Mangbangza Kim Tthehnak

Mangbangza Kim tthehnak

Jesuh in Sabit thur cu a tep ih, “A kim ttheh zo” a ti. Cule a lu a kuun ih a thaw a cem (John 19:30).

“A kim ttheh zo” timi ttongfang hi Greek ttong in “tetelestai” ti a si ih “a kim ttheh zo,” “ka tuah ttheh zo” ti a sawh. Thuthangttha Matthai sungah Jesuh cu napi in a au saal ih a hnuk a cat (Matt. 27:50) ti’n a um. Cuih au-aw cu nehnak au-aw a si. Spurgeon in, “Himi ttong kam khat sim fiang dingah a dang a ttongmi pawl an ttul. A zate’n a kauh le a tum zia tah theih lomi a si. A saangtuk ih ka ngah suak thei lo. A thuktuk ih ka tah thei lo,” a ti.

Jesuh in a Pa ih khuakhanmi parah a pum a pek awk daan cu a hnattuannak ah a lang fiang. A cemnetnak tiang a pe aw ih Pathian thu thlun in thinglamtah ih thihnak tiangin a tuar (Filipi 2:8). “Kei ka rawl cu i thlahtu ih duhnak tuah le hnattuan i fialmi ttuan ttheh hi a si (John 4:34), hnattuan i pekmi ka ttuan ttheh zo ih na sunlawinak cu leilung ah ka tarlang zo,” (John 17:4) a ti.

Jesuh in a zate’n a tuah ttheh zo. Profet pawl ih an rak sim ciami a kim hrih lomi a um nawn lo, ttheh hrih lomi hnattuan khal a um nawn lo. Pek hrih lomi duhdawtnak khal a um lo, tuar hrih lomi taksa le thinlung natnak a um nawn lo. Pa ih a thlah sannak hnattuan dingmi hmuahhmuah cu famkim te’n a ttuan ttheh zo. Cuih hnu ah a cawl. Cuih cawlhnak cu tha baang ih cawlh a si lo ih hnattuan ttheh ih hahdamzet ih cawlhnak a si.

Rundamnak hnattuan a ttheh zo ih raithawinak dang a ttul nawn lo. Biaknaklam ti daan keel ih tuah ding zianghman a ttul nawn lo. Minung thazaang suah ih zuamnak a ttul nawn lo. Kan zate hrangah veikhat tuah ah kumkhua daih zaangfahnak laksawng a simi rundamnak cu Jesuh in kim te’n a tuah ttheh zo.    – NTR

(Visited 28 times, 1 visits today)

Comments

comments

Comments

%d bloggers like this: