Malaysia Ah Chin Miphun Hrang Henry vl Hmangaih Hnatuan A Thok

Chin Christian YouthInternational (CCYI) ih vice president tuan rerotu Henry vl Hmangaih cun Malaysia ah Pathian le Chin miphun hrang pumpe ih ‘hnatuannak’ cu March 20,2011 ihsin a thok thlang ding.

Malaysia ih Chin miphun zapi hrang 2011 ih dinthokmi MAC tlawngah Business management zirtu pawl hrangah Mirang tong le mirang ca zirh dingin, tlawngta pawl Pathian thu le thangthatnak hla thawn cawm ih tlawngta pawl cu miphun hrang rinsantlak an si theinak dingah sersuah vivo a tum. MAC ih principal Salai Biak Chawn cun ‘MAC hrangih hlawknak lawng si loin, mirang tong le mirang ca thiam ngaingai a duhtu Chin mino hmuahhmuah hrangah hlawknak a si tengteng ding’ tiah a ti.

Chin miphun hrangih ‘Academic Centre’ ah hitivek ih cangvaihnak a thok ding hi Malaysia ih mino hmuahhmuah hin hlawkpi cio ding, ahleice-in ram thumnak (USA) feh dingih timtuah rerotu nulepa, mino hmuahhmuah khalin hlawkpi thei cio dingin lamzin tuah a si ding tiah MAC principal hnen ihsin thu kan dong. Tui lai fang ahhin MAC principal cu USA ah a um ih, Malaysia ihsin USA feh dingih timtuah rerotu kum (16) tlunlam hrangah ‘Zirnak tha’ a hawl sak rero ti a si. Ziangahtile, Malaysia ih kum (16) tlunlam hrangah USA ah High School ih tlawngca zir peh dingin harsatnak a um theu ih, kum (18) tlunlam hrang ahcun a lakih tlawngkainak (tlawngca pitling zirnak) a um lo lawlaw ti a si. 

Henry vl Hmangaih hi ‘Chin-English’ Dictionary ngantu a si ih, Mizoram ah phun hra tiang ca a zir hnu-ah zirnak le midang ca zirhnak lamah experience tampi neitu a si. Philippine ram ah Master degree zir rero lai a si ih, tu ahhin final year a thleng. Thu le hla lam khalah Chin miphun cawmtu a si vekin, Pathian hnatuannak khalah mi tampi hrang hminsintlak le upat tlak ih pumpe awtu a si. MAC tlawng hi Malaysia ih ram sung phunsang tlawng pehtlaihtu le cuih tlawngin an zirhmi tlawngca le an pekmi ‘Certificate’ pawl ‘zirh ih, petu’ Chin miphun hrang on rero mi tlawnginn a si. A dinsuaktu Salai Biak Chawn cun tuni tiangah principal a tuan ih, Business management, Practical Accounting, Computer thiamnak a phunphun le Mirang tong & Mirang ca zirnak a si.

Phunsang tlawng pehtlaihtu a si vekin tlawngkainak ding khalah ‘tlawng fee’ lak a si. Asinan, phunsang tlawngin anmai’ tlawngih an khuan zat hnakin 60% discount ngahnak a si ih, ahleice-in Chin miphun cu duhsak an si. MAC tlawng hi a kaitu pawl cu ram dangih tlawng an kai peh theinak ding, peh dan dingih theih tulmi pawl khalah ‘orientation’ pek vivo an si. Tu ahhin Business Management zir dingin mithar hrang a remcang hrih lo ding nan, Accounting le Mirang tong & Mirang ca zir a duhtu hrangah sangka on rero lai a si.

English Grammar le Speaking zirhtu ding ‘Henry vl Hmangaih’ khal Accounting zir ve dingin a timtuah rero. Ram dangih tlawng kai nawn lo dingih narak timtuah pang ahcun na dam sung hrang nitin ka um dan ding kha tu ihsin rel cia thei a si. Asinan, tlawng na kai peh ding a si ahcun na dinhmun cu ruahban loin a um thei. USA ah ‘Associate Degree ngahnak dingih tlawngkai peh a duhtu hrangah tlawngca zir ding an thok hlan ah ziangvek a zir hmaisa ta ding timi ‘Requirement’ tampi a um. Cuih subject (requirement) pawl cu Malaysia ih kan um sungah ziang maw zat zir thei a si ih, a rak zir zotu pawl cun ‘requirement’ hmuahhmuah zir bet tul loin College cu hmakhat te’n an kai thei theu ti a si.

Source: MAC (Malaysia)

Email:myacademic.centre@gmail.com

(Visited 99 times, 1 visits today)

Comments

comments

11 Comments

  1. A tha si.

  2. Lungawi um e, Pathian in lam lo hruai vivo hramseh! Ram le miphun cawisangtu na si bangin si vivo hram…..

  3. Duhdawtmi Hnat’uanpi Rual Henry,

    Malaysia ah Chin mino le mipi hrang tithei tawk suah ih hna na t’uan tumtahnak ca ka rak siar levetein ka lungawi, thlacamnak ka lo neihsak. Pathian in na tumtahnak hmun ah lo thlengter hramseh. Chin miphun ih rinsanmi sinak co vivo hram tiah…

    Dam le tluang tein,
    Salai DL Senling
    &&&&&&&&&&&&
    http://www.ccyinews.blogspot.com
    MIPI RIAN LOIN PATHIAN KAN RIAN THEILO

  4. A va lungawi um ve aw!

    To, Saya.Henry congrats for your new occupation.
    Mirang Ca thufim cun tihin a ngan. Serving a man is Serving God , Pathian
    Rawngbawl cu Minung pawl hrang ih tuan hi a si.

    Malaysia um pawl an vantha nasa, Pathian mihman le Pathian hriakthih mi in Ca lam siseh, Pathianthu lam siseh, Thangthatnak hlasak dan le Pathianthangthat hla mawi thawn a lo cawm in a lo bawm thei zik hi a va sunglawi ve aw! Pathian in Ropi tak in hmangseh

  5. Henry,

    Um!! na tha napin suahlaw.
    Kan Chin miphun in na thahnemngainak kan lo mamawh a si hi.

  6. Duhdawtmi rual le pi, u le nau,

    Nan duhsaknak ca ka rak siar ih tampi lungawinak ka nei. Pathian sunlawinak le kan miphun hrangah tla kap khatte ih cangvaih theinak le thathnemnak a si theinak dingah cat lo in thlaza in rak campi bet vivo hram uh law.

    Lungawinak thawn,
    Henry vl Hmangaih
    Kuala Lumpur, Malaysia

  7. Mai Zilthli Lal Nei Thluai says:

    Saya Henry,chin mipi hrang ih na pumpek awk dan cu a va sunglawi nasa ve aww. Bawipa’n na tumtahmi a tak in kimter hramseh. Kan chin mipi sawmdawl, cawisangtu khalah Bawipa’n lo hmang vivo hramseh.

  8. U Henry,

    Na ti tha tuk.

  9. Kaa ih miphun dudawt cu a ol te nan a tak ih tuan hi a har na pumpek awk nak hi a mak nasa hlawhtlinnak nei tu Pathian in lam lo hruai vivo hramseh .
    Nangmah vek kan miphun in kan tul nasa
    David

  10. Chinland Rose says:

    Henry,

    Malaysia um Chinmipawl hrangah fimnak meifar si hram aw!!!
    Duh vekih tlawngkai thei lo an tam tuk kha..//

  11. Lung awi um tuk aw!
    Bawipai sun lawi nak ah cang hram seh

Comments

%d bloggers like this: