Mifim pawl ih Tipalh pang ruangah!

Mifim pawl ih tipalh pang ruangah!

(Matt. 2:1-12, 16)

Rev. Run Cung Mang

“Bethlehem le a kiangkap khua ih a ummi mipa nauhak kum  hnih le a thuailam hmuahhmuah that ttheh dingin thu a pek” (Matt. 2:16).

Thil tipalh (mistake) timi hi mikip: mi-aa te ihsin mifimbik nunnak ah siseh, mi nautabik ihsin mi maksak le mi upa lungfimbik ih nunnak khal ah siseh, a cang thei ttheumi a si. Mah bulpak nunnak, Innsungsang, Hrinhnam, Kawhhran, Association, Convention le Fellowship ihsin kan Laimi miphunpi huap tiang mi pakhat asilole hruaitu ttuanvo nei mi pakhat in thu a ruat palh, a ttong suak palh, ca a ngan palh, thu a zirh palh, hna a ttuan palh pang asile harsatnak le buainak a thleng thei. Curuangah raalrin a ttulzet. Ttuanvo fate nei khal in amah tawkte’n raalrin a thiam a ttul ih hruaitu upa ttuanvo tumpi neitu le thiltitheitu sinsin cun nasazet ih a raalrin ringring a ttul.

Bible (Matthai 2:1-12) sungah Nisuahnaklam ih mifim pathum pawl ih thuanthu kan hmu. Ni le Thlapi, Arsi umtu daan zoh thiam, mifim le milian, mi maksak hlir an si ding timi cu Christmas neitu naute Jesuh an ton ngah tikih an pekmi laksawng mankhung pawl zoh in kan ruat thei. December thla, a thlummi (Sweet December) Christmas Caan sunglawi ahhin mifim pawl ih nunzia le thiltuahmi pawl zoh in tuni zumtu in kan cawn dingmi pawl cu: Messiah naute (Rundamtu Jesuh Khrih) tong ngah rori dingin an hawl, Laksawng kenmi an nei (kut lawngin an feh lo). Nang le kei teh Christmas caan ah Pathian ih laksawng in pekmi tampi ruat phah in Naute laksawng ziang na pek pei? 2010 kum khal ah Christmas hmangfuhtu si zuam cio uhsi!

Asinan riahsiatza ngaingai thil ummi cu mifim pawl ih thil an tipalhmi hi a si. Ziangso an tipalh? Lamzin an palh tariai. A thokpek ih an hmuhmi le an thlunmi lamzin ihsin an pial. Vanlam Pathian lamhruainak Arsi rinsan ih an fehmi lamzin zawh ringring loin anmai’ minung fimnak le ruahnak hmangin an feh. Tusan mifim cathiam le zir saang hruaitu tampi pawl tla Bible ih simzirhmi le Thlarau Thianghlim ih hruainak hnakin, mai’ fimthiamnak le hmuhtonnak sawn rinsan in, Pathian hnakin milai rinsan ih hnattuan an hmang ttheu tikah buainak le harsatnak tampi an suahpi ttheu.

Mifim pathum in Van Arsi an thlun lo ruangah Bethlehem pan loin Jerusalem riangri an pan ngah pang. Mifim pawl ih tipalhmi ruangah Herod siangpahrang le Jerusalem khuasung mipi cu thinhar le mangbang vansaang in an um. Culawng si hrih loin sualnak nei lo nauhak kumhnih tang tampi ih nunnak a hloral. Ram pumpi ah mitthli tlaknak a thleng (Matt. 2:16). A va poi ve. Mifim ih thil tipalhmi hi! Mi nauta pakhat ih palhmi in mi a siatsuah thei ve ko nain a hngawr ngahmi a mal, a fiak deuh. Asinan mifim le mithiam, thiltithei pakhat ih thil tipalhmi cun peng le ram, miphunpi tiang a siatsuah thluh thei. Ttih a nungtuk, raalrin ngaingai a ttul.

Cangantu pakhat in “Tipalhmi (mistakes)” thu hiti’n a ngan ih hnihsuak tla a bang na’n a diknak zawn a um: Sammettu ih tipalhnak in lu pungsan style thar dang a suak; Puantthittu ih tipalhnak in fashion thar a suak, Naingnganzitama (Politician) ih tipalhnak in Daan (Law)thar a suak; Scientist ih tipalhnak in invention thar a suak; Zirhtu saza ih tipalhnak in theory thar a suak; Computer Programmer pakhat ih tipalhnak in computer virus thar a suak; ih asinan na Thuneitu Pu (Boss) ih tipalhnak cun nangmah ih tipalh, nangmai’ mawh ah a cangter, ti’n. ………

Nangmah le keimah ih thil tipalh ruangah Khrih le Miphun hmin sia lo ding raalring uhsi!

Comments

comments

Comments

%d bloggers like this: