Mindat ah Pasal in Nupi ih Baan Nam Thawn A Sat Sak

(Thisen zuk a um ruangah na zoh hlanah ralring in ruat ta aw!!)

Chin ramkulh, Mindat khawpi ih um Nu Ning Awi cu 2017 April 24, simlam nazi 6 hrawng ahkhan a pasal hnenah feh in an fa tlawngkainak ding thuhla a va sutron thu ah an buai ih a pasal Pu Law Hung Ha in a kehlam baan ah nam thawn a sat thu Chin World Media in a tarlang.

Nu Ning Awi hi Pu Law Hung Ha ih nupi pahnihnak a si ih, Mindat khawpi ih Myoma bazar ah thlaihring zuar ih cawmawtu a si. 2010 kum ah Malaysia ah hnattuan ding in a feh ih Pu Law Hung Ha thawn an tong aw. Pu Law Hung Ha in innsang a neih thu a sim lo ruangah an nel aw vivo ih fa a von. A khawl mi paisa ting 30 khal Pu Law Hung Ha in a laksak. Fa a von ruangah Mindat ah ra tlung in fa a hring nan, Pu Law Hung Ha in a zohkhenlonak hi kum 6 a rei zo.

Nu Ning Awi cun, “Kei hi Pu Law Hung Ha ih nupi pahnihnak ka si. 2010 kum ahkhan Malaysia ah kan tong aw. Cumi lai ah nupi a neih zo thu a rel lo lawlaw. Fa ka von tikah a olsam zawngte’n kut kan sih. Hnattuannak ihsi ka khawl cia mi paisa ting 30 khal, nupa kan si zo ti’n a lak. Fa ka von ruangah 2011 ah Mindat ah ka ra tlung ih, thla khat rei hrawng ah fa ka nei. A nupi pakhatnak khal in a ra zoh ih in pompi. Asinan a dangdangte’n kan um. Pu Law Hung Ha cun i pehtlaih nawn lo.

2013 hrawng ahkhan a ra tlung nan tu tiang in i ngaihthah. Ka fa tlawng kai a cut thlang ruangah pai’ hmin tla a ttul. Tlawng kai man khal a ttul. Curuangah amah va tong in tthate’n ka va sim nan, a nupi pakhatnak ih nau le an fanu in in ti buai. An pahnih in ka kut khatlam khatlam ih in kaihhrem lai ah Pu Law Hung in ka kehlam baan ah nam thawn vei hnih in sat. Hmun 17 kan tthi. Palik zung ah ka hek nan zan khat lawng an kharhkhum. Himi hi a dik lo lawlaw. Ka kut hin tthate’n hna a ttuan thei nawn lo ding. Dan vekin ka tawlrel vivo ding,” tiah a sim.

Tu ahcun Nu Ning Awi hi a kut hriamhma ruangah natnak nasa zet tuar in Mindat Pengpi Senpi Zato ah a um lai.

Source: Chin World

(Visited 202 times, 1 visits today)

Comments

comments

Comments

%d bloggers like this: