) tin um khal sehla Pathian tahdan sawnih mipitling sinak neitu si khi a pawimawh bik. Culo ah cun thiang thlarau hruai dan le zirhdan cun kan miphun a uk ngah dah lo ding. Sual tuah ding hawl tiatia pawl tla upa ah siseh, sualnak a si a tha lo a si,ka sual ngai e ,,,ti thei na cingih tlangsan lo, thalai (nonawn) pawl tla hruaitu ah siseh a ling le let in mipitling (Pathian tahdan ih) tla namthla ta hratin kan retaw pang thei , Pathian hnenah pelut aw cio uhsi.

(Visited 53 times, 1 visits today)

Comments

comments

Comments

%d bloggers like this: