Mawhpalhnak Tampi

June 26

Zarhte Ni 

Mawhpalhnak Tampi  

Siar:

1 Timote 1:12-17 

Bawipa in a zaangfahnak tlamtling i run burh ih zumnak le duhdawtnak i pek.     -1 Timote 1:14 

Kumkhat Sung Baibal:

–   Job 5-7

–   Tirhthlah 8:1-25 

Hnattuan siouhtu mi pakhat in, “Kaih na tong dah maw?” timi thusutnak kha, “Tong dah lo,” tiah a let. A pahnihnak thusuhnak cu, “Tong dah,” tiah a lettu pawl hrangah tumtah in an sutmi a si ih, “Ziangruangah?” ti a si. Cupa cun, “In kai ngah dah lo,” tiah a let. Ziangahtile mawhpalhnak tampi a neih kha a thei aw!   

Paul in sualnak tampi a neih zia a thei aw ih, “Pathian cu i zaangfahtu a si, ziangahtile zumnak zianghman ka rak nei lo ih ka tuahmi hi ziang a si ti hman ka rak thei lo,” (c.13) tiah a ti. Amah le amah, “Misual pawl lakah misualbik,” (1Timote 1:15) tiah a ko aw.           

Hlan ahcun kan sualnak ruangah Pathian thawn a tthen aw mi le a raal tiah ruah mi kan si dah (Rom. 5:10; Kol. 1:21). Asinan kan sualnak kan phuang ih sual ngaidamnak kan ttul zia kan theithiam tikah Amah in in thianter ih mi thar ah in tuah.            

Kum reipi Pathian a thei zotu pawl cun in ngaidamnak le sualnak ihsin in runsuahnak kan hngilh ttheu. Kan nun hlun thu le atu ih kan hlawhsamnak phuang in a ngaidamnak hrangah Amah kan thangtthat tikah, “Na hnakin ka thianghlim deuh,” tiah Pathian thei hrih lotu pawl ti pang lo dingin in bawm ding.           

Thutak cu mawhpalhnak tampi kan nei cingin A zaangfahnak kan parih a langter ruangah Pathian lawng hi sunlawihnak co tlak a si! – Anne Cetas       

Kan zate’n tampi sual, tampi mawh kan si,

Kan sual ruangah mithi kan si;

Kan zate’n Na hnenah leiba kan nei,

Zaangfahnak neitu Pathian Nangmah lawng na si. – Bonar 

Tlintlaknak zianghman nei lo pawl hrangah

Pathian ih zaangfahnak cu an ziangkim a si.

(Visited 21 times, 1 visits today)

Comments

comments

Comments

%d bloggers like this: