Mibum Hmang Ihsin Mibum Hmang Pawl Kaitu: Frank Abagnale (1948)

frank-abagnale-jrCatch Me If You Can’ timi film 2002 ih zuknung ih an tuah mi kha Frank Abagnale (1948) thuanthu sirhsan ih tuah mi a si. Frank hi a sentet lai ihsin mibum hmang tak a rak si. A nuahak laiah a pai Mobile card hmang in car parts tivek pawl a lei ih, cumi cu man awlte in Gas Station ah a va zuarsawng theu.

A nu le pa ih an kaihngah cun a pai hmin in tangka tamtak a rak bak zo ti a si. Cuticun, nauhak sualral deuh pawl retnak hmun ah a nu in thla 4 a ret. Hmanseh, that lam a pan lem lo cu a si hmang, a hung upa vivo ih mibum cu pumcawmnak ah a hun hmangso lanta.

Kum 1960 ahcun leitlun ram dangdang 26 leng lo ah US $ 2.5 million, man zat lai cheque lem a rak dengdarh man zo a si. New York ah a vai ih mibum hlirin a cawm aw. Veikhat cu amai bank account number cu bank deposit slips lem a tuah mi ahcun a hmang, mi in cumi hmang ih tangka an deposit (ret) mi pohpoh amai account ah a rak lut thluh ziar. Cuih bank in cui thilcang mi a vun theihsuah hnu cun, Frank cun $40,000 lai a rak eithup man zo ih, amah khal a tlanhlo cih ve. Kum 2 sung leng lo Pan Am Pilot (vanzam mawngtu) lemah a cang ih, an company vanzam in leitlun hmun dangdang ah a tlawng suak theu. Tumkhat cu an kaingah thlang ding ti a thei ih, Doctor lemah a rak cang man lala.

Medical Supervisor vekin thla 11 sung cu zohman ih theih lo in a tuan thei lala. A cang le lawyer vekin a um ih, a cancan le tlawng saya tla a tuan ih zohman in an thei dah cuang lo. Hmanseh, misual pawl ih vanthatnak cun tawp ni a nei an ti theu vekin, France ram ah an rak kaingah tariai, thla 6 hrawng thawnginn ih a um hnuah Sweden ah an kuat, Sweden ih thla 6 hrawng thawng a tlak bet hnuah US lamah an kuatsal. Asinan, lamlak ah a tlansuak sal thei.

Cui hnuah an kaisal ih, kum 12 sung thawng tla dingin thu an thensak. Cumi hnu rei lote ah Bureau of Prison ih Officer pakhat lemah a cang ih a tlansuak theisal. Rei nawn tak an hawl hnuah New York ah vanthat ah an kaisal ih thawnginn ah an kuatsal. Sihmansehla, kum 5 thawnginn sungih a um hnuah US Federal Government cun mi bum hmang pawl zinzawinak lamih an mah bawmtu dingih an duh ruangah zalennak ngah dingin an sawm.

Anih khal cun ‘Si seh’ a rak ti ih, cuticun, cozah lam bawm ding cun zalennak an pe. Tufang ih a dihmun cu ‘Abagnale and Associates’ timi company a din ih, sumdawnnak thil ih bum a tawng mipawl hrangah rawih theih in a um. Multi-Millionaire (a phunphun ih milian) ah cang.

-Thu Roling

Comments

comments

Comments

%d bloggers like this: