Mino le Hlawhtlinnak

Bung 1

MINO/THALAI

Kan that vanglai ih kan umdan cu
kan upat hnuih kan umdan ding rak simkhawltu a si.

‘Mino’ ti kan sal veten kan thinlung ah kum no le cakvak lai deuh a um mai ding ti zum a um. Kum upa lam le cakvak nawn lopawl in kan cahlai le kan that vanglai tiah an ti theu. Curuangah a si ding, mi hrekkhatin ‘Mino’ an ti laiah a hrekin “thalai” tiin kan ko thung. “Kan no lai can” ti cu sal theu mi a si nan, “kan mino laiah” ti hnakin “kan thatlai le vanglai-ah” ti hi mi tamsawn hmandan a si.

Kannih (a hleice in Presbyterian rimnam deuhpawl) in thalai ti kan hmang hi a sual lo nasa. Hnam dang tawng kan cawn mi khal a si lo, kanmah kan tappi tawng rori a si. Kawlram sungih Presbyterian Kawhhran cun kum 14-35 karlak hi thalai cazin sungih khumluh an si. Mino kan ti khal le kan theihthiam sawnnak ding a siah cun a tha thotho; hi khal hi kan tawng a si ve thotho. Duhduh hman dualdo ding kan nei tinak a si.

Mino/thalai kan ti mi hin kum lamih nonal deuh a sawh ti men lawng a si  lo, thathnemnak dang ruahbet ding a um lai. Cucu, thalai si a hlawknak le a manhlatnak tiin kan rel thei. Kum lamih no lai na-na-na cu Mino/thalaipawl cu an cakvak lai ti a fiang, an thazang a khoh laifang, mai tlin tawkih duhduh an tithei lai, an ral a that lai can, thiam hleice (skill) nei thei dingih timtuahawknak can tha an neih lai le an virvat a that lai can a si. Kum upa lam hnak khalin ziangmaw canah cun thalaipawl cu mi hawihawm le tawzang, upapawl ih tilhfial theih an si lai tikcu a si.

Cuitlunah, Mino siih hlawknak dang kan hmuh thei mi cu, an hrangah zirawknak tikcu saupi an nei lai; hmailam pan rero an si; an thlen tumnak an theih fiang ih, a fehdan an thiamah cun mi hlawhtling, lole, mi pitlingih can theinak can tha an nei lai. An thluak a cak, a mit a fim, an hna a vang tha, an thazangih a tlin lai ruangah an tuah duh mi cu an tuah thei ngaingai tikcu a si.

A sansan in kan then asile, san khatnakah an um ih, an san hnihnak ra um lai ding mi hrangih an timtuahawknak san a si. “Mino” dinhmunih um cu ziangtlukin a sunglawi in, man a nei! Nuam an ti laitak, khawvel hi a nuam thei bikih an hman laitak a si ruangah thatlai le vanglai nun a liam cuahco ding hi thalai/mino tampi cun pamhmai zetin an thei. An that vanglai nun an dungkhirhsal tikah upa tampi in a ui in, an ui duahdo; an thatlai can a rak hmang dik lopawl in pawi an ti a zual sinsin.

Khatlam kapin zohsal sehla, thalai cu cahlai le vanglai a si vekin thatlai nun hmang thiam loin, mi tampi lamzin dik loih an pial theu can a si lala. Zianghman hmuhtawn mi (experience) nei hrih lo an si ruangah kaihhruai an harnak zawn a um ve. Tisa hiarhalnak a phunphun ruangah zin lo le kawng loih fehsual a awlte.

Curuangah, thatlai can hi thlemnak doneh a har zet can a si ruangah ralrin ding a tam zet. Nu le pai thlazar hnuaiah nuam tuk le helhkam nei lem loin an khawsa, nu le pa rori rinsan ih, mahte pitlin tum lo thalai tampi an um. Mai tuah ding thei cuca loih an tikcu neihsun a lakih hmang liam men khal an tampi. Zirnak tikcu tha an neih laiih zir tha duh lo, nu le pai nunsim le lamzin khihhmuh mi lung duh lo, thalai luhlul; a hrekhat phei cu zuri sabah le nu le pai thinhartertu ding fangih cak teltel an um.

A hnuai ah kimcang in PDF file in siar a theih:

Mino le Hlawhtlinnak: By- Lal Tin Hre

(Visited 34 times, 1 visits today)

Comments

comments

3 Comments

  1. Saya Hre
    Na cangan mi tha ka ti na sa. Ka duh tuk.

  2. Saya James, says:

    Pu Hre,,

    Mino/,tthalai timi ah ka um ve lai,,,,

    na ca ka rak bawh ringring…

    Nu pi tthatthum tivek cabu tla kha suah vivo bet si sehla ,,,kan mamawh zet lai ding tiah!!

  3. Pa Hre,,,

    Nang cingcing….A tha thei tuk, na ca siar hlan na hmin hmuh lawng hman a hlawkthlak zo.
    Phun 10 kan awn kum 2003 ih kan kawhhran PCM, Immanuel in sunlawihnak in tuahsak ni ih na thucah( Mino Le Hlawhtlinnak) simmi ka mang ruangro.
    Ka thalaipipawlin siar thluh hai sehla ka va duh tak em…..Dalhi lamah tla a bu in zuardan ngaihtuah sehla a tha lo ding maw???
    Delhi na rat tumih ca in tan(pek)mi kha ka rak hmu.
    Ka lungawi tuk

Comments

%d bloggers like this: