Mai Hnenih Cakuat By DL Senling

MAI…! MAI…! HNGILH HLAH MAW…

( Mai Hnenih Cakuat )

Duhdawtmi Mai,

Na hnenah kei na “U” santlailo bik in tu na fala pek ihsin na hrangah thil t’hahnem a si ding ti beiseinak thawn hi ca hi na siar dingah ka rak ngan. Tulai cu fala, tlangval lawng si loin suakthuan le nupinu pacangpa zo hnu tiangin leitlun nuamceennak ah an tlan ticu na theih vek a si. Kan rinlo mipawl in nupi pasal an nei ih a rei hlanah an t’hen aw sal ti thu theih ding a tam. Curuangah Mai, nang cu hi pawl vekin na si lo ding duhsaknak thawn ruahnak malte ka lo seu.

Ka nau, Innsungsang timi cu “a thupi tuk,” timi t’ongfang hman in a daih lo. Ziangah tile minung kan san sungah Innsungsang dinhmun in caan kan hmang rei bik ruangah a si. Mi ziangmawzat  cu nupi le pasal an neih hlan tiang cu nuam zetin harsatnak le buainak ziangvek a si ti an rak thei dah lo na’n, nupi pasal an vun neih hnu an Innsungsang buainak, harsatnak le nuamawklonak ruangah thinpit vansangin nunman neilo ah an ruat aw, culawng siloin  ahrek cu mah le mah that aw tiang in an nunnak an cemter. Mi ziangmawzat ve lala cu an nauhak tet lai ihsin an harsa, an rethei. Ahrek cu nulepai’ duhdawtnak hi a thlum maw a al ti thei lo ih t’hanglian an um. Nun hi an hrangah cun a pak ii pak le a khat ii kha  in  an thei. Cuih nunman nei lo ih ruat aw pawl lakah a hrek in Innsungsang nuam an rundin thei ruangah a  liam zomi ih harsarnak hmuahhmuah cu hngilh in nunman nei le suahman nei in an run thei aw  sal. Curuangah nang khal Innsungsang nuam din ding na duh asile tui’ na nuncan ziaza le na hrilmi parah a t’hum aw a si.

Na falat laicaan ih na umdaan i zir in na Innsungsangah a rah na ei leh ding. Nupinu tampi cu an falat lai ih fellonak in an t’ih a hrut ter, an pasal hnen ah an t’ong duhmi a t’ong ngamter lo, thik zet t’heu hmanhaisehla an pasal nun an sim ngam lo. A hrek cun hmaisong cing te’n an duhdawt zetmi an pasal cu zan vak lo dingin le siim tuk ih tlung nawn lo dingin  an dil t’heu na’n, daiten um men aw ka ra tlungsal hi… nangmah hman na fala hnahkhat sinak hman maw i pe thei lo ti’n … Innsungsang buainak hrampi ah cang in nupinu tampi cu mitthli thawn an caan an hmang. Sir awk in le man nei nawn ta lo, a va poi ve…! Esau in rawl vawikhat einak men ah fapa upa sinak a zuar, mitthli thawn a pai’ hmaiah riahsiatnak langter hmanseh san a tlai nawn si lo. Curuangah tangka, sui le ngun ih lei theih lomi na fala hnahkhat sinak kha voikhat nuamnak hrang le na tlangval thinheng ding phang men ah a poi lo ti siang hram halh aw. Na hmai ahcun a thin a heng aw ter ding na’n hmuh banlo a thinlung  sung in cun “ummm…ka duh zawng nupi tlak rori” ti’n a lo ti rero ding. Hngilh aw hlah, a thinhengnak cu a rei hlanah a reh thei ding na’n na fala hnahkhat sinak cu thlanmual a thlen tiangin a lo ruk sak lanta ding. Zum pang hlah, ka lo nei tengteng ding a lo ti khalle, nunau in nan ziaza t’halo nan thuh thiam vekin mipa khalin nunau bum kan thiam ve. Mary tla kha fala thianghlim rak sihlah sehla cu “rundamtu Zisu’n” a pum a sang lo ding. “Tlangval in fala thiang a t’hit vekin,…Tlangval cu a fala par ih a lungawi vekin…”Isai.62:5.

Mai, mi lak na suakvak can ah na umdaan, na t’ongmi va ralring hram aw. Mipa hrek khatin hi ti’n an ti t’heu micu, “fala in a lo hnihsan len biak ding a har lo, a lo biak hmai le capoh thungai ding a har lo, voikhat feh tlang le lakphak dawr to tlang hnu cun a voihnihnak cu a har nawn lo, a kut na kaih thei hnucun a liang ih kuah a har nawn lo, a liangih na kuah thei hnu cun kheng sungsa,” ti’n an ti t’heu. Daithlang pang aw hlah, voikhat te timi hi a thupi tuk lawmman. Na hnakih cak an tam tuk ruangah zaan ah nangmah lawngin lengsuak vak aw hlah. Vokpi suakin liamkuan ding mi a tlun, nunau suakin nau-pai thawn a ra tlung an ti t’heu mi kha hngilh hram hlah aw maw. Ca na ngan sual le correction pen a um, thil na ti bung pang hman ah hmunphiah le hmawmrutnak a um, a sina’n nuncan ziaza mawi lo ruangih hminsia le thangsia phiatnak tuahtu company cu a um hrih lo. Curuangah na falat pek ihsin na sunlawi zia hi thei aw hram aw, “blank paper” vek sokhaw na si. Na felnak in na pasal hmaiah mit hmai t’ha a lo pe ding. Mi zuva hman in an nupi ding ah mifel an beisei ve.

Zin kapah par aw hlah, papar ih mawinak le sunlawinak theilotu pawl in an lo pal kiak pang ding. Thingkung rop le phentu thinghnah nei lo par khalah fu aw hlah, zaangfahnak  neilotu saihlum in a lo ngah pang ding. Duhmi pakhat lawng nei aw hlah, pahnih khalin nei aw hlah, a lo duhtu kha duh aw, a lo duhsawntu kha duh aw, pahra neih hnakin a lo hngak taktak tu kha duh ve aw. Biaknak, rinnak, tumtahnak, miphun, le nunphung bang awmi duh aw. Fimnak, thiamnak, lian le farah, le sinak tan aw tuk lomi duh aw. Kum tan aw tukmi khal a t’ha lo. Na mit lawng khalin hawl aw hlah, na hna hmang aw. A cang thei asile rualpi vekin kawm ta awla a ziaza, a tlinlonak (weaknesses), rawl a duh zawng, a ei theilo mi le ziangvek dam lonak (tt. Cancer, thithlum, tvp.) a nei?  ti pawl tla duh thu na sim hlanah na theihcia thluh le a t’ha sinsin. Nan sinak nan theih aw thluh veve hnu in kan tlinlonak pawl hi kan ngaithiam aw veve thei pei maw? ti’n thutaw le thulu ruat fel ta in thu botcatnak tuah aw maw.

Mipa t’ongtam cu tilung nal vek an si. Mipa t’ong rang cu an kut a rang ve. Mipa samsen cu pasal hrangih t’ha an mal. Rit theih thamtu cun ziang dang hmuahhmuah (innsungsang ih thil t’ul mi) hnakin a thinlung a duhdawt sawn. Mah le mah kilkhawi aw thei lotu cun a Innsungsang a kilkhawi theilo  ding. Zaan vak tam mipa cu zinkap Uico in an baihat. Nunau in an ziaza t’halo an thuh thiam vekin mipa khalin nunau bum an thiam ve. Calngolh zate’n thurawn an tlak thluh lo. Cathiam zate’n an fim thluh lo. Tlakrawh Innpi sungih itthat theilo hnakin Di Innsung ih mangman a t’ha sawn.

Duhdawtmi ka nau, na parmawinak le na hmuinak kha thothe, kawngsang le phengphehelp hrangah siang aw hlah maw. Thulu le thutaw ruat fel ta lo ih pasal neitu cu sir aw an tam. A lo duhlo tu le na duhlo mi cu na neih lo a t’ha sawn. A lian le mawi ruang khal ah nei aw hlah. Rualpi forh ruang men khalah pasal nei pang aw hlah. Thinnat ruangah le mi pakhat khat phirsit duh ruang khalah pasal nei aw hlah. Na rualpi pakhat khat pasal a neihmi daw in neih ve mei tum cuang aw hlah. Olsaam tukih ka lo duh titu cun harsa loin ka lo duh nawn lo an ti t’heu. Cuvekin olsaam tukih neihawk cu a reihlanah an t’hen aw sal ve t’heu. “Lovah hril sual in kumkhat a daih, innsang din sual cu san sung thawngtlak, biaknak hril sual cu kumkhaw sir awk,” an ti t’heu vekin na san sung nuam awknak ding lo beisei saknak thawn hi ca hmangin kei na “U” in ruahnak ka rak lo pekmi hi thupi ah rak ngai hram aw maw… Na hmailam nuntu daan ding cu tui’ na kut par ah a um… Asile hinah ca ih ka lo biaknak ka cawl ta hrih ding…Damte le tluang te’n aw…

Na U,

Salai DL Senling


Comments

comments

6 Comments

  1. aaaa, na ca ngan mi cuu a tha rori si!
    zg fah ten hi na ca ngan mi hi ka mail ah i kuat sal thei kem?

  2. Na ca ngan mi a tha nasa. Siar a nuam in a thuk zet. Ngan ring ring aw. Fala tampi in groupmail le hivek ca hi an siar lo theu ding a bang cucu a pawi mi a si. San hi a thleng aw vivo ih ca ngan tik ah kan worldview tla hi san thar man ding in kan thleng a ttul ding ka zum. Tahttimnak ah “Olsaam tukih ka lo duh titu cun harsa loin ka lo duh nawn lo an ti t’heu” timi hi cu, San hlun tuk in ka hmu. Can, hmunram , miphun le nuphung thawn tla in a pek par aw ding tiah ka ruat. Kan laimi pawl in lo thlawk nak ah tuhmui lawng2 hmang ring2 ding.

  3. kan lai ca ah Olsaam tivek a um dah maw si, ziang tik in a thawk
    in sim thei tu nan um le ka lung awi zet ding,,,,,

  4. Olsaam=Awlsam
    Olai = awl-ai
    OLte = Awlte
    Lohli = hmakhat te

    tivek a si maw…

  5. na thin lung ih putsuak thil a si ding ih a thuk zet, a tha tuk, kei mah bulpak in ka lungawi. na hmuh daan men silo in na thinlung putsuak rori cu tampi in ngan ringring thei ding in thlacamnak thawn khal in ka lo bawm ding.

  6. Ekhai,, kan rual pa na mak rori c (Pa Dl)

    roling ca a si.. ka rak hmu ttheu nan,,,

    Kan rual pa ngai hi,,thu hlapi va ngan hlah ti ah ka rak siar dah lo( capoh)

    ttha lawlaw ,, mak tarai,,a si hi maw!

    sile,

    looking forward ringring tu,,,le

    Calai ih na u nau,

    mangte,
    Yangon..

Comments

%d bloggers like this: