Malaysia Vanzam Kapthla Tu Ah Russia Leh Ukraine An Puh Aw

imagesPu Sum

Theihcio zo vekin Malaysia vanzam Airline Boeing 777 Flight MH17 khualtlawng minung 298 phurtu cu Netherlands ram khawpi Amsterdam ihsi Malaysia ram khawpi Kuala Lumpur panih an zuan laiah Ukraine ram saklam Russia ramthawi an ritawknak Ukraine ram Cozah leh Russia lamtang Tapung pawl an doawknak hmun ihsi Km 40 hrawngih hla Grobovo khawkiangah kahthlak a siih, hi vanzam kapthlatu hi zo an siti fiangtei theihsuak nak a um hrihlo ih puhawk ton rerolai a siih  tuah hin zinzawi rerolai a siih a reihklanah zoih kahthlak mi ti leh ziangruangah an kapthla ti theihsuak beisei a si.

Hi Vanzam  Boeing 777 Flight MH 17 kahthlak nak ralthuam hi  Soviet-era 11 groung to air Missile a si ticu fiangtei theihsuak zo a siih, a sungih to minung 298 pawlcu an thithluh ih minung 102 pawlih ruangcu hmuhsuak an sizo. mithi pawlhi Netherlands ram mi 154   Australia 27   Malaysia 43   Indonesia 12    Britain 9   Germany 4  Belgium 4   Phillippines 3 Canada 1 an siih Malaysia minung 43 sungah vanzam hnatuan minung 15 antel.

Himi vanzam sungih to lakih mi tampi cu Australia ramih AIDS, HIV  thuhla relkhawm nakih telding pawl an si. Himi vanzam hi lei ihsi feet 33.000 ih sangih a zuan laiah biakpop theihlo in a umih cumi ihsi reilo te ah a tla ih a puakkuai ih a alhcih a kekkuai themparh pawlhi  Km 15 ih hla khalah an petdarh thluhthei ih, Ukraine Interior Ministry cun himi vanzam kapthla tuah Russia Cozah in an bawmmi an ram Cozah  Opposition tapung pawl an puhih hi vanzam kahnak cu Russia cozah in an pekmi Missile a si tiah an sim.

Himi laiah Ukraine Cozah dodaltu Russia ih tanpi mi Tapung hotu Igor Strelkor cun  hi vanzam kapthla tucu Ukraine cozah ralkap an siih kan nih in hivek vansang  ih vanzam kahthlak nak ralthuam kan neilo ruangah  mawhphurtu cu Ukraine Cozah an si tiah a puhve. himi hlante ah Igor Stelkor cun  Ukraine raklkap vanzam tumpi Antonov -26 an kahthlakthu a simih hivek ruangah mi tampi cun Ukraine Tapung pawlhin hi vanzam hi Ukraine ralkap pawlih tomi vanzam an an ruatih an kahthlak a si ding tiah zumnak an neiih a sinan theihfiang nak leh kut thin nak cu  a umlo.

Ukraine Cozah in himi vanzam a tlak hnute ah Tapung hotu pahnih ih biakawk lai an rak theihthup sakmi khal an relsuakih mi pahnih Major an timi leh Grek an timi ih biakthup awknakah hi vanzam kahthlak mihi an zohfiang thu leh Ukraine ralkap vanzam  AN-26 silo in Malaysia vanzam khualtlawng phurtu a si thu an relmi khal  an theihthup sak thu an rel. hi vanzam hi ziangruangah a tla timi  record nak Black Box khal hmushuak a sizo ih ziangruangah a tla timi leh Pilot pawlih tongmi pawl khal a rei hlanah theihsuakzum a si.

Himi vanzam tlaknak thuah UN Security Council cun Emergency Meeting a ko cih ih US Vice President, Joe Biden cun  hi vanzam cu tisualpangih tla silo ih vansang ih a zuanlai ih kahthlak hrimmi a si ruangah  thilsual titu cu zinzawisuak a si dingih  hremnak pek tengteng an siding US cun himi thu zinzawi nakah a ttul vekih bawmdingin a ralring a si tiah a simih, Ukraine President, Petro Poroshenko cun himi vanzam kapthlatucu Ukraine ramdotu tapung Russia ih bawm mipawl an siih an kahthlak nak ralthuam khal Russia ih pekmi a si ruangah mawhphur tucu Russia a si tiah a puh.

Russia President, Vladimir Putin cun  Ukraine Cozah in  a ramsungih mipi Opposition pawl a do ciamco ruangah hivek buainak hi a thlengmi a sii tiah a simih Russia President,Putin cun zoih kahthlak mi ticu  a sallo nan vanzam tlaknakhmun ram neitu in mawh an phurding tiah a sim. Malaysia vanzam hi tukum March thla khalah khan Kuala Lumpur ihsi China ran Beijing panih zuang minung 239 phurtu cu a hlo zoih tutiang a thuhla leh a umnak theih a si hrihlo.

(Visited 884 times, 1 visits today)

Comments

comments

Comments

%d bloggers like this: