MAN KUAN/CAWI KAN NGAM LO

MAN KUAN/CAWI KAN NGAM LO

By: Hniangsinpa

“Man kuan ngamtu ih piang an thangso ih, diktak ih man kuannak ram ih piangah thansohnak in hmun a co sinsin” ti thu hi zawi sim le rel sawn mi khal a si lo ih, zobik ih tuah ding ti khal a um ce lo. Ram thangso ih kan neihmi pawl khi kan zoh tikah, kan ram ih olsam le thupi hlapi ih kan neih lo mi tiang khalah “tax” an kuan ih, cumi hmangin an kuannak zawnzawn hnatuan vivonak ah an hmang theu. Leiman, lamzin man, cumi khami man tiin an kuan theu, cumi rak kuan duhlo tu an um pang a si ahcun, ningzah za ngaingai a si ding. Cumi thu ka ngan hmaisak duhnak cu, “Kannih Laimi kha hin, a man kuan ngam sehla, thansohnak lamzin kan zawh kan ti rero mi hin hmual a neiin, a cak sinsin thei ding; tiah ka zum.

https://i0.wp.com/thumbs.dreamstime.com/thumb_112/1168515124M5hXqN.jpg?resize=269%2C350Ahmaisabikah, hlasaktu pawl lam vun zoh duak sehla; an aw neih mawi cu an hmangih, an thlanhri put in, theitawk in khui suah theinak dingah an zuam theu. A hleice in, kan Lairam ah an duhzah khawngnak ding a umlo ti cu kan fiang cio dingih, Kawlrawn le Kawlphai kau sawn hmanah zuar khal hai sehla, kan ram naih deuhbik Mizoram hlasakthiam pawl lakluh zat la lut ding cun, har ngaingai a si ding. Cumi cu theihsak kan tum lo ih, Internet in simaw, a man kuan lemlo ih neihdan ding hawl in, kan rak copy sak ih, a suahtu le saktu in an hmuh ding zat hmu thei lo in an um theu.

Ramleng thleng ta ceng, cuvek pawl cu duhti va si duh nawn awm lo ih kan ngaih mi pawl khal a hluarkai sawn ah an cang!!! An sungkhat unau zozo si maw hmangin email ah an kuat awk terih, cumi hmangin midang dang Computer ih thun thei dingin an tuah sak aw. Hlasaktu pawl kan uar ih, hlasak thiam karh sinsin nak dingih kan ram minung pawl kan duh ahcun, man kan kuan ngam ding a si. Ramleng khal in cahawk a har nawn lo, ramleng ih um sinsin hrang ahcun, aman khal kuan sang deuh mai sawn ding a si. Ramsungih um in, khui khatah Ks. 1000/- ih an lei ahcun ramleng um pawl cun, cuhnak ih man khungin kan lei ngam ding khi a awm sawn.

Singapore ih kan hruaitu pakhat thawn phone hmangih kan biakawk nak ka hngilh theilo mi pakhat cun, “Kan cabu hi kan lo kuat dingih, Singapore Dollar 10 in in rak zuar sak ding maw si?” tiah ka hei sut ih, anih cun “Malten maw, hinah cun cahmai pakhat ah cuti zat, kha ti zat tiin man khih cia (fixed rate) an nei ih, curuangah nan zuar thei ding ka zum lo” tiin in rak sawn. (An ram hmin ka salnak san cu a dik ruangah a si). Ram leng kan thlengih, kan hngilh mi tam sawn lakih ka duhlo zet mi cu, kan ramsung kan harsat zia kan hmu duh lo hi a si.

Hla lam ah, calai ah thansoh kan duh zet nan, a ngan tu le saktu pawl kan hlut sak ngam lo ih, ngan sinseh ti duhsannak hnakin, an ngan le an sak thei nawn lo duh sawn vek khi kan bang theu. Kan Laimi kan thansonnak ding ahcun, ramleng um tam zet tanrualnak kan tul ding. Rampi pakhat hruaitu thawn phoneih kan biakawknak ah, “Nan ram a thannak ding ahcun ramleng um pawl sumpai ih an tuan ngam a trul ih, ramsung um pawl in an thazaangin tuan seh” tiah in rak forh dah.

Si, thuthang tenau deuh simaw, calai tam zet a va si lo hmanah, a suahtu in a suah ahcun, a man kuan dingih ramleng um (a hleice in) pawl in an rak ralrin awknak thawmvang a thang ahcun, tui kan neihmi hnakin calai le hla khal kan nei tam sinsin ding. Hlasaktu le cangantu simaw, ca suahtu simaw in, man kuan ngamtu Laimi kan um ti an theih ahcun, an calai khal an duhfir in, hlasak lam khalah, ‘Ka sak thei ko’ ti men lawng siloin, zuam sin dunnak in an thinlungah hmun a co sin dingih, cucu kan thansohnak ding khal a si sawn.

https://i2.wp.com/www.etftrends.com/wp-content/uploads/2009/02/currency_transfers.jpg?resize=304%2C202Ram sungih um pawl sawn hmanin an lei ngam ahcun, ramleng um pawl cun tam sawn kan lei ngamin, kan cah ngam ding sawn a si. Ram sungih um pawl in an nikhat (General Labour) hlawh ih an lei ngammi, ramleng um khalin kan nikhat hlawhin lei ngam bang sehla cu!!! Aw… kan calai, kan hla etc., a va karh zai in kan va thangso ding so!!!

Ramlengah kan um ih, kan duhtik hmanah biakin thleng thei kupkap lovin, kan thlarau tulsammi hman dawng thei ngut lovin kan um ti cu, kan hruaitu thlarau mitmeng pawl cun an hmu thiam ding nan, hmansehla Pathian thuthangtha simtu pawl ko ding cun kan cem in kan kuan ngam cuang lo. Sumpai lawng kan kuan ngamlo a si lo, kan can kan ui ih, cui kan uinak cun Pathian in hlatter sinsin ti khal kan ruat ngam aw lo lawng silo in, kan ruat siang lo.

Cu tiih kan kuan ngam lo sung ahcun maw, thansohnak cun kan sungkua hleilo in thlen lo dingih, kan ram le miphun cu midung ah fehin, mi hnuaiah in kun ter ringring ding khi a rak si. Kan Laimi lak khalah, hnamdang upa thawn khal kan kawmawk tikah, Laimi cu pum khat si a har ding thu ka dawng tam sawn. Cumi ih hram cu ka hawl theu ih, ka hmuh hmaisakbikmi cu kan kuan ngam lo nak hi a si.

A par lamih ka simzo bangin, kan ram le miphun hrang kan ti ceng ahcun, a man kuan ngam kung, aman pe ngam kung. Cumi cu kan ram mipi khal a ti phur dingih, lamzin tharah a hruai ding. Kan unau Hakha hi kan tluk theilo zet in ka hmu, a san ih ka theih mi cu, annih cun an kuan ngam, hmin khal ah duh, an duhmi co ding khalin an can, an thazaang le an sumsaw kan kuan a si.

Cuvekin, Laimi sinak rak nei sawntu, kannih hin, kan calai hi kan duhih, kan Calai cu kan hminin siseh, Laimi tikhal, hnamdang pawlih in hmuhnak siseh, ti kan duh a si ahcun, kan kuan ngam ding a si. Kan pe ngam ding khal a si. Curuangah, ramleng um pawl, a hleice in, kan umnak hmun ihsin, kan Lairam thu le hla, kan Lairam thuthang kan thei ban thlang, cumi cu duhtawk loin, a man khal kuan ngam thlang dingin ka sawm aw duh a si.

Cutiih, kan kuan ngam ahcun, calai a karh sinsin dingih, ca nganthiam pawlin leilam thlawsuah beiseinak an nei thar ding. Cumi cun calai lam ah thansohnak in thlen dingih, kan ram cun hmelthar a suah ding. Kan hlasak thiam pawlin, thungai suahih hlasak duh sinsin nak an run nei dingih, thu le hla ah kan ram kan thang so ding hi a si.

https://i0.wp.com/www.growingwell.co.uk/images/huge_photos/shoot.jpg?resize=312%2C297 Calai kan neih tamnak le hla kan neih tamnak cun, kan Laimi tiawknak a sawh hnget dingih, thenhran theih loh khawp dinhmun ah in hruai ding. Kan Pathian thuthangtha phuangtu pawl khal an can sunglawi cu, leilam ro ruat loin an tuan thei dingih, kan ram in hmel thar a vun suah tik ahcun maw, ram tha le duhum za ngaingai ah a suah ding. Kan can, kan thazaang, kan neih sumsaw pawl hmuahhmuah, kan ram hrang kan ti ih,kan cem ral ih, kan kuan ngam ahcun, thansoh hlei lo hmabak kan neilo. Sinak kan duh ahcun, a man kuan ngam a tul. Lungrual kan duh khalah, a man kuan ngam a tul. Duhmi co thei ding khalah, a man kuanngam khal a tul.

Kan thlentum ram thleng ding khalah, aman kan kuan ngam a tul ti kan hmuh suah ih, kan theihthar lawng duhtawk loin, a tuah le tuan suak ngamtu kan si ding ni thlir in, kuan ngam uhsi tiin ka sawmaw duh a si.

(Visited 142 times, 1 visits today)

Comments

comments

Comments

%d bloggers like this: