Mangbangza Sersiammi Thil pawl

September 16

Tlawngkai Nili 

Mangbangza Sersiammi Thil pawl 

Siar:

Job 36:26-33 

Culai ahcun mi ih simnak lawngin ka lo thei; atu ahcun ka mit rori in ka lo hmu zo.    – Job 42:5 

Kumkhat Sung Baibal:

–   Thufim 25-26

–   2 Korin. 9 

Thingkung le tiva tamnak America ram nitlaknaklam a laifang hmun ih tthanglianmi ka si ruangah cutawk ih hramlak ramsa le vate pawl in in hiipzet. Asinan California ih tipithuanthum kap ka va tlawn tikah tidai sung le leitlun um ramsa pawl, hramlak thingkung pawl in in hiip sinsin. Rangzet in a zammi pelican vate pawl, hmunkhat ihsin hmunkhat ah a tthawn awmi vuilah-nga pawl ka zoh rero. Himi pawl hi ramsa tamzet lak ihsin ka hmuhsunmi an si. 

Hramlak ih um sersiammi (nature) pawl hi nauhak vekin mangbangzet ih zoh ding lawngah tuahmi an si lo thu Bible in a sim. Hih mangbangza thil pawl in kaa ih sim fiang theih lomi natnak le harsat tuarnak pawl kan parah thleng dingin a siangtu Pathian ih thu thei fiang thei dingin in bawm a si. 

Himi thu hi Job ih thuanthu ah kan hmu thei. Job in natfahnak le harsatnak a tuarlai ah Pathian in amah kha a thupitter ruangah Satan in a zumnak hniksak dingin a siang, ti a rak thei lo. 

A netnak ih kan hmuhmi cu fimnak le huham a neihmi mangbangza hih thil pawl a sersiamtu cu kan theihthiam lomi natnak le harsat tuarnak hrangah rinsan tlak maksak a si. Job in mangbangzet in, “Bawipa, nang cu ziangkim ti thei na si,” (Job 42:2) a ti. Ziangkim ah Pathian kan rinsan thei.  – Mart De Haan   

Pathian ih sersiammi thil pawl in hmu thei dingin in bom ahcun,

Ziangvek mangbangza thil pawl a tuah thei;

Cuti’n in tiamkammi pawl kan ring thei ding,

Ziangahtile in tiamkammi pawl cu a dik ringring.  – D. De Haan 

Mangbangza thil pawl in Pathian bia dingin in kaihruai a si ahcun, Pathian cu mangbangza thil pawl sungin biak a ttha.

 

(Visited 30 times, 1 visits today)

Comments

comments

Comments

%d bloggers like this: