Malaysia Feh Tum Pawl Puaisa Ralrin Tul

Falam Times, Malaysia
April 19 2012

Kawlram ihsin Malaysia ram ah tumtahnak a phunphun thawn a ra/feh tu minung hi nitin an um ringring. Chinmi tawkfang lai khal tu ni tiang ah mah le tumtahnak thawn Malaysia lam ah an ra thleng rero lai.

Ram pakhat va tlawn dingah sumpai tam pi a cem ruangah Chinmi tampi hrangah ram leng khual tlawn hi a ol lo na sa. Curuangah Malaysia a feh tumtu le a fehsuaktu Chinmi tawk fang lai cu puaisa tha lo pawl ih kut sungah harsatnak an tong theu.

A liam cia thla tawk fang lai ihsin Yangon ih um puaisa hrek khat le Malaysia ih puaisa hrekkhat pawl cu kom aw in Malaysia feh a duhtu Chinmi pawl cu tanglam zin (Thailand ram kaan in) ihsin Malaysia ram ah an luhpi. Tanglam zin ihsin ram pakhat va luh hi thil ol lo zet le tihnung zet mi a si. Lam lak ah accident a phunphun le acozah tuanvo neitu pawl ih kaih le khih ton a ol zet. Mi hrekkhat hrang ahcun khual tlawn lai fang hi a harbik lai caan a bang nan Malaysia an ra thlen ngah hnu lawng ah kan harsatnak hi a thok lawng a si lai ti an thei aw. Cucu thinlung tha lo le tangka a duh luar tuktu puaisa pawl an va zum ruangah a si.

A tlangpi thu cun Malaysia feh a tum nan tangka a nei lo tu pawl cu puaisa pawl hin Kawlram tangka Ks. 150,000 hrawng lawng dil in an feh ter. Asinan Malaysia an thlen ve ten zarh hnih sungah RM 2,500 (Kyat 620,000 kiangkap) ih an tlen awk thei lo, a si lole, tlen tu an neih lo a si ahcun cui Malaysia ih Chinmi/Kawlmi puaisa pawl cun an leiba cu RM 4,000 (Kyats 1,000,000) ah an kaih sak. Cuticun RM 4,000 an pek thei hlan lo hi Chinmi pawl cu cui puaisa tha lo pawl cun hna an tuan ter ih an hlawhman an lak sak.

Leiba thawn Malaysia a ra thlengmi hi Chinmi pawl cu cui puaisa tha lo pawl cun Malaysia boss pawl hnen ah hnatuan ter dingin an va ap ih, boss pawl cun cui puaisa pawl cu commission (puai-kha) an rak pek. Asinan hi puaisa pawl thotho in an milai pawl cu caan tawkfang hnu ah a thupten an va hruai kir sal ih commission ngah duh ah boss dang hnen ah an va ap lala. Cuticun Chinmi hrek khat cu Malaysia an ratnak leiba an kuan thei lo hlei ih puaisa pawl ih bum kualnak sungah an her aw rero. Sungkhat unau theihmi le um lo, Malay tong le thiam lo, visa le nei lo, kaih le khih le tih fawn si ih a umtu Chinmi tawk fang lai an um.

Curuangah Malaysia feh a tumtu cun a tanglam pawl hi nasa zet ih ralrin a tha:

-Tanglam zin hrimhrim in Malaysia feh lo ding.

-Mai hman mi puaisa pawl hi napin ralrin ding. Puaisa pawl ih simmi thu tam sawn hi rinhlelnak thawn a dik le dik lo cekfel ding. Puaisa pawl ih hminpi (full name), telephone number le inn address pawl famkim ten theih ding.

-Malaysia ih a um ciami sungkhat unau le rualpi tha pawl hnen ah thu theihternak tuah ta lo in feh lo ding.

-Malaysia a thleng tu pawl cun thlen ve ten Falam biakinn, asilole, Falam pawlkom pakhatkhat thawn a rang theibik in pehtlaihnak tuah ding.

(Visited 229 times, 1 visits today)

Comments

comments

2 Comments

  1. Hi vek ih theih ter nak na tuah hi a ttha ka ti tuk. Kan Chinmi kilhim awknak ding hrang ih hivek lung put na neih hi ka lo fak zet. Duh sak nak na neih mi parah le Chinmi duhdawtnak na neih mi parah Bawipa’n mal lo sawm vivo seh. Ral rin ttul tuk mi rori a si.

  2. Van Nei Zing says:

    laimi lak khalah duhamnak in hmun a luah hi cu thin a na zet a si.
    mahlawngte kan upa pawl ih in duhsaknak thawn in thei ter mi le tuah dingih in forhfial mi pompi thiam le rak thlun thei tu hrangah cun buainak hi a mal deu ko ding.Upat nak thawn duhsak tu upa pawl thu ngai thei tu sih zuam ceu uh si.
    kan laimi duhdaw thiam ih ruahnak le can nei mi hmuah cem in thazang suah tento tu upa nan zate tlun ah ka lungawi zet a si.Pathian in thlawsuah malza lo pe hai hram seh tiah thla za lo cam sak.

Comments

%d bloggers like this: