Malaysia Ah Calai Seminar Nei

H.Sui Lian Mang, Calai SeminarTukum sungah a vei 3nak LCF Calai Seminar cu LCF, KL biakinn ah October 26, 2014 ni khawmtiak ah tuah a si ih mipi 40 hrawng an tel thei. Siar duhtu hrangah Seminar paper kan run tarlang.

Lai Christian Fellowship

Kuala Lumpur, Malaysia

Calai Seminar

October 26, 2014

Paper Timtuahtu: H. Sui Lian Mang

Thupi: “Tongfangkom”

Chinca in tuahsaktu in tongfangkom felfaitein in tuahsak man lo ruangah Chinca ngandan ah kan bangaw lo culci ih elawknak tete khal a suak. Tongfangkom hi cakalhmang (grammar) thlun in kan kom a tul.  Chin cakalhmang (Chin grammar) ah tonghran (parts of Speech) phun kua kan nei ih cumi pawl kan run tarlang.

Chin                            Mirang

1. Hmin                       (H)       Noun

2. Hminsawng             (Hs)     Pronoun

3. Tuahrel                    (T)       Verb

4. Fiangtertu                (F)       Adjective

5. Langtertu                (L)       Adverb

6. Khihhmuhtu            (K)       Preposition

7. Pehzomtu                (P)       Conjunction

8. Thinthawngtu          (Th)     Interjection

9. Kimtertu                  (Km)    Article, Particle, Clitic, Auxiliary pawl an si.

  • Chin cakalhmang ah tonghran zawngih tonghran thendan phun 9 sungah pakhatkhat a si ahcun a hrantein ngan ding a si.
  • Cuvekin kan kom tikah tonghran pakhatkhat a suah ahcun ngankom ding a si.

Tongfangkom thu ah kan theih olnak dingah a tanglam vekin kan run tarlang. Kan tarlangmi pawl hi awsuak pahnih le a tlunlam pawl an si ih tongfang pakhat in ngan tulmi pawl an si.

1. Hmin pawl tongfang pakhat ah ngankom ding.

  1. Ramsa hmin: vapual, sakhi, zukneng, tisartam, vasuangtuar,,,
  2. Thingrah hmin: sunhlu, dawhhlei, zamer,,,
  3. Hangrah hmin: fanghma, hlamhmai, bokbawn, pokpawr,,,
  4. Hanghnah hmin: antam, anhling, ansate,,,
  5. Hnipuan hmin: angki, bawngbi, nahzi, samkilh, mitkharh,,,
  6. Thilri hmin: haileng, pakan, cabuai, thaithih, thlalang,,,
  7. Minung Hmin:Ram Duh Thang, Tenglam, Malsawm Kim, Simthli Hran Thang, Thawngza  Lian,.. (Cakalhmang zawngin sullam nei tongfang pakhat ciarin tongfang pakhat ah ngan ding a si. ‘grammar duhdan cun’)
  8. Hrinhnam hmin kan ngan tikah tongfang pakhat ah ngan ding. Mang Sum Hlawnceu = Pu Hlawn Ceu ih tesinfa ‘Mang Sum’ a si tinak (hrinhnam hmin). Thuanthu kan ngan tikah cun ‘Pu Hlawn Ceu’ tiin ngan ding. (Amah Hlawn Ceu ngaingai ngan tikah)
  9. Kan fale pawl hrinhnam hmin tel in kan sak duh ahcun “Hlawnceu Thang, Laisak Mang, Tuallawt Sum,… tiin ngan sehla cakalhmang cun a dik ding.

Hminsin: Minung Hmin pawl cu hmin neitu ih ngandan in ngansak ding a si. Bulpak Hmin ngah tikah tongfang pakhat ciar ih a thawhnak ah Cafangpi in ngan ding a si.

2. Minung Hminsawng pawl tongfang pakhat ah ngankom ding.

  1. amah, anmah, keimah, kanmah, nanmah, nangmah
  2. anih, annih, kannih, nannih,
  3. amai, anmai, keimai, kanmai, nanmai, nangmai,

3. Awthuah le awhrek thuah pawl tongfang pakhat ah ngankom ding.

  1. Hmuahhmuah, leuhleuh, ringring, lala, cingcing, sinsin, hihi,,
  2. Rero, ciamco, dukdi, siamsi, bembi,,,

4. Khihhmuhtu le Pehzomtu tongfang pawl tongfang pakhat ah ngankom ding.

  1. Parah, kiangah, tlunah, sirah, laiah, kapah, hrangah, ruangah,,,
  2. Parih, kiangih, tlunih, hrangih, ruangih, sungih, lengih, sirih,,,
  3. Tlunin, sirin, parin, kiangin, tangin, vekin, bangin, zirin,,,

Hminsin: “Ah, Ih, In” pawl hi dungbet an si lo ruangah Hmin, Hminsawng, Fiangtertu, Tuahrel, Langtertu, Thinthawngtu, Kimtertu  pawl dungah komcih lo ding. (Himi pawl hi kan kom sual theu ih grammar zawngin a dik lo ruangah kom lo ding an si.)

  • Ah – kum ah, pawl ah, na feh ah, atu ah, tuzan ah, khua ah, sun ah, zan ah,,,,  
  • Ih – pawl ih, feh ih, tel ih, a zam ih, sun ih, zan ih, tuah ih, dil ih, cak ih,,,,
  • In – pawl in, feh in, sut in, Pathian in, nang in, kum in, zan in, feh in,,,

5. Hmaibet le Dungbet pawl hi Fiangtertu le Tuahrel ah ngankom ding. Hmin ah khal kom tul caan a um.

  1. Cangcop Hmin cantertu dungbet pawl (T/F) + (tu, nak, mi, dan, pi)

–          Zumtu, duhdawtu, fimnak, cahnak, duhmi, zummi, thiamdan, feldan, fehpi, topi,,,

  1. Komcih Hmin cantertu dungbet pawl (T) + (awk, cih, cop, pi, san, sak, sal, ter, tlang)

–          Duhawk, pokcih, cawmcop, topi, thihsan, tuahsak, pesal, tlunter, totlang,,,

  1. Cuangmuar Fiangtertu cantertu dungbet pawl- (F) + (bik, deuh, sawn, tak, tuk, zet)

–          Cakbik, fimdeuh, thasawn, mawitak, sangtuk, felzet,,,

  1. Cangvaih Langtertu cantertu dungbet pawl-(F) + (tein, piin, zetin)

–          lungawitein, feltein, napiin, sangpiin, cakzetin, rangzetin,,,

  1. Adang Ruahcih ding pawl:
  1. Komkhawm Tongfang pawl cu tongfang pakhat ah ngankom ding.
  2. Van (H) + ram (H) = vanram
  3. Hla (H) + rem (T) = hlarem
  4. Ti (H) + sa (F) = tisa
  5. Dai (F) + dap (F) = daidap
  6. To (T) + kham (T) = tokham
  7. Cam (T) + siat (F) = camsiat
  8. Komkhawm Hmin pawl: belrang, tidai, fangfai, lukhum, vanzamleng, voksa, arti, cawki, zahphek, lunghring, saihlum, khuaitizu, vatebu, samkilh, kedan, namsau, leibel, thingkhon, mitkharh,,,
  9. Komkhawm Tuahrel pawl: lailang (laihlang), simfiang, theifiang (theihfiang). relcat, camsiat, remtha (remthat), ngankom, ngankhum, mangbang, tlanhlo, tlansuak, fehsuak, luangliam, kaiso, vaksuak (vahsuah), simrel, tihzah,,,

7. Adang Dungbet phun ummi pawl:

  1. aw       – tongaw, pahaw, simaw, relaw,,, (T)
  2. bet       – kombet, palbet, sitbet, nembet,,,(T)
  3. khawm            – fehkhawm, itkhawm, relkhawm,,, (T)
  4. kom     – pawlkom (H), thumkom (F), ngankom (T)
  5. lai        – khawmlai, fehlai, tlunglai, peklai,,,??? (T)
  6. lam      – thlaraulam, biaknaklam, thinlunglam,,, (F)
  7. lam      – fehlam, tlunlam, ratlam,,,, ???
  8. lan       – fehlan, tlunglan, thlunlan, tellan,…??? (T)
  9. non      – relnon, simnon, (simsal),,, (T)
  10. nung    – duhnung,   tihnung, fihnung,,, (F)
  11. ral        – cemral, hloral, ziamral, hmangral,,, (T)
  12. so         – somso, domso, kaiso, lakso, khaiso,,, (T)
  13. ta         – rata, fehta, relta, vata, sitta,,,???(T)
  14. thlak    – namthlak, sukthlak, fehthlak,,,??? (T),,
  15. tlak      – bomtlak, pektlak, eitlak, pomtlak,,, (H)
  16. tin        – khuatin, hmuntin, hnamtin, ramtin, mitin,,,???
  17. tin        – kumtin, thlatin, nitin, zantin, zarhtin,,, (L)
  18. ton       – simton, pekton, zohton,,, (T)
  19. um       – duhum, zahum, huatum, fihum,,, (F)
  20. zat       – umzat, razat, pekzat, fehzat,,,??? (F)

Himi pawl hi ruatcih dingmi pawl an si. Himi lo khal adang a um lai thei. Himi pawl hi kom tengteng ding tinak siloin kom theih an si maw,,,, kan kom tikah cakalhmang zawngin sullam a nei maw? timi zoh in sullam nei ih kan theihfiangmi pawl cu ngankom ding an si.

Thunetnak:

  • Hih a tlunih ruah ding pawl kan ruat ih thlun dingih kan lungkimmi kan thlun ahcun Chin Cangandan ah  tongfang kom ding le kom lo ding pawl kan theithiam vivo ding ih kan thangso tengteng ding, ti zumnak kan nei.
  • Tongfangkom thi ih ruahnak pek ka duhmi pakhat cu, kom ding ih kan fianglomi cu a pakpaktein ngan mai sehla a thasawn. Komlo sual hnakin kom sual hi a poi deuh.
  • Nan zate parah tampi kan lungawi. Chinca kan ngan tikah kan bangawk thei vivo nak dingah kan zate parah Pathian ih thluasuahnak um hram seh!
(Visited 170 times, 1 visits today)

Comments

comments

Comments

%d bloggers like this: