Mell Ih Mit-hmai Panmi Zuk

September 13

Zarhpi Ni

 

Mell Ih Mit-hmai Panmi Zuk

 

Siar:

Rom 5:1-5

 

Cule harnak kan tuar tik khal ahhin kan lung a awi thotho;

ziangahtile harsatnak in tuar theinak a suahter.    – Rom 5:3

 

Kumkhat Sung Baibal:

–   Thufim 16-18

–   2Korin 6

 

Mi hrekkhat in Bible sungih zuksuai hi an duh lo nain ka fanu Melissa in a Bible sungih zuk a suaimi cu ka lung a awi. Rom bung 5 nak ih a kap ah cati rong (color) a hring in mit-hmai panzetmi zuk fate a suai ih a caang thumnak (Rom 5:3) cu cati riin in a kulh.

 

Kum (17) a ti ah rin lopi in mawttawka accident in a thih tikah a innsang le a rualpi pawl in hih Bible caang hril hi kan ttul ding ti ziangti’n a thei a si pei? Himi Bible caang hril in a thuanthu in sim leh dingih kan nunnak le midang pawl ih nunnak a kaihruai ding ti a liamciami kum (7) ah ziangti’n a thei a si pei?

 

Zumnak thawngin thiamcoter mi kan si ih Khrih thawngin Pathian thawn remdaihnak kan nei (Rom 5:1). Melissa cun cuih daihnak cu a co zo. Atu ahcun a zumnak ih rah a ngah zo. “Zumnak thawngin kan comi Pathian ih zaangfahnak sungah Amah in in thlenpi” (c.2). Mit-hmai panzetmi zuk fate Melissa ih a suaimi kha mit-thlam ah a cuang thei zo.

 

Duhdawt mi pawl in in fehsan ih kan taangta: cule harnak kan tuar tik khal ahhin kan lung a awi thotho; ziangahtile harsatnak in tuar theinak a suahpi, tuar theinak in Pathian lungkimmi a si ti a langter. Cule Amai’ lungkimnak in ruahsannak a suahter ti kan thei” (cc.3-4).

 

Riahsiat caan khal ah ruahsannak kan nei; a tumtahmi a si ih kan thinlung sungah duhdawtnak le ruahsannak in burh.

 

Lungawinak le riahsiatnak ra uh,

Lungkim in kan cawl ding,

Thluasuah co vekin ka ruat aw ding;

Rundamtu ih duhdawtnak thinlung cu,

Lei le van ih thil ziang khal in an tthen thei lo.

 

Pathian in riahsiatnak sawhlek thawn lungawinak tikhur a lai.

(Visited 38 times, 1 visits today)

Comments

comments

Comments

%d bloggers like this: