Mai Daidim Ih “Ka Lo Hngak Ding” Hi Nunthuleng Rotling A Si

 

12642590_1050550155009029_1136876008205517529_nSalai V Bawi Lian

Nunthuanthu, nunthuleng siar paih zet mi ka siih, Kan Chin cazual suak mi pawl ih cahmai tawite ih an telh mi pawl, Magzine ih an ngan mi hrekkhat, Nunthuleng cabu pahnih khat suak pawl ka man caan poh ahcun ka siar ve theu. Cumi lakah cafung hmin Mai Daidim ti hmang ih nunthuleng menmen silo an tonteh mi thuhla pawl bun cih ih a ngan mi hi rotling siartlak nunthuleng pakhat a si tiin kei cun ka hminsin.

Chinland Today Facebook group ah a rak ngan thok. Cahmai 1 le hrek tluk lole cuhnak ih tam deuh a si theu ruangah a siartu an um lemlo ding tiah ka ruat theu. Asinan a siartu pawl thinlung tham zet le nunthungai pawl cawhpol mi a si ruangah mi nun ram ah a rak caam zet ticu an comment nak le a tak ram tiang ih a ra thlen theinak thuhla zoh in kan nemhnget thei. Nunthuanthu cawhpolh mi lawng siloin kan Lai nunphung ih an thil kawh dan le an ti daan tete pawl khal hi thuanthu ah a telh cih.

Ka Lo Hngak Ding

Ka Lo Hngak Ding

Chinand Today Media (www.chinlandtoday.info) ah a nunthuleng pawl cu mipi tamsawn ih an duh caan poh ih siar theih dingin kan rak ret sak vivo. Siartu an tam zet ih hawl hlawh zet mi khal a si.

Mai Daidim thawn kan biakawknak ah an nunthuleng ngam mi hi thla 8 sung lenglo a rei thu in sim. Ka ngaisannak a zual zet ih a cabu ka siar tik caan khalah di a riam in lung a hmui duh hleice. Singapore ih mi inn hnatuan bawm phah, internet hman ding harsatnak, phone hman mi thattawk lonak, caan heunak pawl khal pal tlang in, nunthuleng, nunthuanthu tonteh mi polh cihih a bun khawm mi hi nunthuanthu funkhawm ih a ngan mi “Ka Lo Hngak Ding” timi hi kan Chin mi pawl ih neih mi nunthuanthu cabu lakih rotling hminsintlak rori pakaht cu a si.

Mai Daidim

Mai Daidim

Chinland Today Help Team ih Chin ram harsa pawl tundinnak hrang bawmnak a vei (4) nak pe dingih kan soh laiah cabu cangsuak dingih a tawlrel saktu le a suahsaktu Saya Khar Thuan, Amah roriin a hmin ngan in rak pe. Ka lungawi in ka lunghmui zet.

Cahmai 300 a um ih a sungthu in cahmai 294 a luah. Part – 48 ah a then ih a thu pakhat hnu pakhat an pehpar aw in mi a thlim zet. Tulai santhar mino ih Mirang le Lai tong thawi, thlah awknak le thu titinak, santhar mino duhdawtawknak dan, hlan laiih thulairel tluk dan pawl khal tampi a tel.

Mai Daidim ih hmin ngai cu Zi Tlen Thiang a siih Pi Duh Hlei Zing le Pu San Sang tei’ fanau 6 rakah a pathumnak a si. 1988 Kum ah Falam peng Khuangli Khua ah a suak. Kum 2008 ihsin tuini tiang Singapore ah hnațuan in a um ih Chinland Today Media palai rinsan zet mi khal a si.#

Comments

comments

Comments

%d bloggers like this: