Marathon Tlan

September 1

Tlawngkai Nihnih

 

Marathon Tlan

 

Siar:

Filipi 3:12-21

 

Curuangah hmuitinmi lam ah zuamman ngah dingin ding tein ka tlan.

Cuih zuamman cu Pathian in Khrih Jesuh sung ihsin kumkhua nung dingah

in run kawhnak kha a si. –Filipi 3:14

 

Kumkhat Sung Baibal:

–   Saam 135-136

–   1Korin 12

 

1921 ih thokmi Comrades Marathon cu leitlun ih a tar bikmi peng 56 hlat tlanzuam awknak a si. Kumtin South Africa ah an zuam aw ttheu ih Bruce Fordyce in kum 1981-1990 sungah veikua a neh. 1986 kum ah nazi 5, minute 24, second 7 a rei ih 2007 lawngah cu hnakih rangin a tlantu an um.

 

Khristian pawl khal marathon tlan reromi kan si. Tlanzuam awknak ttheh tiang tlansuak dingin tuar theinak a ttul. Paul in Filipi zumtu pawl hnenih ca a kuat tikah, “Ka hmailam ih a ummi kha baan dingah ka dawh rero a si… zuamman laksawng ngah dingin ding te’n ka tlan. Cuih laksawng cu Pathian in Khrih Jesuh sung ihsin kumkhua nung dingah in run kawhnak kha a si,” (Filipi 3:13-14) a ti.

 

Bawi Jesuh in nunnak marathon tlan daan in zirh zo. Jesuh cu hmailam ah a co dingmi lungawinak kha a tumtahmi a si ruangah thinglamtah parih ningzak thihnak hman ziangah siar loin a tuar ih atu ahcun Pathian tokham vorhlam kap ah a to a si (Hebru 12:2). Cuih tlan zuamnak cu a tuah suak.

 

Tthazet in ttheh suak theinak thuthup cu zuamnak kan ttheh tikih kan co dingmi lungawinak laksawng, kumkhua Amah thawn um tlang dingmi hngakhlap a si.

 

A kawhnak aw ka thei tikah Amah tong dingin ka tlan,

I pom dingin Ruuntu ih baan a pharh cia;

Ziang hmuahhmuah pe in ka tlan rero,

Zum dingin midang khal ka sawm hngai.

 

Khristian zuam awknak cu thilcuh awk a si lo, tuar theinak a si.

(Visited 24 times, 1 visits today)

Comments

comments

Comments

%d bloggers like this: