Mi Thupi 6 Tonawknak Ding Thu Cu President In Hnawl

pu ting
Val Tai

28.11.2014
Rampi Dindaan Hrampi remsal dingah mi thupi 6 tonawk ding ih Pyidaungsu Hluttaw in a relcatmi cu tufangah cun a cangthei hrih lo ding tiah rampi hotu ih aiawh thusimtu mipi pehtlainak lam tlangbawi in a rel. Rampi Hotu cun pawlkom parah hrambun in tonawk ding a duh a si. Mi thupi 6 tonawknak hrangih an hrilmi tlangpar mi pawl aiawhtu ding Dr Aye Maung cun rampi dindaan hrampi remsalnak hrangih Pyidaungsu Hluttaw ih a relcatmi cu thupi zetih ngaihven sak a mawi na’n tiah a sim.

Dindaan Hrampi cu sanman in semrem dingah Pyidaungsu Hluttaw in mi thupi 6 tong aw dingin tuih thla ni 25 ahkhan poimawh zetin thu an thunlut ih eltu um loin nemhnget a rak si. Mi thupi 6 tonawknak ahhin Rampi Hotu, Pyithu Hluttaw Hotu, Amyotha Hluttaw Hotu, Pi Aung San Suu Kyi, Tlangpar mi pawl pawlkom aiawhtu pakhat le ralkap hotu tla an si.
Rampi Hotu ih thuphuangtu mipi pehtlaihnak lam tlangbawi zung ih Pyidaungsu tlangbawi U Ye Htut cun hih relcatmi cu tufangah cun a si thei hrih lo tiin a rel.

“Tufangah cun a si thei lo ding, hih tonawknak hicu! Ziangahtile kannih lamih naih tum daan le annih lamih in naih tum daan thuhla umdaan an bangawk lonak hnihkhat a um a si.
A veikhatnak October thla ni 30 ahkhan pawlkom pi 5, hih pawlkom 5 ti tikah ramthuhla lam party tete ah kan ti asile Hluttaw sungah siseh, Hluttaw lenglam ih ummi party pawl komkhawmmi hruaitu pawl sawm in relkhawmnak rak thok a si. Atu ahcun ramthuhla lam ihsin mi pakhat lawng a si ding vek khin a cang. Hitiih bangran awk lonak tete a um. Cun tlangpar mi pawl lam ihsin asile mani ah rampi hotu thawn an tonawk ahkhan tlangpar mi pawl lam khal in mi tam deuh telh bet an duh vek khin a lang. Cunah tufangah cun a cangthei lonak a si, ka ti.”

October thla sungah Uknak lam, daan suahnak lam, ramthuhla party, ralkap, hrilawknak commission tiin burte 5 par hrambun in tonawknak rak tuahmi a si. October thla cem zawngah cun a reihlanah hiti vek tonawknak tuah sal dingin tumtahnak neih a si thu, atuih Hluttaw ih relcat hnu ahcun hiti vek tonawknak nei sal ding cu a harsa thlang tiah U Ye Htut cun a rel.

Rampi Hotu ih lungput thawn pehpar in mi thupi 6 tonawknak hrangih hrilmi tlangpar mi pawl aiawhtu Dr Aye Maung cun a hmuhdaan hitin a sim.
“Pyidaungsu Hluttaw ih dindaan hrampi timi thuhla pahtlang theidaan lamzin cu tonawknak in remrel kan duh. Thuhla felfai ih thunluhmi parah thupi zetin lakin ruatkhawm sehla kan duh. Ziangahtile Rampi Hotu in Pyidaungsu Hluttaw parah ṭuanvo a nei a si. Dindaan hrampi bangtuk in asile a sangbikmi hrampi cu daan tuahnak lam hrampi a simi Pyidaungsu Hluttaw hi a si. Hluttaw palai 140 pawl ih thu an thunlutmi khi zoh sehla a fiang ko. Curuangah hih harsatnak hi lan thei daan lamzin pakhat lawng a simi Dindaan hrampi remsalnak thuhla tawlrel rerotu Pyidaungsu Hluttaw ih Parliament ihsin hmakhatte ah dil theih a si tikah hih thu ruat ṭha dingah rampi hotu ah ṭuanvo a um.
Pyidaungsu Hluttaw ih thunluhmi mi thupi 6 thu umdaan ahcun Uknak lam, Daan tuahnak lam Hluttaw pahnih, ralkap, a thupi deuhmi doldaltu party le tlangpar mi pawl aiawhtu tla ti duhnak a si tiin Dr Aye Maung cun a simfiang. Mi thupi 6 tonawknak ihsin Dindaan hrampi thubuai lan thei ding a zum thu tla a rel.

“Daan tuahnak lam ihsin a fekmi thuhla umdaan ca a thleng a si ahcun rampi hotu ṭuanvo rori a si thlang. Ralkap hotu khal in thuhla felfai zetin a cohlang thei ko ding. Mi thupi 6 tonawk dingih thuhla tuahmi hi kan zate ih suahlannak lamzin pakhat a si. Pyidaungsu ih suahlannak, dindaan hrampi ṭunghmunnak ih suahlannak tihi kannih khal in kan pom a si. Nehnak lamzin a zawhtu Pyidaungsu Hluttaw ih thiltidaan tiah ka ruat. Kannih tla kan ṭuankhawm tlang thei ve asile thuanthu roling pakhat remcang tein dindaan hrampi cu remsal thei ah a cang ding.”

Atufangah hicun ralkap hotu ih lungput suahmi a um hrih lo. Pyidaungsu Hluttaw cun dindaan hrampi remsalnak hrangah zohfel sal in reltlang a si zo ih nehhnu ih tuah dingmi Hluttaw thu relkhawmnak ah dindaan hrampi remsalnak hrangih daan hrap thunluh ding an nei a si.

(Visited 259 times, 1 visits today)

Comments

comments

Comments

%d bloggers like this: