Macauley

 

 

June 29 

Tlawngkai Nikhat

 

 

 

Siar:

Isaiah 6:1-8

 

Cule Bawipa in, “Zoso ka thlah ding? Zosi ka palai a si ding?” a ti ka thei. Cutikah kei in, “Keimah ka feh ding! I thlah aw!” ka ti.     –Isaiah 6:8

 

Kumkhat Sung Baibal:

–   Job 14-16

–   Tirhthlah 9:22-43

 

Bible tlawng ka kaipi ka rual tthabik Macauley cu Pathian a duh taktak. A saduhthahmi cu Bible tlawng kai ttheh, a falanu Sharon tthit, Washington D.C khuapi ah kir saal in a rualpi le sungkhat unau pawl Khrih hnenah hruai hngai in kawhhran pakhat dinh ding timi hi a si.

 

Cuih a saduhthah cu Macauley le Sharon mawttaw ttaihnak in an thih tikah a cem. Mac hngilh lonak ih tuahmi khawmnak ah sawmngiarnak an run tuahmi cu: Mac a thi zo, a ai ah zo in a ttuan ding?” Mac ih zohtthim tlak nun ih hmualneihnak ruangah tlawngta 200 lenglo an dingih a ai ah ttuan dingin pum an pe aw.

 

Hih sawmngiarnak tlawngta pawl ih an lehmi ah Isaiah ih pumpeknak awkhawk a thang. Ttihnung le thinphaannak tampi lakah Pathian ih siangpahrang tokham umnak khaan ah Isaiah cu kawh a si ih, “Zoso ka thlah ding? Zoso ka palai a si ding?” tiah kawhnak aw a thei. Cutikah Isaiah in, “Keimah ka feh ding, i thlah aw,” tiah a ti (Isaiah 6:8).

 

Pathian in atu khal ah mipa siseh, nunau siseh a palai si dingin a ko. Lamnai ah siseh, lamhlat ah siseh A hrangih ttuan dingin in ko. Kan ruah dingmi cu, “A kawhnak aw cu ziangti’n kan let ding?” timi hi a si. Pathian in, “Hinah ka um, keimah ka feh ding,” ti ih kan leh theinak dingah raaltthatnak in pe hram seh!

 

Lungawi te’n A lo pekmi hna kha ttuan uh,

A hnattuan cu na nuam awknak ah siseh;

A lo kawh tikah zamrang te’n awi aw,

Hinah ka um, i thlah aw, i thlah aw.

 

Pathian in A kawh mi cu thiam dingin a zirh; a zirhmi cu a thlah.

(Visited 13 times, 1 visits today)

Comments

comments

Comments

%d bloggers like this: