Mi 391 Thi Zo

Surbung Tlang Thuthang
by-Pasum
January 1st, 2009.
 
Ca siartu zaten Surbung Tlang thuthang in Kumthar cibai kanlo buk.
 
Ropi Zet’n Kum Thar lawm Asi
 
2009 kumthar cu leitlun hmunkipah ropi zet’n hmuah asi ih. Australia ram khawpi Sidney ah cun mipi 1,500,000 in Sidney lawng colh nak hmunah meisa mawi phunphun nawk alh in  kumthar hi an hmuak. London khalah minung 400,000 hrawngcun Thames tivapi kapah pung khawm’n kumthar hi an rak hmuak ve. NewYork khal ah President hlun Bill Clinton leh a nupi US Secretary of State thar Hillar Clinton in kumthar lawmnak hi an hmanpi ih. kumthar thleng ding hminsin nak  Crystal Ball cu an nupa in an ti nung asi.  Arab ram Jordan leh Syria pawl khal’n Israel leh Gaza do awknak titawp an duhzia langter nakah  Krisma Thlirakar ti’h theihmi Pacific Ocean ah kumthar hmuahnak hi an rak hmangve.
 
Bangkok Nigh Club Kang Mi 60 Lenglo Thi
 
 Thailand ram khawpi Bangkok ih Nigh Club thazet Santika cu mizan kumthar hmuahnak ih meisa mawi eng nawhkang mi ruangah a kangih minung 60 lenglo an thiih midang 200 lenglo’n hriamhma an tuar.Kangmei suahnak sanhi hi Nigh Club in sawnghnih tlunta sawnih sin meisa mawi nawhmi cu Electric eng mawi vanmi in a short ih cumi ihsin a suak tiah a hmunih um Somchai Fendi cun asim. Hi nigh Club kangah hin a hleice in Asia ram dangdang ihsi  Bangkok ih kumthar lawm dingih feh an tambikih . Mithi pawl lakah Australia, Netherland, Nepal leh Japan mi 10 lenglo an thi  ih cumi sungah minung 30 cu an taksa a kangsezet tiah Police pawlcun an sim.Hi Nigh Club kangmi in sung ah hin minung 1,000 lenglo an umih mitampi cu kangmei suah laiah an rak tlansuak man tiah Police pawlcun an simbet. Prime Minister Abhisit Veijajiva khal’n hitawk hmunhi zamrangten a va pal tiah an sim.
 
Israel leh Hamas  Do Awknak Minung 391 Thi
 
Israel in Gaza a kah nakcu niruk a kimih bansan a tum hrih cuanglo. Israel ralkap vanzam cun Hamas Parliament building, Justice Ministry building leh  building pawimawh dangdang tamzet a kapsiat thluhthlangih. Hamas pawlkhal’n Israel ram sungih Beersaba thleng Rocket in an kapve. Relzo vekin Israel cun nazi 48 sung Cease-Fire tuahding cu a el thla bepbep zo ih.  Hamas pawl’n Israel ram sungih Rocket an kahlut sung cu Cease- Fire tuah an duhlo thu an simih. Israel cun Hamas pawlcu hiti vekih an cangvai vivo ding asi ahcun Gaza ah Israel ralkap pawlhi an luh mai a ttul ding tiah an simbet.  Himi laiah Egypt leh Lybia in UN ih Resolution an put luh micu US leh UK cun an sawiselih. Hi Resolution ah hin  tuittum buainak suak tertu bik Hamas pawl’n Rocket hmangih Israel an kah sawisel nak thu a umlo anti. Cu ruangah hi Resolution hi a feh tlangtheilo. Palestinian pawl’n an simnakah Israel vanzam’n Bomb a thlaknak ah Palestinian minung 391 an thi tiah an simih Israel mi 4 an thive..
 
US Ralkap Vanzam’n Missile In Pakistan Ram Sung A Kap Sal
 
US ralkap vanzam Pilot umlo mahte zuangthei Drone in Missile in Pakistan ram sungih Taleban leh Al Qaida pawlih umnak hmun a kap lehsalih mi 5 an thi ih midang ziangmawzat in hriamhma an tuar. Pakistan Privet TV Channel in a simnakah South Warizistan ih Karikot khua ih ralthuan keng mipathum Motor ih tlanlai cu US ralkap vanzam pilot umlo Drone ih sin Missile in a kapdawi ih a hmunah an thicih ih hmundangih Missile kahmi khal’n mi pahnih a kapthat tiahnasim.
 
Tui kum August thla insin Aghanistan ramsungih um US ralkap pawlhin Pilot umlo raldo nak vanzam Drone ihsin Pakistan ramsungih Taleban leh Al Qaida pawlih umnak hmunhi vawi 20 lenglo an kapih Missile Bomb zaa lenglo a tlazo ih. Taleban leh Al Qaida hruaitu ziangmawzat an thizo ih midang zaa tamzet khal anthizo. Pakistan cozah cun US ralkap pawl’h thilti dancu a sawisel zet ttheuih asi nan US ralkap pawlcun  kanral cu khuitawk hmunih ta khal kandawi vivo a ttul ti’n an thilti micu an phalo.
 
 Relzo vek’n Afghanistan ram sungih Taleban leh Al Qaida pawlhi NATO ralkap pawl’n an umnak hmunpawl an luah vivo tikah Pakistan ram sungah an tlanlutih um hmun an khuar ciamco ih cumi cu US ralkap pawl’n Missile in an kap dawi vivo ttheu asi..

Comments

comments

Comments

%d bloggers like this: