Mexico Ram Swine Flu Nat Nak

April 28, 2009
Mexico Ram Swine Flu Nat Nak
Mexico ram ihsi Swine Flu natnak darh vivo ruangih minung thizat cu 149 an kimzo. World Health Organisation (WHO) Assistant Director General, Keiji Fukuda in a simnakah Mexica ram ihsi Swine Flu natnak cu leitlun ram dangdang khal ah a kai darh vivo zo ruangah hi natnak pungzai vivo lo dingin leitlun ram dangdang khalin ralrin nak an neih a cuzo asia ti.
WHO pawlih himi natnak pungzai vivo  tih nung bancin an tah nakah level 4 a thlengzo ih  a sangbik leh tih nungbik a thlenlo nak cu level 2 lawngin a samlai a si an ti. Himi natnak do nakding sii cu thla 4-6 sungih tuahsuak thei an tum thu khal an sim. Himi natnak hin US, Canada, Spain, Britain ram pawl a thlengzo ih, hiang  ram mithiam pawlin nasa zetin a do nakding an tawlrel rero lai.   Mexico ram ah cun  tlawng Inn leh mipi vangtlang punkhawm nak hmun pawlcu May 6 tiang khar an si tiah  Mexico Health Minister, Jose Angel Cordova cun a sim.
Venezuela Cozah In Peru Ram Ih Sin A Ram Palai Ko Kir
Venezuela ram Cozah in thubuai a tuahsak ih kaih a tummi Munuel Rosales,  Nikum ih Maracanbu ih Mayor cu Peru ram Cozah in humhim nak a pek dingthu a puang. Manuel Rosales hi  kum 2006 ih  Venezuela rampi hril awknak ah tui an President Hugo Chavez cuhtu a sih ih, Zulia State ih Governor hna a tuanlai tuikum March thla ah khan  i ruk thubuai leh kum 2002 ih President thah tumtu ih puh a si ruangah  a sa himnak hawlin Peru ram ah a tlan lutih  humhim nak a dil vekin Peru ram Cozah cun humhim nak a pe asi.
Himi ruangah Venezuela ram Cozah cu Peru ram par ah a thin a heng zetih, Venezuela cun Peru khawpi Lima ihsin an ram palai khal a ko tlungsal a si. Venezuela Foreign Ministry cun Peru ram Cozah cu International Law pahbal ih thilti ah a puh ih Manuel Rosales hi an ram Courth hmaiih a thubuai relfel dingah an ramih kuatsal dingin an dil asi. Venezuela ram Cozah cun  Peru ram Cozah cu Venezuela ram mipi zah lo leh zianghman ih rello ah a puh ih i ruknak leh misual do nak ding thu ah hna tuanpi tlaklo a si ati. Himi lai ah Peru Foreign Minister cun himi thu ah Peru Cozah cun thilti sualmi a neilo ih International Law vekin thil a
ti sawn a si ati.
Spain Ralkap In Lawng Ruk Hmang Misual Kai
Mizan ah Spain ralkap pawlin Somalia Lawng ruk hmang misual minung 9 an kai. Hi lawng ruk hmang misual pawlhi Seychelles kiangah lawng fate thawn tipi an luh zik zawngah Spain  lawng ralkap pawlin raldo nak lawng cakzet thawn an dawi ciamco ih Meithal thawn tin in an lawngcu an ti dingter ih cumi hnu ah misual pawlhi an kai suak thei asi tiah Spain  Defence Ministry cun an sim.
Hi misual pawlhin tihni sun ah Italy khual tlawng lawng minung 1,500 phurtu Melody lawng an timi cu kaih tumin an rak ti ding tum ih, a sinan  lawng hnatuan Navy lawng ralkap pawlin an kah ve ruangah rusuak lo ih an him thluh ih cumi veten hi lawng ruk hmang misual pawl hi Vanzam leh raldo nak lawng thawn Spain ralkap leh India Lawng ralkap pawlin an dawi cih in  mizan ah hi misual pawlhi an kai ngah suak a si. Tui naite hrawngih lawng ruk hmang misual an kaih ngahmi lakih mi pawimawh hotu deuh pawl lakah minung 3 cu France  Cozah in a hrengtar laiih US khalin minung 1 a hrenglai.
Helicopter In Thawng Tla Ru
Mizan sunah France Indian Ocian  ih Tikulh pakhat ih Thawng Inn ihsin  Misual hmin thang Nunau sualpi hmangzet leh Biaknak fehsual ih hotu mi pakhat Juliano Verberd kum 27 micu a rualpi minung 3 in Helicopter hmangin an rusuak ih an tlanhlo pi.
Hi an rualpi thawngtla runsuaktu minung 3 hin khual tlawng menmen vekin helicopter hi an to ih an zuan ngah hnuah a mawngtu cu an lakih minung pakhat in meithal thawn a thin hna ka ah sawhin  Minung pakhat in Petrol puahnak Bomb tipuak cih ding in a keng thotho ih thawng Inn pan dingin an fialih, Thawng Inn ih an rualpi an ruk ngah hnu in an zuangsuak tersalih hmunhla pi ah an tumter ih cumi hnu in Mawtaw in hmundang ah an tlan tiah Helicopter Mawngtu cun Redio Station pawl hnen ah a sim. Juliano Verberd hi nikum ah kaih asiih a mahhi nunau sualpi hmangzet asiih kum 15 thawngtla dingih a thu relcat sakmi asi.
Pakistan President In Nuclear Ral Thuam Hum Thei Ding A Ti
US  Secretary of State Hillary Clinton in Pakistan Nuclaer ralthuam leh a ral thuam pawimawh dang pawlcu Taliban pawlin an laksak pangding ti phan umzet a si a ti micu, Pakistan President Asif Ali Zardari cun  Pakistan Nuclear ralthuam cu a him asi tithu leitlun theih ah a puangih Pakistan Cozah cun a nuclear ralthuam kil him dingin timtuah awknak thazet a nei asi ati. Tui dinhmun ah cun Taleban leh pawl dang zo vek khalin tibuai tum khal haiseh la an hlawhsam ding asi ati.
Taliban pawlin Swat Valley ramih thu neihnak an neih hnu ah hmun dangdang ram kau nawr vivo an tum ruangah US leh ram hrek khat pawlcun Pakistan Nuclear ralthuam cu Taliban pawlin an laksak leh ding a phan umzet asi tiah an rak tongsuak zo.Himi lai ah Pakistan Cozah in taliban pawl thawi biak awknak ding a timtuah micu a tulhsan salih. Hi an biakawk tummi a tulhsan salnak cu  North West Frontier Province ih Pakistan ralkap leh Taliban pawl an kah awk rero lai ruangah a si.
Himi hmun ih Taliban pawlcun Pakistan ralkap pawlin Missile leh Rocket Louncher thawi Taliban pawlih um men an kah hmaisak ruangah a si an ti,Asinan Pakistan NWFP Information Minister,  Mian Iftikhar Hussein cun  Taliban pawlin pakistan ralkap Duty um men lai an kah hmaisak ruangah asi a tive.  Swat Valley ramih Mipi vangtlang pawlcun himi hmunih Islam dan Shari law hman ruangah rualrem awknak zianghman a suak cuanglo ih Taliban pawl zalen zetih an um theinak men asi ih Mipi hrangah thil thalo sawn asi anti.
Pakistan leh Taliban pawl kar lakih palai tuantu Sufi Muhammad ih thu puangtu Ameer Izzat Khan cun Tihni sunih  hotu Upa pawl tawng khawmaw cun  North West Frontier Province ih rualrem nak thutiam an tuahmi cu  Pakistan Cozah in a siatbal salih Taliban pawlcun rualrem awknak thutiam neihbet an duhnan Pakistan Cozah lamin kah awknak bansan an tum cuang silo ah cun rualrem nak thutiam tuah miin umzia a nei cuanglo a si a ti.
Pakistan Cozah thupuangtu cun himi hmun ihsi Taliban pawl an tlansuak lai hlanlo cu hmailam nawrih meithal an hmehpuak vivo tumthu an sim ih biak awknak in umzia zianghman anei thei cuanglo asi ah cun Pakistan Cozah cun lamzin thar a hawldinga si ati. tui an do awknak hmun ihsin mipi pawlcu an tlansuak lai rero ih mi tamzet tar tahak lai khal an tamzet. Taliban thupuangtu Muslim Khan cun tui an do awknak san bikcu Pakistan Ralkap pawlin biakrem awknak thutiam an pahbal hmaisa a si ati.
(Visited 43 times, 1 visits today)

Comments

comments

Tags:

Comments

%d bloggers like this: