Mi 8 (pariat ) Kapthat

Surbung Tlang Thuthang
By- Pasum
December 26, 2008.
 
Mi 8 kapthat
 
 Krismas Pa, Santa Claus vekih thuamaw mi pakhat Bruce Jeffrey Pardo kum 45 micun Los Angeles kiang Covina khuaih Chrismas lawmnakih telpawl meithalih a kah ciamco ruangah minung 8 an thi. Bruce Jeffrey Pardo hi a mikah nak hmun ihsi Km 25 a unau pai in ah a mahkhal thiih hmuh asi ve. Police pawlin an simnakah Pardo hi a lu ah meithal mu pakhat a lut tiah an sim. Pardo hin  a nupi thawi an ngaih awklo ruangah hi Chrismas pary ih telve a nupi leh midang pawlhi a kapih hi an Party tuahnak in khal meisa in a nawkkang thluhih miruak pawlhi an kangsezet tiah an sim..
 
Taleban in Pakistan bawmtum
 
 Taleban hruaitu Baitullah Mehsud cun lang hngan zetin Pakistan ralkap pawl an ttanpi thu a puangih. Hi vekih a puan ruangah Pakistan ralkap leh Jihadi tapung ticu hmunkhat ih ruahtheih an si. Pakistan mipi tampi cun an ramleh India do awknak ah Taleban pawlin an bawmdingah an ruatih. Asinan himi in an ram hmin a tisiat zia dinghi an ruatban lo tiah ruah an si. Taleban pawlin hiti vekih Pakistan an thlawp thu an puangsuak ruangah. Pakistan cozah cun taleban thawi an tantlanglo zia a puansuah ve  attul dingih cuitlunah a thiltuah mikhalin an ttantlanglo zia fiangzetih a langter thei a ttuldingih Pakistan hrangah thilpawi zet asithei. Taleban pawlin  a liamcia kum 6 ih Pakistan ralkap 1,200 an rak kahthat mi vun ngaih tuahsal tikah  tui Pakistan ralkap pawl an vunttanpi sal thei cu thilmak danglam zet asi tiah ramtampi in mak antizet.   Cuihlei ah Mehsud hi nikum October thlaih Karachi ih Bomb tipuaktu ih ruah asiih Pakistan PM hlun Benazer Bhutto thattu khalah  a hoha tubik ih ruah asi. Himi laiih Pakistan an thlawp thu an puanhi cu India donak dingah Pakistan leh Taleban pawlhi an ttangtlangih Pakistan cozah cu Taleban Tapung pawlthawi bangawmi ah India leh ramdang tampi cun an ruat…
 
China in Lawng ralkap kuat ding
 
 China cozah cun  Somalia ram Tipi thuanthum ih lawngrukhmang misualpawl kildingah a lawngralkap ziangmawzat a kuatding. China lawngralkap Destroyer ralthuam ttha zetzet kengpawlcun. Hainan tikulh Sanya lawngcawlhhmun ihsin   Somalia tipi thunthum ih misual lawng rukhmangpawl hi an panding. Somalia Tipi thuanthum Gulf of Aden hrawngah hin tuikum sungah lawngrukhmang misualpawlin lawng 100 lenglo an ruzoih a tlensuak nakdingah paisa tamzetzet an dil ttheu.  China ralkap thupuangtu cun Somalia lawngrukhmang pawlin tuikum sungah China lawng 7 an kaizo tiah asim.. Himi laiah tuinaite ah German lawng ralkap pawlcun Egypt ram lawng  Somalia lawngrukhmang misual pawih an kaihmi cu an runsuaksal tiah an simih misualpawl hi minung 6 khal an kaitel tiah an sim.
 
Relzo vekin kum 17 sung Cozah mumal umlo Somalia ramhi mipi vangtlang an harsa zetih. an ram hrek hnakih tamsawncu Muslim Tapung misual pawlin an uk sawnih danleh thupek felfai umlo ih ukmi an si. Relzo vekin kan dungkar ih US Secretary of State Rice in Somalia ih UN ralkap kuatdingih thu a putlut micu UN Secretary General Ban Ki–Moon cun tuidin hmunah Somalia ih UN ralkap kuat tikcu asilo atiih tuidin hmunih Somalia ih UN ralkap kuatcu thilttih nungzet asi tiah a rak elmi asi. Ban Ki-Moon in leitlun ram 50 aiawh pawlih ruahdan a lakkhawmnakah  Somalia ih UN ralkap kuat dingcu ram malte lawngin an duhih cu hmanah UN Peace Keeping Force  kaihruaitu siding duhtu an umlo ati. Somalia ram tipi thuanthum ih lawngrukhmang pawlkil dingah US, UK, Russia, German, Japan leh ramdangdang pawlin Navy leh raldonak lawngpawlhi an rakkuat rero zo.
 
Israel in Rocket hmangih Israel kap nawnlo dingah Hamas pawl ngen
 
Israel ram Cozah hotu pawlcun Palestinian ramih Hamas hotu pawl hnenah Rocket hmangih Israel an kahcu bansan dingin an ngen. Israel PM Ehud Olmert cun Hamas leh Islamic jihad  Gaza ih umpawlin Israel an kah ttheucu  an bansanlo asilen an zumhnakih nain Israel cun a sanglet tengteng ding ati.  Israel Foreign Minister Tzipi Livni khalin Palestinian Tapung pawlin Israel tile khua kut an thlak ringring asi ahcun Israel in kutlu dawmin a dawh ringring theilo ding tiah asimbet.Israel Foreign Minister Tzipi Livni hi  kumthar ih Israel ram hrilawk nakdingah PM cuhtum asiih a mahhi Israel Intelligence Chief khal rakttuanzotu asiih Israel leh Palestinian an biakawk khalah Israel ram aiawh ih an thlah mi asi. Israel in Hamas pawl minung pathun an thah ruangah Hamas pawlin karkhat sungah
Rocket 50 lenglo in Israel hi an kapzo..
 
!!
 
 
 

Comments

comments

Comments

%d bloggers like this: