Matupi Peng le Bungtla

1075766_603534909681363_337945134_n

Matupi Bungtla

Salai Chinsuh

Matupi Peng cu Hakha Peng le Thantlang Peng thlanglam ah a um. A thlanglam ah Mindat Peng le Paletwa Peng tla an um. 2316.8 skuaza miles a kau. Khua 141 a um ih milai 48700 hrawng an um. Matupi Peng cu tipithuanthum ihsin pi 3300 a sang. Tlangsang le kuam thuk lawnglawng a si. Hmunrawn malte a um. Lungting tlangzim cu pi 8961 a sang.

Tipi thupi pawl cu Lemro va, Bawinu va, Mitta va, Tisisarawng va tla an si. Bungtla ti tla cu Lemro tiva hna ah a um. A keuh mi thingkung pawl cu far, lawi, cing, nuang, mau, rua le a dang tuthing pawl tla an si. Milai pawl cu Lothlo an tambik. Pilher Lo an tuah ih fangcang tambik an cing. Vainim, be a phunphun, fang le phiang an cing. Hmuan sungah lingmaw, khawfi, laphak, le khasuan tla an cing.

Matupi in Hakha ah, Gankaw ah, Mindat ah mawtawpi thawn feh a theih. Khawte lam tlawnawknak zin cu kezin hlirte a si. Khat le khat biakawknak ah Matupi khua ah carek, thirhri zung le telefon zung tla a um. Khawte lam ummi hrekkhat pawl khalin telefon an hmang ve.

Matupi Peng ah ihkhun 50 tlem sizung 1, Taihne sizung 2, Rural Health Centre 8 le Sub-Rural Health Centre 12 tla an um. Cun, Phunhra Tlawng 5, Phunhra Tlawngkhuai 2, Phunriat Tlawng 8, Phunriat Tlawngkhuai 2, Mulun Tlawng 40 le Phunli Tlawng 133 tla an um.

Matupi cu Matupi Peng ih acozah khawpi a si ih tipithuanthum ihsin pi 3300 a sang. Milai 10000 lenglo an um. Hi khua ah ihkhun 50 tlem sizung, Phunhra Tlawng 2 le Phunli Tlawng 2 tla an um. Baibal College pakhat khal a um.

Bungtla Thu:: Kan dungah ka post zo nan, Matupi thawi pehparmi asi ruangah ka rak kom sal.

Bungtla

Bungtla thlaser cu Matupi ihsin peng 14 tluk hlatnak phaneng uksuh hisawnag khaw kiangah a um. Lairam ah a tumbik le a suabik tlaser a siih a mawi bik khal a si. Matupi ihsi khalin hmuh a theih.

Bungtla tlaser timi cu tlaser kiangkap ih ummi Laimi pawlih hminsakmi a si. ‘Bung’ ti cu a sannak in a tla, a sungihsin a bung, a hlawn tinak a siih ‘tla’ ti khal cu a tla tinak a si. Curungah Bungtla sullam cu ‘a tla’ tinak a si. Bungtla cu Tinsih khaw saklam ih um Aytawraw tlangzim a simi Lungkil lole Lungtin tlanghram ihsin tiputmi thlanglam ah a luang vivo ih lungkham hrapzet thlunin a luangliam vivo. Curuangah zohtlakzetmi, mi mit a lazet na’n tithiam lo pawl hrangah cun mi a rapzet. Bungtla hi Lemro tivapi ih tihna a si vekin Lai tongfim khalah ‘Lemro a thok Bungtla in’ timi tongfim an nei. Bungtla hi tipithuanthum ihsin pi 5000 leng lo a sang. Tlaser kiangkap lungkhampi ah Khuaibu tamzet an um.

Lungkhampi tlunah Batel timi tangpit damnak si, kamung si, Palap kua, si tuahnak tha thingkung, lungthi pawl an um. Lungkham kiangkap ah a tikcu can ih a partheumi senhri phunphun le amahte keuhmi thingkung siar cawk lo an um.

Tlaser kiangkap keh le vorh ah tupi makzet a um. Cui’ tupi sungah Pawpi, Ngal, Savawm, fung, Sakhi, Zathar, Zukneng ramsa phunkip umnak hmun nuamtak a si. Zawng phunphun, vate phunphun umnak a si. Laimi in kan uarzetmi Vapual vabawi umnak hmun khal a si. Cu vek hmun thupi a si ruangah Parliment san lai ih Wunna KyawHtin U Za Hoe in tlaser kimvel peng thum sung thing hau lo ding le ram tawi lo dingin a kham.

Thal tidai mal can ih a luangmi tidai tah tikah pi 4 tluk a kim thei. Furpi tidai tam can ah cun Pi 30-40 tiang a kim thei. Tlaser tluntabik cu a san lam pi 1000 tluk a sangih a dang pawl cu pi 100 tluk hrawng an sang. Bungtla tlaser hi hmang thiam seh la a suahpi dingmi electric power in Lairam lawng siloin Kawlram saklam zate sun le zan tleu pempem in kan vang thei ding.

Avawikhatnak Pyithu council san, kum 1975 ah Bungtla tlaser hi Hydro electric tuah ding thuhla zingzawi dingin Boyokegyi San Yu in Mindat a thlen tum ah a fial. Cui’ kum ah Makui Division, Pakukku ih ummi ralbawi Major Sein Win hohanak in Bungtla cu an zingzawi nain tuanpeh loin an um lanta. Tidai mal can hman ah Electric power Kilowat 264600 ngah thei dingmi a si.

Comments

comments

Comments

%d bloggers like this: