Midang zawnruah thiamnak

Sermon Topic : Midang zawnruah thiamnak

Rev.Ro Khar Thang

Text :    IKor. 9 :19.

Thuhmaihruai :  Paul in, “Keicu miluat ka si; zo ih sal hman ka si lo. Sikhalsehla mi a tam thei tawkih hruai ngah dingah mi hmuahhmuah ih sal ah ka cang”.  Mi tampi cu hivek lungput nei riai loin kan minung titsa duhnak vek cekci in, mai’h hrang thatnak, mai zawn lawng ruat ih nung, hawl rerotu hlir kan si.

  1. Bawi Jesuh in amai zawn ruat loin midang hrangih nun a pek vekin Paul khalin cui a Bawipai nun dan thlun in, midang zawn ruatin khua a sa.
  2. Kannih khal Jesuh dungthluntu kan si ciau ih Paul le a hnuai lam ih kan hmuh mi, mithianghlim pawl vekin midang hrangih nun, mi zawn ruat thiamtu ding kan si.

a). Sem. 13:9, 14: 23-24. Abraham in Lot cu a duhnak hril hmaisa dingah hmun a kian. Cumi hnu lawngah Abraham cun Lot ih hril lonak hmun le ram pohpoh ih um dingin thutluknak a tuah. Midang duhsak hmaisa in, mi zawn ruattu zohthim tlak nun neitu a si.

b). Sem. 14: 21. Abraham hnenah thil hmuahhmuah co dingih pe siangtu Sodom siangpahrang bawipai’ nun hi zohthim ding kan si.

c). Sem.23: 6-11. Sara phumnak ding leiram Abraham in a dil tikah an thlan le an leiram siang zetih hmang tirtu Hit miphun pawl hi tulai Khristian pawl hrangah zohthim tlak an si hrimhrim.

d). Sem. 44: 33-34. A nau, nauta bik Benjamin aiawh ih sal tuan dingin Judah cun a nunnak a thap mai. “Keimah sawn hi na sal ah ka rawng tang pei” a ti fuahfo mai, zohthim tlak ngaingai mi a si.

e). I Sam. 11: 12-13.  Saul ih siangpahrang sinak duhlotu pawl that thluh dingih an dil tikah Saul cun zohman that lo dingin thu a suah mai. A ral pawl hrang tiangih zawnruat theitu bawi a si.

f). I Sam. 23: 17-18. A pa, Saul siangpahrang ih kut tuar lo dingah David ih nunnak humhimtu Jonathan ih duhdawtnak nun hi a thukin a ropi nasa.

g). ISam. 24: 17-18. Amah that dingih hawl rerotu Saul ih nunnak cu laksak thei a sin an David in that loin a zuah. Maih ral rori that lo tiangih zawnruattu a si.

h). Tirh. 4: 33-34. Tirhthlah pawlih hohanak in zumtu pawlin an neih le siah ziangkim an hlawmaw ih, a tul dandan in an zemaw derhdo ti mi kan hmu.

i). Paul ih Pathian hnatuannak bawmtu rinum zet an si hleiah an inn tiang in zumtu pawl hrangih khawmnak  dingah hman siansaktu Prisilla le Aquila tei’ nupa nun hi zohthim tlak ngaingai an si.

Thu tlangzualnak: Midang zawn ruat thei ding cun Duhdawtnak a tul. Duhdawtnak tel loin midang zawnruah theih a si lo. Bawi Jesuh in “Nan duhdawtawk asile midang pawlin ka dungthluntu nan si kha an lo thei ding” tiah Joh. 13:35  sungah a tong mi kan hmu.

Hitluk ih a tlancak rero mi kan khawvel, kan leilung, kan ei hawlnak ramah midang zawnruat thiam ih mai hlawknak, hamthatnak caan (sungral)ngamtu ziangzat kan um pei. Midang zawnruat thiam ih mai hlawknak tlansan ngamtu si thei dingah , Pathian mithmai zohin nundan kan zir ciau pei.

 

(Visited 30 times, 1 visits today)

Comments

comments

3 Comments

  1. Ka Amen tuk. Thazang ka ngah zet. Mi dang zawn ruat a thu pi tuk.

  2. Malaysia ah kum 8 zikte sung sermon ka ngaimi hmuahhmuah lakih ka thinlung i neh biktu Saya Timothy Thiante ih sermon ‘Loosing my right for good cause’ timi thupi vekin hi sermon hin tumtahmi a nei.

    Salvation Army pawlin midang an bawm theu ti kan thei. An thilri pek suahmi pawl an zemnak bawm ah hitin an ngan, “Our Hearts to God, Our Hands to Man’ ti’n.

    Midang zawn ruah thiamnak hi Pathian ih sinak duhnungbik pawlih hramthawknak a si ding ti’n ka zum. Mai’ zawn lawng ka ruah tuknak ah kawhhran ah thlaraulam pitlinnak a mal ih, hmuh thiam awk lonak le zum awk ngam lonak a suak.

    Hitivek sermon hi ka hrang ahcun hngilh sian nawn lo ding pawl an si.

  3. Saya Thiante cu thusim thiam tak a si.

Comments

%d bloggers like this: