Mai Miza Lian Mawi: Miss Chin Community Australia Tonsuhnak Tawi

13342522_10206845447028013_1740816724_n

Australia ih Chin-mipipawl ih puai an sunsakbik mi pakhat, Chin Kum Thar puai -2015, Adelaide khua ih an hmannak ah, a hmaisabiknak lengdawh mawi hrilsuahnak an nei ih Mai Miza Lian Mawi (19) cun pakhatnak a ngah a si.

Australia ih State dangdang ihsin lengdawh mawibik zuamawnak ih a teltu mi 8 lakah Mai Miza Lian Mawi cun Miss Chin Community Australia sinak lukhum mawi a khum ngah ih laksawng a ngah ih hleiah a zuk cu calendar ah an tarlang cih a si.

Mai Miza Lian Mawi hi Pa Thawng Bil Lian le Nu Mawi Sung ih fa lakih 5 nak, nunau lakih fahniangbik a si. Falam khua ah a suak ih Kalaymoy le Yangon ah tlawng a kai hnu ah leitlun khaw nuam le umnak hlawhbik Melbourne, Australia ah a zirnak peh dingah a thleng.

13319010_10206845447588027_890638183_n

A tu ahcun leitlun ih a duhbikmi awnmawi-lam zir in a caan a hmang ih Melbourne ih Falam kawhhran tumbik ECCM kawhhran ah piano tumtu khal a si.

A hnuai ah Chinland Today in Mai Miza Lian Mawi, Miss Chin Community Australia thusunak kan tarlang a si.

Chinland Today- Miss Chin Community Australia sithei dingah ziangtluk timtuahnak na rak nei?

Miza Lian Mawi: – Miss zuamawknak ah hi keimah tawkten cun karak timtuah aw ve nasa. Angki le pakhatkhat tivek hawl ah, cule mipi hmai ih mit hmai ret daan ding pawl siseh feh daan ding pawl tla caan pek in ka rak timlam aw ve nasa.

Chinland Today:        Miss hrilnak hi nuamnak phun ih tuah asi ko nan, ziangah zohthimtlak le thungaithlak in na zuam?

Miza Lian Mawi: – Minung hi ziangkim kan tuahnak ah nomnak men khal, ziang vek thupi lo le fatebik te hman ah thabik le mah ih tithei tawk in zuam ding hi a thupi tuk tin ka hmuh ruangah a si.

Chinland Today: Miss na zuamnak ihsin na zir suahmi, na hmuhtonmi pawl?

Miza Lian Mawi: Miss ka zuamnak ihsin ka hmuhsuakmi cu Laimi nunaupawl hi kan rak menlo. Mawi lo tuk ah kan zaten kan ruat awk theu, asinan mivekin kan vun ceiawk cun kan mawi thluh.

Cubet ah fimthiamnak lam khalah kan thangso vivo, kan tongkam le kan um daan ziaza in hmuh thei a si. Cunah Mirang lak khalah mah le mah rinsanawknak nei takin tlangleng ding kan si ti hi a si.

13349101_10206845450508100_1840978348_n

Chinland Today: Nunau ih mawinak hi a ziangbik a si, ziangtin na simfiang ve ding?

Miza Lian Mawi: Nunau pakhat ih a mawinak cu a mah le mah a rinsanawknak, taimaknak le Pathian duhdawttu si hi a si ti’n ka hmu. Hmel le ruangrai pawl hi lenglam mawinak lawng an si, rei a daih lo timi kan thei thluh ko.

Nunau pakhat nih confident (rinsanawk) ten ziang kim a tuah ih felfai te le taimaksuah nak thawn a tuah ahcun mi’h mit ah siseh Pathian mithmuh ah siseh duhnungza ah an cang. Cunah nunau zaten ziangvek ruangrai leh hmel kan va nei hman ah Pathian kan tihzah ih ziangkim kan tuah ah taimaknak le confident ten kan tuah ahcu kan mawi thluh tin ka hmu a si.

Comments

comments

Comments

%d bloggers like this: