Mi Parih Thatsuah Vs Relsiatawk

Mi parih thatsuah Vs Relsiatawk

By: Hniangsinpa

Zan cu a rei zet thlang, hmansehla ka ih cu a hmuh in a hmu thei lo. Ziangsi maw i mawlhtu um vek khin ka thei ih, thawh ding ah ti ding len, a thaizing ka zung se tiapti te ih kai a tul fawn, a zanlam ahkhan ka rualnu thawn thu mallai relnak kan nei ih, cumi cun ka thinlung a kap lala fawn. Zinglam nazi 2:00 Am a kim cuahco, ka mit sin har ka ti fawn, a thaizing ka tuah dingmi len ka thei fawn. A cuizan/zing khawhar thlak zet lak ahcun, ka duhzet mi kan calai le kan tong ngan ding cun ka ihkhun puap tuk lemlo ihsin ka tho ih, nupi neih cu tuk nan, tawng thei lo ti ta fam cu, daltu le cul nem tu nei fawn lo, mai thu ih nun lai ah tiin, computer hmai ahcun ka va to ih, ka rualnu thawn kan ruah tlanawk mi, “Mi parih thatsuah Vs Relsiatawknak” ti ngan ding cun tim lam aw phah in, ka kuak zual cu ka vun phawrh ih, thaw ti zet ih ka zuk hnu cun, ka ruahnak ngansuak ka pok.

Kan leitlun hi a rak mak ih, that kan suahnak ihsin kan dawn let tam sawn cu, relsiatnak hi a si bik ko tiah thuhram cu kan vun thawk. Kei cun mi parih that ka suah ciamco lai ka theih lo ruangah ka rak ngai khiaukhi men ih, anih cun rel sau ding a thei deuh a si kei cu, lungkim tuk lemlo ih a um can cu mi relse zawng silo in, a pawm dan zawng cun i vun sim. Si, that tuk khal ‘at’ cikhat a rak si thei a si hi.

Na rinsan zet ko ding, na kiangih an um lai ahcun, hmansehla na hnen ihsin an suah hnu ah, nangmah vek thotho ih, ka lo rinsan tuk titu hnen an thlen can a hung um tikah, mithmai tha co duh ruangah simaw, lole an hnen ihsin thiltha sawn beiseinak ruangah, a tha zawng cun an lo rel siang nawn lo ding. Ziangah tile, na hnen ihsin an duhmi an hmu zo, tu cun mi dang hnen ihsin an hmuh a cu tla a si thei, lole halhsik phan ruangah tla maw a si thei vingvo ko. Curuangah mi parih that suah le a ral (enemy) pakhat cu relsiatawk hi a si ko tiin ka ruat. Ruahnak cu zo cio khalin kan nei ih, cui kan ruahnak relsuah khal cu bulpak covo a si thotho.

Mi va rel siat duhnak thinlung thawn ka ngan lo ih, ralrinnak khawnglawng tum sakawk duhnak thinlung thawn ka ngan ti cu, kan Laimi hi zat phunsang kai um zo cun kan theihthiam ka beisei. Mi parih that kan duhtuk nak khin, mualphonak tlang zim ah mi a dinter thei ti hi kan theih tul zet mi pakhat cu siin ka hmu. Thatsuah timi le mitha timi khal hin danglamnak kau zet an nei, cu khal cu theithiamtu kan si a pawimawh zet.

Veikhat  lai thotho ahkhan, ka rualpa pakhat cun, ningna zet in i ruah  dah. “A hrang ah ziangkim ka tawlrel, ram leng a thlen theinak ding khalah, cun nupi a tawnnak ding hrang khalah, hmansehla ramleng a thleng ta ceng maw ti cun, a harsatnak thu lo cu sim ding in nei dah lo” tiin. Cu khal cu a um thei mi a si, Lungawi thu sim salawk kan thiam derhdo khal hi kan hmasawnnak ding karbak pakhat a si.

Si, hiti zawng khalin a um thei, mi tha kan timi cun phut let a nei lo ih, thatsuah timi cun phutlet a nei theu. Mitha timi cu kan zahih, an parih that kan tum, hmansehla thatsuah timi cun phut let a neih ruangah, that kan suah paih lo a si mai, ti zawng khalin kan ruat men thei. Hmansehla, that an suah tikah phut let in nei ding ti thei na kerker in, an thatsuahmi hmuah co ta hratin, that kan suah let duhlo cu kan palh tiin ka ruat. Mitha an si lo ti thei na keukeu in, kan kawm tahrat ih, kan parih an thatsuahnak cu relsiatnak thawn kan rul theu mi hi a thabik ding ti cun ka ruat lem lo. Thatsuah timi relsiatnak thawn kan rulh ringring ahcun, zo ha maw harsat mangbang vansang kan lam ngaingai canah  kan parah thatsuah duh nawn ding.

Mi pakhat cun mikhual a nei dingih, a mi khual cu a hmel theih le sungkhat a si lo, hmansehla a mikhual a si ruangah tiin a parah that a rak suah. Cui a mikhual cu nikhat ni ni ah vanthatnak co in a hung dingsuak tahrat ih, a parih that rak suahtu in, ‘A parah that ka rak suah dah ih, tucun in bawm ve ko ding’ tiah bawmnak dilin a inn ahcun a va feh. Bawmnak a dilzat cu a rak pe lo nan, mallai cu a rak pek. Cui a rak mikhual dahtu cu a inn ihsin a suah tikah, a inleng pawl hnenah, veikhat in rak mikhual ve ih, cunah mi a beisei a si kha, ningzahpit um in, a inn ih ka um laiah hmuah, a cutin e, a khatin e, tiin relsia bang sehla, a inleng pawl cun, cupa cu mitha ah an ruat lo dingih, mi hlothlau ah an ruah tengteng ka zum.

Ka nolh bet duh, mitha le thatsuah hi kan theihthiam kei uh. Miin kan parah an thinlung that ruang khalah si hlah seh, that an suah hnuhnu cu, relse siang lo ih kan um thiam ve a tul. That an suah lai can ih kan dinhmun kha cing ringring tu kan si ahcun, relsiatnak thawn kan thungrul siang lo dingih, kan Laimi lakah relsiatnak in hmun khal a co lo ding, pakhat la pakhat thatsuah tlangaw derhdo ih kan um thiam ahcun, kan Lai hla pawl in sullam an nei dingih, kan calai khalin raltiangah, Tio ralah, Rihli parah hmun co in, man awl hiah hiah pawl khalin, kan Lairam hrang thunuam rel in an hni huahho thei ding tiah ka ruat.

(Visited 32 times, 1 visits today)

Comments

comments

2 Comments

  1. Na ca ngan mi cu tha ka ti in,thazang ka ngah zet!Lungawi!

  2. Dear, Hniangsinpa na dam ko ti aw. Caan reipi na ca nganmi siar ding a um lo hnu ah na rak ngan thei sal ih a lungawi um tuk ee!

Comments

%d bloggers like this: