MEI ALH BANG IH A CAK MI MINO

MEI ALH BANG IH A CAK MI MINO 

Kang thleh khawnglawng awn cu ka thei ih, ka zan itthat lai cu ka thang dukdi, sangka te awngaw cia ahcun, ‘Ziang a cang si ding?’, tiin ka hliakhlai ve ih, ka hmai ih kangthleh mawtaw tlan vutvo cu ka hmu, hlazet ahcun meikhu suak hluahlo ka hmu ih, ka thinlungin, “Aw, inn a kang a si ding” tiah ruat phah cun, ka ihnak lam ah ka kir sal ih, ka lu in ka lukham a dai ciah ti cun, ka tum loh zet in, MEISA thiltithei zia cu ka ruat ih, kan san thawn ka ruat kawp vivo. Mino hi MEISA cu kan si ko lo maw? tiah, ka thluak cak lo zet cu ka kawm ih, “MEISA LE MINO” hi bangawknak kan va nei tam so!!! Tiah ka ruat suak. Cutiih ka ruahnak san cun, mino cu an thi a sa ol ih, tuahcih an duh bang in, antuah cih theu, cumi an tuah cu cak zet in an kai, hla zet ah meisa alh bangin an tlanpi ih, an feh cak tuk cu an bah pang hmanah, an dunglam pawlih man hlan ah an thosal man theu.  

Khuahlan kan pupa san ahcun, “Nannih nauhak men kha” tiah tongkam hman a rak si tlangpi ih, curuangah mino tamsawn cun an ti theimi a si khallen, upa sawn an rak kian ih, upa khallen an fa le ti thei ding a rak si hmanah, an thei le thei lo in an rak tuah tento. Hmansehla, santi a hung luang vivo ih, ram ukawknak le ram dan khal a hung danglam vivo ih, mino an rak cak zia le, mino in ram an rak lak neh zia khal a hung lang fiang vivo, mino caknak ram ah, um a nuam ih, hna a ngam ih, thaw khal a zaang. Cuti ka ti ruangah kan upa lam pawl ka mawh thluk in, an taw a rit ka tinak lam a si lo.

Mino in hna a tuan ih, a pumpek awk tikah, meisa bang in a kang ih, a alh hin alh hluahhlo in ka hmu theu, cumi cu upa pawl in an rak kham ahcun, a kang dan le a alh dan in sullam dang ah a her ih, midang hrang poi a suah ol zet, cumi ka rel duhnak san cu, nu le pa hrekkhat in an fa le ramhrang le mipi hrang, miphun hrang an vun tuan vutvo lai, an rak kham pang ahcun, kangthleh mawtaw in cakzet ih thelh a tum can ih, a ngah lo can a tam sawn ih, cucun mipi buainak tam sawn a pek bangin, mino ram hrang ih meisa bang cak vutvo ih tuantu, cu kham hlah uhsi. A kang sual pang ding.  

Ralkap cak le, ram cak ih kan ruat le hmuh mi pawl ahhin, an mino an cak zia kan hmu ding, kohhran khalah, veng khalah, mino caknak hmun ih piang hi a him in, ral a muang. Upa in thu khungkhai zet ih an ruah mi an tuah suah cun, mino cun kar nga an rak kar man tlangpi tihi ka hmuh fiang zet mi pakhat a si. Ram hruaitu, miphun hrang tuantu khalah, upa hin hruaitu lu sinak hleilo cuh lo sehla, thu khungkhai ngai le poimawh thupi ngai ahcun mino hin an rawn ko ding, hmansehla cangvaihnak lamah, upa khalin mino an kian thiam a tul, cutiih kan cangvaih tlanih, kan tuantlang lawngah kan ram a mawi ding. Ram that a duhtu upa cun, a miphun mino a hmang thiam a tul, upa pawl in in hruai seh, mino cangvai kung, mino cangvaihnak hi a cak zia theithiamtu upa cu, thu tha ruatsuak thei upa tihzah tlak an si.

Cutin, mino khal himi ca ruangah, kan kiangkap upa pawl an sinak lawngin kan cuh ding ka tinak a si cuang lo, upa pawl thuruahsuah mi le an tawlrel mi pawl cak zet ih feh pi suak theitu kha, mino rinsan tlak an si ti kan theih fiang ve a tul. Cutin, mino pawl cu ramthatnak duh ih tlan kan si ahcun, kan sinak thei fiang in, Reformation kan tuah tum a si ahcun, upa thawn tuan kawp in, upa pawl ih cangvaih hngak men lo in, kanmah hi mino kan si ti thei in, alh in alh tlangkhawm sehla, kan ram kan miphun in damnak hnukhri thar a hmuh ka zum a si.

By-Hniangsinpa

Comments

comments

Comments

%d bloggers like this: