Maw Mino Na Nolai Caan Hi Hmangtha Aw!

MAW MINO NA NO LAI CAAN HI HMANGTHA AW!

Thusimtu 11:9ff

Leilung tlun ih tleunak hi vei (365) le Nazi 8 hrawng kan hmuh tikah kum 1 tin kan siar theu. Minung pakhat in kan damsung ih can kan hman daan pawl cu a tlangpi thu in; 3% hi kan itthat, 25% hi hna kan tuan, thu nuam relnak menah 12% a liam, Rawleinak ah 8%, khual tlawn, lam lennak ah 8%, thlacam le khawm ah 0.7% kan hmang. HImi pawl hi a tlangpi ih kan tuahmi pawl an si. Kum 75 a nungdammi Nu/Pa in kum 33% a it. Kum 19 lawng hna a tuan, kum 9 cu nuamthurel men ah a cem. Thil thlen tivek pawl ah kum 7 kan rei. Kum 6 sung rawl kan ei. Kum 6 sung kan vak tawi. Khawm can le thlacam cu kum ½ lawng kan hmang. Kan caan hman dan hi tha tein vun ruat sal hman, tah na duh can a um men ding ka zum!

Tahthimnak ah na unau pa in paisa USA 4400 nikhat sung hman dingah lo kuat ringring sehla nahman theh lo a si le kuan sal ding lo ti bang sehla ziangtin na ruat ding. Tuilai ih mifim le miropi pawl thawn kan bangawk nak pakaht cu can ah hin a si. Milian, mifarah pawl khal nikhat ah minute 1440 an nei ih kan nei ve. Ziangruangah an nih hmuah an lian ih kan nih hmuah kan farah ti kan zoh a si le can hman kan thiam lo le can upat kan thiam lo ruangah a si bik tin ka thei.

Kan can hman daan hi vunruat sal uhsi. Minute in cun tampi a bang nan nazi in cu 24 hours lawng a si. Nazi 24 sungah kan it can vun lak awla nazi 18 hrawng lawng a tang. Nazi 18 sungah hin raw ei can, hmaiphiah can tivek pawl hi an tel theh a si. Israel pawl thuan thu kan zoh a sile, kannan ram pan ih an feh laiah , Pathian in van ihsin Manna sang thawn a cawm hai. Tuisun an ei dingmi thaisun hrang ah ret a theih lo timi kan Bible sungah kan hmu, Cutivek in can khal hi kan hman thiam a tul. Tuisun ih na can hi thaisun hrang ah hman sal a theih lo. Tidai kan bungter cia mi kan khawm sal thei nawn lo vekin, kan tikcu can sunglawi khal hi a liam hlan ah hmang thiam tu kan si ding hi a thupi.

Kan nih Laimi pawl cu caan ih uk mi si loin, kan mah in can hi kan uk sawn theu a bang. Kan nih laimi pawl cu nazi 9:00 ah thleng ding ti le thleng lo kan hmang. Minung tamsawn cun can hi kan upat ih a tik le cu can ah kan thleng theu a si. Kan nih pawl cu duh le thlai duh le tuan ah kan thelng can hi a pam hmai ti kan thei theu lo, curuangah mi kan bang thei lo nak a si tin ka ruat.

Sipuaiyi tama pawl in nikhat ah can hi minute 30 an ei a si ah cun thlakhat ah 15 nazi kumkhat ah ni 11, kum 10 ah thlakhat, an kum 40 ah cun, kumkhat a miat an ngah. Nikhat ih minute 30 hi a miattuk na ti pang ding nikhat ah minute 10 hman nei awla kumkhat ahcun kan Bible hi kan siar theh tuk ding a si. Caan hi kan fir thiam khal a tul zet, mi kan bangnak ding ah cun. Caan fir ti tikah thildang vekih fir si loin can a lawngmi kha luatter lo ding tinak a si sawn.

Tualai minung tamsawn pawl cun, a mal bik in sim sehla. Nikhat ah nazi 2 hi a lakah kan liam ter men theu. Nikhat ah nazi 2 kan liam ter a si ah cun kumkhat ah ni 45 kan sung, kum 8 ah kum 1 kan sung  asi. Curuangah Tulai kan mino paw kan can hman daan hi vun ruat sal hni uh si. MIno kan si vekin kan nuam can, fala kan len can ti khal a um ding a phunphun in …a sinain a tawk zawnte ih can kan hman thiam ding hi a thupi zet a si. Kan hnen ih can tha a ra thleng tikih, vokpi hmai ih sui le ngun an thlak ih a hmuh thiam lo vekin kan hnen ih a ra thleng mi kan can tha hi kan duhduh in kan theih lo in an liam pang maw? Kan simduh mi cu kan can tha hi a liam nak hmun le hma kan theih ding hi a thupi. Aliam cia can kan zoh tik ih kan zang a ram lonak dingah a hlun ihsin kan ral rin cia  atul. Minung pawl kan can hi hma khat te sung lawng sokhaw a si. Atu ah kan ra suak a tu lala ah kan thi lala. Kan suah le thih kar lak ah ziang hman an thlem aw lo a si ti ah leitlun mifim pawl in an sim theu. Hi kan nun sung can tawite sung ah hin in duhdawt bik tu kan pa pathian hi kan duhdawt ve a tul rori tin kan ruat . can hi kan rual pi thabik pa 1 ih kan ruah khal a tul. Kan rualpi tha, Can tha in mangtha aw maw ka rual in ti ding hi ka phang na sa.

Kan Bible siar mi sungah “ Maw mino na no lai can hi hmangtha aw” ti a si vekin kan can hi hman thiam a tul a si. Kan tik le cu can an liam hlan ah a mah Jesuh hnenah pan thlang uh si. Hlaphuah tu cun zamrang in rak pan aw na can tha a um laiah  runtu Jesuh in a lo hngak lai timi hla  aphuah. Ka duh zet. Thazang ka ngah zet…Albert Einstein, 1879 kum ah ULM timi khua, German ram ah a suak. Amah hi Judah miphun a si, cathiam lo tuk, a syapa in nangmah vek ih thluak sia ka hmu dah lo a ti. Asinain a zuam ih leitlun ih Scientist mi ropi pa 10 ah a hungcang ban thei. Hipa  in a timi cu, kan can tha pawl a lak in ka liamter siang lo. Caan hmahman ten ka hmang ruagnah himi dinhmun tiang ka thlen theinak a si a rak ti dha.

Newton D. Baller, Cun, Tuihsun ih Degree angah tu pawl hi thaisun ah ca an siar lo le casiar duhnak an neih lo ah cun, tipsun ah cun miaa ah an cang ding a ti. Curuangah tuisun ih mino kan zaten hmailam ih kan khua le ram hruaitu ding kan si ti thei aw in ca khal tampi siar ih kan um ding hi a thupi hlei ah kan can khal hi a lak ih liam ter tu si lo ding kan zuam a tul. Tuisun ih nazirmi fimnak in hmai lam ah lam a lo hruai ding tuih sun ih na tuah mi hin hmailam ah miih zohthim ding ih nun le can hman thiam a tul.

Tuisan ih kan san ti luan vek in can hman thiam tu pawl mi ropi le mi ih upat lomi an um lo. Mi ih upat mi le mi ih zohthim tlak ding ih kan um theinak ding ah kan can hman daan hi ruat sal uh si ti ka lo sawm. Caan nah man daan tampi sungah a tambik in pa pathiam hrangah na caang nah man thiam a siah cun na sir aw dah lo ding. Kan nih mino pawl in kan can tha neih sung ah um mentu si lo in a phun phun in can hman thiamtu kan sinak ding ah le rinsan tlak mino kan si theinak ding ah, Pa Pathian in a thar in thlua in suah sak hram seh. Amen…

Anthony B. LianThang

(Hms: Himi Cahram hi 2009, BTS kum 20 kimnak Megazine ih rak ngan zomi a si. Cumi laiah cangantu Anthony B. Lian Thang silo, rualpi dang Hmin in suah a rak si. Atu-ah a ngantu taktak ih hminthawi run thlahsal a si).

Comments

comments

Comments

%d bloggers like this: