Malaysia Chin Rawl Dawr Tuksumza In Kaang

Malaysia khawlipi Kuala Lumpur ih Chinmi tampi colhni sun tin tonkhawm rawl einak hmun, LCF biakinn kiang, (Champion Club) kiangih Chin rawl phunphun ngahnak rawl dawr pi cu Febuary 12, 2017 zinglam 4:00am hrawngah electric shock ruangah zianghman suah man loin a kangfai ih motor 4 a kang cih thu le mi pakhat hliam nasa zet a ngah thu theih a si.

Himi dawr hi sunah rawl dawr ih hman a siih zanah Tuluk pawlin hlasak nomawknak ih an hmanmi, sun zan onmi dawr a si. “Kang mei a thawh dan cu zinghnam in electric wire an keumi a shock ih cutiih thok a si. Hmundang dang khal zinghnam in an rak țam țheu ih a lang theinak cu kan hmu țheu ruangah kan rak tuahțhat thei. Tuițum cu ceiling le luanglu karlak ih ta a si tikah zohman in kan hmu thei lo. Thil rimsia cu kan thei rero nan khuitawk in ti kan theifiang thei lo. Meikhu a rong suah cun a rak zaizan thluh zo ih zianghman tuah a theih nawn lo. Meithat pawl le an thleng thei loli lo. Cutin inn tlunta dot kah lo dingin kaihci thawn wire kan at cat ih a tlun cu a him. A tang dawr khaan cu zianghman suah man loin a ziamral thluh si ko” tiin dawr hngaktu Tedim mi Hau Pa cun Chinland Today thawn phone biakawknak ah a sim.

Dawr hngaktu (zan it cihtu) hi mi 8 an um ih cumi lakah mi pakhat hliam nazet tuarin zato a thlen thu khal theih a si. Hau Pa cun, “Dawr hngak, inn tlunta dot ih it mi 8 kan um ih mi 7 cu zianghman cang lo’n kan zan itnak thuamhnaw thawn kan luat. Kan rualpa kala pa cu a rak itthat zo ih a suak lohli thei lo. Sangka le pakhat lawng a um. Meisa lakin a ra suaknak ah a awm le a kut tipawl an kangih zato ah a thleng” tiin Chinland Today hnenah a sim bet.

Comments

comments

Comments

%d bloggers like this: