Melbourne ih Chin National Day ah

100_20791

CT/Melbourne, 23 February 2009

Australia, Melbourne thleng Chin mi 1600 lenglo lakin mi 700 hrawng cun A vei (61) nak Lai Phun Suah ni Chin National Day (CND) ni sunglawi lawm ve dingin Feb 21, 2008 ah Williamstown Town Hall, Williamtown ah pung khawm awk a si. 

Melbourne CND tuahnak ah Chin mi hruaitu upa Dr. Lian Hmung Sakhong, Chin National Council (CNC) chairman, Vice chairman of Ethic National Council (ENC) le Dr. Ngun Cung Lian Chief justice of Chin National Front (CNF) cu khual upa ah sawm an si. Chin mi upa dangdang hlei ah Jose Alvarez, state Director of DIAC khal in hi nisunglawi hman pinak an nei. 

‘Khawitawk hmun kan um ih ziangvek dinhmun kan thlen khal a sile kan semsuahnak kan Chin nunphung hi kan hngilh ding asilo, a pholangtu ding kan si’ tiin Dr. Hmung cun a ra suak khawm tu Chinmi pawl hnenah thapeknak le fuihfialnak a nei.  

Lailam phun ruk (6) laamnak le zaihla sak nak khal neih asi. CND densan ih saphawsirh (football) lehpannak ih pakhatnak a ngah tu Melbourne Chin Corporation le pahnihnak Hornbill Chin Association of Australia le a pathumnak Lailun Pawlkom Melbourne pawl lawmmnan peknak khal khual upa in an nei.  

Miss Thian Tling Za Kim le Miss Grace Ngun Dim Par in caan hmannak daan kaihruai nak le thupuannak an nei. Rev. Arohn Kuung ih thlacam nak le hlannak Pathian hnenih a neih thluh veten a vei (61) nak kan lai Phun Suahni cu sunglawi zet in hmannak neih thawk a si. Chin ram hrangih nunnak  arak thaptu liamcia hruaitu upa pawl suunnak le Australia, Victoria ih Meikang ruangih ninghang lusun a tuartu pawl riahsiatpinak hrangah cawllo ih minute (2) umnak khal Chin National Day cazual a siartu Florence Ciang Za Dim ih kaih hruainak in neih a si.                                                  100_20671

Chinram ih paam a tuartu pawl hrangih sumpai khonnak ah tiin hi nisunglawi ih a ra suak tu pawl hrangah Tisop khengkhat ah A$5 in zuarnak an nei. Caleb Thang Luah Khai Haunung, Chairman of Chin Festival Celebration Committee le President of Melbourne Chin Corporation cun ‘hi kan ngahmi paisa pawl hi Laitlang ih harsa a tuartu pawl lole Melbourne ih meikang pawl bawmnakah Red Cross ah kan pe ding’ tin CT palai hnenah a sim. 

A vei (61) nak Lai Phun Suahni hi Chin Festival Celebration Committee (CFCC)le Melbourne Chin Corporation (MCC) pawl ih hoha nak ih tuah mi a si. CFCC cu Melbourne ih thleng Laimi pawlkom pa thum MCC, Lailun Pawlkom Melbourne le Hornbill Chin Association of Australia pawlkom an si. CFCC hlei ah MCC pawl in zanghlei cawi in ttuanvo laknak an nei.

 

 

 

(Visited 53 times, 1 visits today)

Comments

comments

One Comment

  1. Ziang ruang ah lailun pawlkom mino zuk nan tar ve lo?

Comments

%d bloggers like this: