Mibanglo ihsin Mi’ Bang Lo ah

Mibanglo ihsin Mi’ Bang Lo ah

JC Kip Ling

Kan kiangkap ciar ah taksa le kut-ke kim lo simaw, piangsual lole kuttual leisam simaw kan hmu ttheu ko ding. Zaang an fak zet. Ahrekkhat cu mibanglo ah an cang lanta. Sinan, hrekkhat vethung cu beidong loin mi ropi suak thei tiang an zuam. Taksa himdam te le hrisel tha zetih kan um thei hi Pathian thlawsuah sunglawi a va si em. Suahsual bawlnak le bike cak mangkheng ih mawnnak menah cun Pathianin damcahnak hi in pe lo ding. Zir, siar, hna tha tuannak le milai pi hrangih thathnemnak hrangah hmang thei nungna dam man a um deuh ding.

Kuttual leisam ih khawsa, mibang sabang si thei dingih ruah ban nawn lo hnuih miropi suak thei pawl nun hi thazaang laknak hrangah kan run tarlang vivo tum ding. Tuitum cu mizengpawl thuhla in kan thok hnik pei.

Norlengtohkham parih Mi Ropipawl

(1) Stephen Hawking

Sir Isaac Newton(1643-1727) ih tohkham, Lucasian Professor of Mathematics, Cambridge University, run rocung theitu Professor Stephen William Hawking hi a ruangpum ih zeng a si. Albert Einstein hnulamih, tuini tiang nungdam lai scientist-pawl lak khalah Hawking hi cuangmuarbik ih ngai mi a si. Einstein ih thlawhhma run zulhpeh in, a tumbik mi vandumkulh thuhla(cosmology) ihsin a fatebik thahram thuhla(Quantum theory) tiangah scientist-pawl in a aan an ngai cu a si bik. Black Hole (Kaw Dumpi) thuhla zingzoitu khal a si.

Norlengtohkham par te ihsin vandumkulh a fang thei an ti theu. A taksa pumpi ah a kutzung vial a cang thei thlang nan, cumi a kutzung neihsun ih a control mi computer hmangin harhdan keukeu pawl theihthiam ban lomi science muril a phuangsuak thei.

A natnak hi thluak le zaangruhpi sung thihri mot vivo (Amyotrophic Lateral Sclerosis- ALS asilole Motor Neuron Disease- MND) timi zeng nat a si. Kum sawmnga zikte a ngorbet nakah a taksa rihlam khal pound 90 a luan thei dah nawn lo. A lu khal tung thitha thei nawn lo, tong, feh le cangvaih cu rel lo, thawthawt le rawl dolh hman a harsat thlang.

Cuti dinhmun ih ding cingin a thluak cu “Science fighter” asilole “Vandukulh Pubik” tiah an ko. A cabu nganmipawl tla cu scientist-pawl hrang hmanah an rit thuitho deuh ringring. Cupawl lakah 1988 kumih a nganmi A Brief History of Time (Caan ih Santhuanthu Tawi) timi tla cu 2003 kum tiangah khan bu ting 250 tlun an zuarsuak zo.

Hawking ih suah ni hi a mak-danglam ve hrimhrim. Vandumkulh thuhla rak hmahmuahtu Galileo ih thih cam kum zathum kim ni cekci 1942 January 8 a si. German ral in pukpi thawi’ England an thuat vanglai tak a si ih, a nu le pa cu London ah um ngam lo’n Oxford ah nau va nei dingin an zaam. (Phunsangtlawng umnak khawpipawl cu kapsakaw lo dingin England le German cun lungkimnak an nei.) A nu, Isobel Hawking, hi Philosophy, Politics le Economics zirmi a siih, casiar a paih zet. A pa, Frank Hawking, khal hi Biolobist (cinungphungphai) hliakhlaitu hminthang a rak si ve. Isobel cun a fatir neih ding hngahnak ah ti’n cabu a leiih a nau-na ra suah ding bawh in cui cabu cu a siar. A cabu lei mi cu Arsi Ramzuk timi cabu a si. A fapa ih hmailam caan ding hrang tinzohnak si awm tak!

Hawking a suah hnu reilote ah London ih a pai’ hnatuannak hmunah an kir sal. 1950 kum ah St. Albans an pan sal. Kum hra a kim tiang cu St. Albans Nunau Suakthuantlawng ah a kai. (Kum hra tiang cu hilai ah nunau tlawngah mipa nauhak tlawngkai an rak siang.) Kum 11 a kimin St. Albans Tlawng(mipa tlawng) ah a thawn.

Phunsangtlawng a kai thei ihsin a pa cun sii-lam zirter ve a tum. Sinan, Hawking ih lamkalzawng cu Physics a si fawn. An relbuai nawn hnuah Physics cu a la ngah cingcing. Oxford ih a zir thehin Trinity Hall, Cambidge ah Theoretical Astronomy and Cosmology a zir peh.

Cambridge ih kum hnihnak a kai laiah, zengnat in a kai thok. A pekte ahcun amah hmanin a theiaw lemlo. A tong a hak cuakco theuih, kedam hruh le phawih ah a buai deuh phahphah. Kum hrek exam thehin inn ah a tlungih, a pa cun a umdan fello deuh cu a kai lohli. Sibawi hnenah a fehpi. Sibawi cun lungphanum ah a rak ruat lem lo. Vitamin ei hrawng vial a rak cawh luklak.

A natnak cu a bese vivo. A thluak thahri le zaangruh tluan ah zengnat cun hna a tuan thlang.  Tlawng khal peh thei hrih lo’n specialist hnenah an tuamhlawm. Cui sibawipa cun kum hnih bak a dam nawn lo ding thu a rak sim.

Hawking ih sunmang hmuah an zuanghlo thluh. Scientist ropi si a rak tum naktuk ih thlanmual mitmei ih nisuak siar ding a si thlang aw! A pai’ lungphang cun a saya Dennis William Sciama hnenah a thesis cu nuainam ih thehpi huho dingah a dil. Beiseium a si nawn lo ruangah Ph D tal ngah man sehla tiah a beisei. Sinan, Hawking cu a thinlung a pacang hngin. A hmunto cingte cun General Relativity thu cu a zirsuak thotho. A saya khalin duhsak takin a bawmih Doctorate Degree cu tluangten a ngahsauk thei.

A piansualnak cu a nehawkter duh hrimhrim lo. Dingcung kallam ten, 1974 ah, Fellow of the Royal Society(FRS) sungtel ah a lut ban. (Hihi leitlunih science mithiam cuangmuar hleice sunlawihnak pawlkom a si. Kawlram ihsin Dr. Mg Mg Kha khal hril a si ve.) 1982 ah Order of the British Empire ih Commander, 1989 ah Companion of Honour, Bulletin of the Atomic Scientists ih Sponsor Board sungtel, 1974 thotho ah California Institute of Technology ih visiting professor, tivekin hlawhtlinnak ropi ziangmawzat a hmuso vivo.

Cuti’ hlawhtlinnak a ngah rero caan, 1974 so hrawng ihsi khan a natnak khal a luarkai vivo. Amahte’n rawl a bar thei nawn lo. Ihkhun hlumin a hmunto. A awlawh sal mi khal hi a ngaithangtu hrang lo ahcun theih a theih nawn lo. 1985 kum ah Pneumonia nat in a bet hrihih, a tongsuak thei nawn lo bembem. Cambridge ih scientist pakhatin tongfang sersuahnak khawl a tuahsakih computer hmangin thu  a rel. Computer bomnak ruangah a dang sungih aw-vau cu tongfang ah cangin midang thawn an bepopaw thei. Sinan, amai’ aw ngai suak loin thir-aw hungho in a suak. Tuihnulam ah tla cun a thilri hmanmi cu update tuah an tum rero thlang. Ziangahtile, a hlun tuk fawn, amah le a bese vivo fawnih, Hawking ih aw ngai a suak thei nawn lo tiah an duhthawh deuh. Cui thilri hmangih tongsuak cu a ol lo si hmang ding. Tunai TED Conference tum ah tla cun, thusuhnak pakhat let dingin minute sarih a awh ti a si.

Leitlun mi ropi lakih mi lamdangbik tlukah a cangih, mi callang deuhdeuh in amah tong dingin an pan theu. Mi relsiat le hlawhlengih tawihvahnak hrangah caan a nei ve lo. Ni poimawh le thuppi deuhdeuh ahcun an sawmnak hlawhtlinterin a feh ringring. Sunlawihnak zahkai tham taktak a ngah hnuaihni thlang fawn. Cupawl lakih langcu deuhdeuh tla cu-

·               1975 Eddington Medal

·               1976 Hughes Medal of the Royal Society

·               1979 Albert Einstein Medal

·               1981 Franklin Medal

·               1982 Order of the British Empire (Commander)

·               1985 Gold Medal of the Royal Astronomical Society

·               1986 Member of the Pontifical Academy of Sciences

·               1988 Wolf Prize in Physics

·               1989 Companion of Honour

·               1999 Julius Edgar Lilienfeld Prize of the American Physical Society

·               2003 Michelson Morley Award of Case Western Reserve University

·               2006 Copley Medal of the Royal Society

·               2008 Fonseca Prize of the University of Santiago de Compostela

·               2009 Presidential Medal of Freedom, the highest civilian honour in the United  States

Presidential Medal of Freedom sunlawihnak an pek ding tumah U.S. President Barack Obama khalin sunsak takin a rak hmuak. The White House sungih the Blue Room khualhlei room ah a rak mikhual a si.

A Bulpak le Innsang Nun Hrekkhat

A nauhak lai ihsin serthiamnak lam hi a rak thaw cia. A rualpipawl  thawn rang an to, cycle an to, radio an ngai, thurelkhawm an tuah, a lenglam ca an siar khawm ih tlawng hminthatertu an si theu. Ca an zoh phahin music an ngai ringring. Stage show tla an feh. Sakhuanak lam ih an hmuhdan tla an relkhawm theu. Hawking tla cu sakhuanak lamih sunlawihnak laksawng tiang a rak dong dah. An rualvahza in lehawknak thar tla an sersuak ih an polhaw hai. Hawking ih sersuahmi lehawknak cu a hnok ih thinlung pek a tul thei zet. Tlawngsaza ih thusuhnak a leh tikah, Hawking cun ziangtin a ruatsuak ih a pol timi kha a sangsangten a sim fekfo thei ringring.

Hawking tei’ innsang hi casiar le zuksuai lam khal an uar. thilhlun khawlkhawmnak innpi vek tiah an inn cu an ko theu. Amah Hawking ih room tla cu electronic thilri sia le sekrek hlun belcawng in a tapthlang a khat liailiai. An TV sia ihsin amplifier pakhat a rak tuahsuak thei dah.

A nupi, Jane Wilde, hi rak um lo ta bang sehla Hawking hi a dam khawsuak pei maw ti a si. Doctorate degree ngah khal rak beisei tuk nawn lo zo mi kha, Jane Wilde thawi’ an tonawk ni ihsin beiseinak thar le thinlung hlimnak thar in a zelih kum hnih vial dam ding kha tu tiang a dam phah a ti theih ding.

Jane Wilde (Jane Hawking) thawn fate pathum an nei. Robert, Lucy le Timothy an si. An nupa hin zumnak thu lamah an elaw phahphah theu.  Pathian um le um lo thu an elaw ih, Jane Wilde cu Fundamental takih thu la pawl a si ruangah, an thu a hmu-aw thei lo. A net a khawt ahcun thenawknak ah an hman phah. 1990 kum ah khan a si.

A hnu kum nga, 1995 ah a kiltu nurse, Elaine Mason, thawn an run neiaw. Elaine Mason hi Hawking ih tong theinak khawl duangsuaktu, David Mason, ih nupi bang a si. Nuthawli le pathlawi hrolaw rei na-na-na cu an erhaw ngah cingcing. Sinan, kum rei cu an thluahna-aw ngai man lo. 2006 kum ahkhan an thenaw sal.

A fatepawl ih nu, Jane Wilde, khal cu a lungleng maw, hmin ser duh ve hrimhrim ah lehlam, an nupa boruak hmuahhmuah cu cabu in a suah. Music to Move the Stars timi hminin, 1999 kumah, a voikhatnak a suah. A rak lar thihrulh si hmang ding, 2010 kumah rem le betin an mansalih, a bu hmin cu Travelling to Infinity, My Life with Stephen tiah lungkuai zawngin a thleng. ngan man a nei riai. 2007 ahkhan an hruai-aw sal.

Hawking ih fanu, Lucy, hi nunthuleng nganthiam a si. A fapa, Robert, cu a nu le pai’ thenawk lai hrawng ahkhan England ih um paih nawn lo’n, USA ah a vai. Nupi fanau a va neiih a um lanta.

A thluak that thu an suh tumah, “A ngaihnak ka va thei ve lo em. mai’ thluakthat uang-awtu cu an sung zo.” tiah a rak sawn. Sinan, “Cuti cu mi hleice na si lo tinak si pei cu?” an ti siri cun, “A tlunzim lam naih ka si cu ka beisei,” tiah a rak let.

Tuihnu lam deuh hin sakhuanak lamih a ngaidan hi a danglam bet hrethro. “Lei le van hi Pathian timi pakhat ih sersiam a rak si lo ding, science daan le dun ih remkhawmaw mi a si sawn ding,” tiah a rel. “Sakhuannak cu thuneihnak parih thumaw a siih, science cu hliakhlainak le khawruahnak parah a thumaw. Curuangah Science in a neh sawn ding, ziangahtile science cu thungaithlakin hna a tuan si lawm,” tiah 2010 ahkhan a sim. Hizawn ahcun Einstein thawn an thu a rual lo zet ding. Einstein kha cun, “Science hi ka hliakhlai deuhdeuh, Pathian ropitnak ka hmuhliah deuhdeuh. Mi hi ziang an ti saw maw, pathian sunlawinak hizat liangluang hi an hmuhhrelh theu?” tiah a rak rel sikhawh. Bulpak zalennak pan teh maw.

A cabu A Brief History of Time cu mi vangtlang hrangah theihthiam a har deuh si hmang ding. Scientist dang hrang hmanah a ritih, theihthiam a ol losi hmang. Voikhat cu vanzam parah sumdawng pakhat hin cumi cabu cua siar rero. A kiangsangih to pa cun, “Ai, khami cabu cu na rak siar simaw? Kei ka hrangah cun malte’n a rit deuh,” tiah a ti. Sumdawngpa cun, “Cuti mawsi, kei ka duh tuk hokhaw, ka thlah thei lo lawlaw. Na theihthiam lonak cu ka lo simfiang kei cu,” tiah a rak sawn. A suttupa cu Russian scientist mithiam a si ti a thei lo riai!

Comments

comments

Comments

%d bloggers like this: