Mani Ih Duhmi (Part-I)

kabia san tak
Zarhpi sun khawm ban tikcu Pudu Food Court ahcun minung an pialaw nohno. Mai’ duhzawng rawl an cah cio. Malaysia thleng  laimi tamsawn ih zarhpi sun an suncaw einak hmun a si tlangpi. Cung Sang le Sui Rem tei’ nupa khal sabuti an cah thluh hnu Sui rem cun  tonak a rak hawlih a rak to sung. Cung Sang cun Sabuti khengkhat le a rawi ding ttulmi pawl a rak kengih Sui rem cu a pek. Cule a mai’ hrang Sabuti khengkhat kengin a ra kirsal. Kinlan parah a rawl cu a von ret. Sui rem cu Sabuti  ei dingin cite le hnakphek pawl thawn a bawl rero lai, Cung sang khal a tonak a vong to zik zawngah a sirih a theihmi kawh ‘aw’ ruangah to ngah lo’n a khatlam a hei zoh. Sui rem khal a kaa sungih a san zikmi Sabuti dar hai cu la salin ‘aw’ a ratnak lam a hei zoh ve. Fala nonal tak pakhat, a hnipuan hruhdan khal smart zet le thengver emem cun hni siamsiam phahin a rak naih vivo an hei hmu.

An hnen a ra thlen in Fala nu cun neel zetin Cung Sang ih kiu a ra kai ih, “U Sang, na rak khawm maw? Zarhpi off ka ngah dah loih kei ka khawm man ttheu lo pi. Tuvek ih zalen zetih tonawk hi a va har ve ti” a rak ti. Sui Rem cun mitmeng phawlek takin a lu tlun zawnih mi pahnih sawnaw cu a hon zoh. A mitmeng ah thiiknak a tel ti Fala nu in a hmuh veten Cung Sang kut a kaihmi a thlah ih, “Aw…. Himi maw na nupi?” tiin a von sut. Cumi lawngin Cung Sang cu a thawthawt ding a hon mangngaih ih, “Aw… Si. Ka nupi, Sui Rem a si. Aw, Sui, anih hi Thiang Thiang a si.” Tiin Cung Sang cun pakhat le pakhat theihterawknak a von tuah.  Sui Rem cu a kut Kinlan parah suangin,
“Aw, nangmah maw Thiang Thiang? Na hmin cu ka theihnak a reipi zo nan tulawng ka lo hmu” a von ti. An pahnih in halhsiknak ih khat mitmeng thawn an hnihsan aw.  Cung Sang cun,
“ To awla, Thiang Thiang, ziang na ei ding?”
“Aw, khinah rualpi pawlin in hngak, Thaisun hnattuannak ah kan tongaw sal ding pam. Ka feh ding maw” a ti hnu ah a fehsan. Sui Rem cu a Sabuti ei lai a cawlih a bag a lak hnu ah a feh.

********
Inn an thlen in Sui Rem cun a bag cu tohkham parah a sepih a khel khatlam le khatlam ah a kut suang tahratin a dungih ra a pasal Cung Sang cu a rak dinkham. Lamzin tluanah Cung Sang cun a nupi a be tum rero nan Sui Rem cun biak thiam lo dingin inn thlen tiang a feh lan vivo. Sui Rem a thawthawtdan in a thinheng tuk ti a theihtheih. Thinhengnak le thiiknak rawi-aw a mithmai cun a mawinak zaten a tithim thluh. Cung Sang hrangah cuih mithmai cu sahrang hriamhrulhmi tongngah a bang. Ti kherkhoten a nupi cu a hei naih ih,
“Sui, Thiang Thiang thawih kan biakawk ruangih na thinheng a si ahcun ka lo simfiang ding”
“Hmm!!!! Ziangtin maw simfiang na duh? Ka ngai hnik pei cu!”
“Hi hlanah thuhla kan rak nei ti cu a dik ko. Asinan atu ahcun nangmah thawn nupa kan si zo si. Thiang Thiangin lo hmuh le lo ton a duh thei tuk nan caan remcang a um lo ruangah….”
“Cawl! Caan remcang a um lo ee? Keimah ton a duh thu veiziat a lo sim zo?! Cumi lo sim dingin veiziat nan tongaw? Ka thinhengnak hi ziangruangah ti na theifiang lo piin thuhla simfiang I tum cu na hnokter tum sawnsawn. Ziangah maw hmunkhat ah hna nan ttuan tlang ti thu I sim lo?”
“Hmunkhat ah kan ttuan lo pi”
“Asile, ziangah hnattuannak ah kan tongaw ding a lo ti? Cun…”
“Cun? Ziang maw?”
“Nupi nei zo ti a theih kerkermi nunau pakhat thawn kinlan pakhat ah rawl a ei zikmi mipa ih kut a kai timi cu????”
“Aww…. Khakha cu a nauhak lai ihsi U vekih I zohmi, I hnoh thei tuk ruangah a supaw thei ttheu lo ih si. Zianghman phundang ih ruah ding a um lo”
“Asile ziangah hnattuannak ih tongawk ding a lo ti?”
“Aw, an hnattuannak cu dawrttek tampi nei an siih a hlan ahcun hmun dang dawrah a ttuanih tu kha kan dawr hmai cekci ah minung an daihawk lo ruangah a ra tthawnmi si. Zarhkhat lawng a si lai. Sui, nangmah pakhat lawng rori hokhaw ka lo duh. Ka lo duh ruangah ka lo nei a sisi. I zum aw maw”
“Hmm…. Tu veikhat cu ka lo zum.”
“Hee… Ka lo duh tuk Boihte.” Tiin hni phahin Cung Sang cun a von pom. Sui Rem cu hni cuang lo’n Cung Sang ih ttang sungin talsuah a tum. Asinan Cung sang cun duat takin Sui Rem ih khabe kai phahin a hei hngialih Sui Rem khal um thei nawn lo’n a hong hni. Cule Cung sangih ttang sungah a vong bek hlenhlo. Cun, Sui Rem cu thil pakhat hon mansuahmi nei ti theihtheih zetin Cung Sang ttang sungih bek a lu cu a hon tungih,
“ Ee, zanlam kha ka rual nu in mo thuam zoh in sawmmi ka hngilh zikte. An mopuai sawmnak ca design ding khal kha kanmah in ring kha”
“Aa…. Singai ti. Tu nazi paziat?” tiin Cung Sang cun a ngel a von zoh hnu ah
“Aa… Kan feh cih ttul”
“Aw. Phone ka ko ta ding” tiin Sui Rem cun phone a hmet.

“Hello…. Vangte, in hngak zo maw? Tu inn in kan ra ding maw”
“….”
“Aw… Hihi…. Innah thil hngilhmi ka nei ih ka ra la duak. Tu inn in kan ra ding. In rak hngak hrih uh maw”
“….”
“Aww…. Kan ra cih kan rei lo ding kha”. A phone cu a bag ah a san salih “Feh kunguh” tiin An pai’ kut kaiin an feh. Mo puan sannak dawr ihsin Vangte le a pasal ding Piang Piang cun an rak hngak. Dawr sangka an luh zawngah Cung Sang ih phone a ra.
“Hello….. “
“…….”
“Ziangtin ee?! Khuitawk ah?!”
“……”
“Awaw…. Ka ra ding maw. Ka ra cih ding”. Cung Sang ih phone biak ‘aw’ theitu hmuahhmuah thinphannak ih khat hmithmai an pu thluh. Sui Rem cun,
“Uu, ziang thu saw um? Ziang thil saw cang?”
“Lian Lian paisa kuat dingih a feh lai Gangster pawlin a paisa an lon hleiah an tuahmawh a ti. Ka va feh ding. Vangte, kei ih zohpi cu nan ttul lo pam ti aw”
Vangte khal cun awsuah baibah zetin,
“Aw…. Ttul lo” a rak ti. Cuveten Cung Sang cu a suak vurvo cih.
“Khuitawk ah? Uu!!!!” Sui Rem cun thinphang nawn in a hei auh ih,
“Sui, thilumdan ka lo sim sal ding. Tuizan cu nangmahte na um ttul ding a bang” a ti hnu ah zinkel lan in a liam cih.

******

Vangte hrang mopuan hril an ttheh in mopuai sawmnak ca hrang design an pol. Sui Rem cun zohman ih sawmnak ca design ih an hman dah kel lo design thar a polsuak. Asinan a man a khung nawnih hmaisong phahin a zoh. Vangte ih pasal dingmi Piang Piang cun, “San sung veikhat tthitumnak ah Ka duhdawtmi Vangte ih lung tling ding rori ih tuah ka duh. Ziangzat a si khalle ka lungkim” a tiih an hni tlang hmurhmo. Sawmnak ca hrangah a Senpal(Pink) coulor , Apple pung a si dingih a kil le a kilin pathri sen thawn thluahin a laifang ah sihphelh in tuah dingin an lungkim. An thutum an ttheh thluhin thaw suak zetih zanriah ei tlang an tum. Cu zawng cekci ah Sui Rem ih phone a ra. A pasal hnen in a siih hni phahin phone a von kai.

“Hello… Uu, Mina cu ziang a bang? Ziangah tulawng in ko? Zanriah ei kan feh zik hokhaw”
“Sui, Ka phone battery a rak cemih ka lo ko lohli thei lo. Tuhi Johor ah kan um. Ziangkhalle hitawk ah unau sungkhat dang a nei fawn lo. Zan hnu ih ra tlun ding khal a cang thei lo lala ruangah tuizan cu nangmahte rak um ko aw maw.”
“Aw… Ngah ko ee”
“Sui, taksa hrek tlukih duhdawtaw kan si na thei ko. Phundang ah in ruat hlah aw maw”
“Aw, ka theithiam ko. Zianghman poi lo hokhaw. Na rualpi tthabik a si ka thei ko si. Cutlukih simfiang ka ttul lo. ”
“Aww… sile kha zanriah cu khatin va ei ko uh”
“Aw… Nang khal rawl tthaten ei aw maw”
“Ee law”.

Download-Love-Couple-Wallpaper
Sui Rem a thawpi a thaw. Vangte tei’ pahnih cun thuhla umdan an sutih a sidan vekin a sim thluh. Zanriah einak lam pan in an feh lai-ah rinlopin “Sui Rem” tiih kawh aw an thei. An pathum in aw a ratnak lam an hei zoh cu tlangval tuak thiauthi pakhat, hmel pheng nawn, hnisiamsiam in an hei hmu. Sui Rem cun, “Hey!!! Rin Thang, Ziangtik ah maw na ra thlen?” tiin hlimnak ih khat mithmai thawn a hei sut. Vangte le Piang Piang khalin, “Rin Thang!!!! KL  na ra ngaingai maw?” an rak ti ve. Rin Thang cun, “Umm…… Thaisun ka kirsal ding” a ti cun Sui Rem a mangbang tuk. Rin Thangih mitmu sung ihsi theihfiang tummi nei in,
“Khuitawk ah na kir ding? Ziangah kumhnih sung rori I pehtlai loin na um? Khui na hlo? Ziangah atu ka hmaiah na ra langih thaisun na hlosal tum lala?” tiin leh cawk lo thusuhnak a hon tuah. Rin Thang cu pan siamsiam ih a retmi a mithmai cu a kelten a hni siamsi lai thotho. Duhnung takin Sui Rem cu a von zoh ih,
“Hlapi ah si lo. Penang ah ka kir ding”
“Penang ah ee???????”
“Aw.”
“Ziangtik ihsin Penang na thleng?”
“Kum khat a kim zikte thlang”
“Ha!!!! Cumi rori in rak pehtlai lo hrimhrim in na um thei dan!”
“Umm……” Rin Thang in sim duhmi a nei nan a ttongsuak ngam lo. Vangte cun thilumdan theithiam zetin,
“Hey… Rualpi tongaw tla cu kan ei tlang ding si. Ra uh” tiin a rak tiih  an zaten  Zanriah ei tlang dingin dawr sung an lut thluh.

An tlawngkai lai thu pawl relin an hni an khek. Nuam zetin caan an hmang.  An zaten tlawng rak kaitlang dah an si. Vangte le Piang Piang cu tlawngkai lai ihsin an rak duhaw nan an innsang lamih lungkim lohlilonak ruangah an rak hlaaw lawk. Malaysia ah an tongaw salih mah le innsang hrang theitawk an zoh hnu ah atuih innsang khat din an tummi a si. Tucun khatlam khatlam sungkua khalin an lungkimpi thluh zo. Rawl an ei lai, nuam zetih thu an rel rero lai ah Rin Thang cun a thupten Sui Rem cu a zoh, a bih thup ringring. Sui Rem cun,
“Rin Thang, Fala na nei hrih lo maw? Na nauhak nawn lo hokhaw”
“Ka nei. A rei hlanah sawmnak ca nan dong men thei”
“Si maw? Na fala cu ka va tong caak ve! In tongter aw maw”
“Nan pa khal ka hmu duh ve si”
“Na hmu tuk lai ding”.  An thurel thawt laitak fangah Rin Thang ih phone a ra. Rin Thang cun, “Malten maw” tiin a rualpi pawl a ti hai ih an tonak ihsi khatlam ralah phone a va biak. Sui Rem cu a hni ih “A fala si tengteng ding” a hon ti. Vangte cun Sui Rem ih kut von thai phahin,
“Hey…. Rin Thang ih mitmeng khi fiangten na zoh maw?”
“Ziang maw?”
“Rin Thang cun a lo duh tuk lai hokhaw. Yangon kan um lai khalah a lo duh thu a rel ringring. Asinan pasal na nei  ti a theih hnu ah Sui Rem in ka thuhla a lo suh asile fala a nei tiin simuh in ti. Tuih a rat ding khalah in rak sim thotho”
“Hey… Vangte, mani ih thil cangng cu mani ih ta a si. Ziangtik hmanah a thleng sal lo ding. Rin Thang le kei ih duhdawtnak cu mani ih thil a si zo. Mani in a liampi zo”
“Hmm…… Nangih hrang ahcun mani ih thil a si men ding nan anih cun tu khalah a lo duh tuk lai.”
“Vangte!” a hon ti zawngah Rin Thang a ra thleng. Sui Rem cu a tonak in a dingih, “Washroom ka feh ta ding” tiin a suak cih.

******

Sui Rem ih hnathlam ah     “Nang ih hrang ahcun mani ih thil a si men thei nan Rin Thang cun tu khalah a lo duh tuk lai. Sui Rem in ka thuhla a lo suh asile fala a nei tiin simuh in ti. Tuih a rat ding khalah in rak sim thotho” tiih  Vangte’h ttongfang pawl an rong thang ciamco sal. A lu a thing. Kut kholhnak basin parah a kut a kholh rero laiah a kiangih a theihmi ttongfang cun a thihri an cawlter dukdi! A kiangah fala pahnih an biakawkmi a theihmi cu, “Tuisun ih kan hmuhmi kha Thiang Thiang a si ko ti? Ziangtik ah saw  KL a rat? Cun, ziangtin saw Cung Sang thawih motor pakhatih an luh tlang? An motor tomi khi le Johor lam pan in a feh fawn. Ziangah Cung Sang ih nupi teh a tel lo?” tiin pakhat cun a hmuhmi fiang thei lo takin a ttong. A kiangih mi pakhat sawn cun,
“Thei ve hlah.”
“Thiang Thiang khin Cung Sang a duh ringring lai a bang. Tuisun motor an luh zawngih a kut a kaihdan tla kha!”
“Aa…. Cung Sang cun a nupi cu a phauhpian san lawmmam zik lo. Kannih in mi nupa karlak thu kan va relsak thei lo pi. Kan hnattuan khal a si lo. A nupi ih lungkimnak thawih an feh si sehla teh zo saw thei?”
“Si ve ko ti aw”. Sui Rem a thihri pawl an hit cum co! Washroom ihsin a suak ih a phone cun number a hmet ciamco thlang. Veithum tiang phone a luttlang nan kaitu a nei lo. Fala pahnih ih biaksawnawk kha a dik ding a phang. Thiang Thiang le Cung Sang cu nauhak lai ihsi komaw an siih an upat hnu ah Thiang Thiang cun duh ngai in a duh nan Cung Sang in nau vekin a zoh thu cu Sui Rem in a hna tlem lo khopin a theihmi thu a si. Tuvek tikcu ah, KL ihsin Johor tiang motor pakhat an to tlang. Cumi sung hmuahhmuah a pasal in phone a ko lo. Johor an thlen hnu pi lawngah phone battery a cem ruangah a ti. Cumi cu Sui Rem cun a pasal in phuahlam a hawl menmen ah a ruat. A ttah a suak tuk. A phone a hmetsal, a lut purpi lala. Kaitu a nei. Sui Rem cun ttong baibah zetin,
“Uu… Ziangah tulawng phone na kai? Na fala hlun Thiang Thiang thawn nan fehtlangih na nuamawk tuk si pei cu”
“…….”
“Uu…. Ziangah na ttong lo?  Ziangah Thiang Thiang thawn nan fehtlangmi cu in sim lo? Ziang thu hman I sim loin nuam na cen zik maw? Na rualpi tthabik a si ruangah ka lo theithiam tukih keimahte I tanmi khal ka lo ngaidam. Asinan Thiang Thiang thawn nan fehtlang timi cu ka lo ngaidam thei hrimhrim lo!”
“Pi Sui Rem, na thinsup aw.” Nunau aw a si. Sui Rem a thir dukdi. Cule Meisa kang bangin a thinglung an alh  hluahhlo. Ziangtin umngainak a thei lo.
“Hey… Thiang Thiang, ziangah kan pa ih phone cu na kai”
“Na thinsup. Thinhengnak in nun a tawiter thei hokhaw. Hinah hin U Lian Lian accident a tong ti ka theih ruangah zamrang takin ka rak tlanih….”
“Tawk! Cawl aw. Nang lo biak ka paih lo!”.

Sui Rem cun phone a thlak. A dinnak ah mitthli thawn a ding cercer. Cule nuamteten a vong to ih a mitthli dok thlurthlo nan awsuak in ttap lo’n a hmai a hup. Culai fangah a liang ihsin mi pakhatin a ron kai. A lu tungin a hon zoh. Rin Thang a rak si. Kiangkap ah zo an um ti khal zoh nawn loin Sui Rem cu Rin Thang ih ttang sungah a va betih a ttap. Rin Thang cun  nauhak aa bang a ttang sungih bekih ttap rero Sui Rem cu fek zetin von pom bet tahratih  duat takih von hnem a duh  nan a thluakih thutheihnak cun a rak dawnkham tuk ruangah Sui Rem ih phurhsam ah thapeknak le hnemnak langternak ah a kut zaphak thawn a von beng phekpho…………
Peh Leh Ding…………..

By/Mai Daidim

Comments

comments

Comments

%d bloggers like this: